މި ސަރުކާރަކީ އިންތިޚާބެއް އޮވެގެން ރައްޔިތުންނަށް ކަންކަން ކޮށްދީ ތަރައްޤީ ގެނެސްދޭ ސަރުކާރެއް ނޫންކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވިއެވެ.
އާޒިމް އެހެން ވިދާޅުވީ ހއ މުރައިދޫ ބަނދަރު ހެދުމުގެ މަޝްރޫއު ފެއްޓުމަށް އާދިއްތަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. އެގޮތުން ބާރަށު ދާއިރާގައި އިންތިޚާބެއް އޮތީތޯ ސުވާލު ކުރައްވައި ވާހަކަ ފައްޓަވަމުން އާޒިމް ވިދާޅުވީ، ކޮމަންޑޫ ދާއިރާގެ މަޝްރޫއުތައް ހިންގަނީ އެ ދާއިރާގައި އިންތިޚާބެއް އޮތުމުންކަމަށް ދާދި ފަހުން ބައެއް ފަރާތްތަކުން ބުނެފައިވާ ކަމަށެވެ. އެހެންނަމަވެސް، މި ސަރުކާރަކީ އިންތިޚާބެއް އޮވެގެން ކަންކަން ކޮށްދޭ ސަރުކާރެއް ނޫންކަމަށް އާޒިމް ވިދާޅުވިއެވެ.
މި ދާއިރާގައި އިންތިޚާބެއް އޮތީތޯ؟ އަޅުގަނޑު ކޮމަންޑޫގައި މަސައްކަތެއް ފަށާފައި މި އައީ، ބައެއް ބޭފުޅުން ބުނި އެ ދާއިރާގެ އިންތިޚާބު އޮވެގެންނޭ މި އުޅެނީ، މި ސަރުކާރަކީ އިންތިޚާބެއް އޮވެގެން ރައްޔިތުންނަށް ތަރައްޤީ ގެނެސްދޭ ސަރުކާރެއް ނޫން، މި ސަރުކާރު އައިއިރު ރައީސް އިބްރާހިމް މުޙައްމަދު ސޯލިޙު ވިދާޅުވި، ރަށްރަށުގެ ރައްޔިތުންނަށް ބޭނުންވާ ކަންކަން ކޮށްދެއްވާނަމޭއެމްޓީސީސީގެ ސީއީއޯ އާދަމް އާޒިމް
އާޒިމް ވިދާޅުވީ، ރަށްރަށުގެ ރައްޔިތުންނަށް ކަންކަން ކޮށްދެއްވުމަކީ ރައީސް އިބްރާހިމް މުޙައްމަދު ސޯލިޙުގެ ވައުދުފުޅެއް ކަމަށާއި، އިންތިޚާބެއް އަންނާތީ ސަރުކާރުގެ ހަލުވި ދުވެލި މަޑުކޮށްލަން ނުޖެހޭ ކަމަށެވެ. އެގޮތުން އިންތިޚާބެއް އޮތް ދާއިރާއެއް ނަމަވެސް ނުވަތަ ނެތް ދާއިރާއެއް ނަމަވެސް ހަލުވިކަމާއެކު މަސައްކަތްތައް ކުރިއަށް ގެންދިއުމަކީ ރައީސް ބޭނުންފުޅުވާ ގޮތްކަމަށް އާޒިމް ވިދާޅުވިއެވެ.
އާޒިމް ވަނީ ދުވަހެއް ދުވަހަކަށް ދުވެލި ހަލުވިކޮށް، ކުންފުނިން މަސައްކަތް ކުރާނެ ކަމުގެ ޔަޤީންކަން ރައީސްއަށާއި، ރައްޔިތުންނަށްވެސް ދެއްވާފައެވެ. އަދި ރައްޔިތުންނަށް ކޮށްދެންޖެހޭ ކަންކަން ކޮށްދިނުމުގައި އެންމެ އިންޗިއެއްވެސް ފަހަތަށް ނުޖެހި ކުންފުނިން ސާބިތުކަމާއެކު އޮންނާނެކަމަށް އާޒިމް ވިދާޅުވިއެވެ. އެގޮތުން އަހަރެއްހާ ދުވަހުގެ ތެރޭގައި މުރައިދޫ ބަނދަރުގެ މަސައްކަތްވެސް ކޮށް ނިންމަވާނެކަމަށް އާޒިމް ވިދާޅުވިއެވެ. އަދި މުރައިދޫގެ ރައްޔިތުންނާއި ކައުންސިލުގެ އެދުމުގެ މަތިން އެރަށު މޫދަށް އެރޭ ސަރަޙައްދުގެ މަސައްކަތްވެސް ކުންފުނީގެ ސީއެސްއާރުގެ ދަށުން ކޮށްދެއްވާނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މި ސަރުކާރުން ކަންކަން ކޮށްދެމުން ދަނީ ހެޔޮ ނިޔަތުގައި ކަމަށެވެ. އަދި ކުންފުނީގެ ޚިދުމަތް ލިބިގަތުމުގައި ދަތިވާފަދަ އެއްވެސް ކަމެއް އެއްވެސް ރަށަކަށް ދިމާވާނަމަ އެކަން ހިއްސާ ކޮށްދިނުމަށް އާޒިމް އެދިވަޑައިގެންނެވިއެވެ.
އާޒިމް ވިދާޅުވީ މި ސަރުކާރު އައި އިރު 150 މަޝްރޫއު އެމްޓީސީސީއާ ޙަވާލުކޮށްފައިވާ ކަމަށެވެ. މިވަގުތުވެސް ކުންފުނިން 68 މަޝްރޫއު ހިންގަމުން ގެންދާކަން ފާހަގަ ކުރައްވައި އާޒިމް ވިދާޅުވީ، މި 3 އަހަރުގެ ތެރޭގައި 50ށް ވުރެ ގިނަ މަޝްރޫއުގެ މަސައްކަތް ނިންމައި ޙަވާލު ކޮށްފައިވާނެ ކަމަށެވެ.
