މުރައިދޫ ބަނދަރު ހެދުމުގެ މަޝްރޫއުގެ އަމަލީ މަސައްކަތް ފަށައިފި

ހއ. މުރައިދޫ ބަނދަރު ބޮޑުކުރުމާއި އަޕްގްރޭޑް ކުރުމުގެ މަޝްރޫޢުގެ އަމަލީ މަސައްކަތް ފަށައިފިއެވެ.

ޑިޒައިން އެންޑް ބިލްޑް އުސޫލުން ހއ. މުރައިދޫ ބަނދަރު ތަރައްގީ ކުރުމުގެ މަޝްރޫއު މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗާ ގެ ފަރާތުން އެމްޓީސީސީ އާއި ހަވާލުކުރީ 25 އޮގަސްޓް 2021ގައެވެ. މި މަޝްރޫޢުއަކީ 33.7 މިލިޔަން ރުފިޔާގެ މަޝްރޫޢު އެކެވެ.  

މި މަޝްރޫއުގެ އަމަލީ މަސައްކަތް ފެށުމަށްޓަކައި އާދިއްތަ ދުވަހު ވަނީ ޚާއްސަ ރަސްމިއްޔާތެއްވެސް ބާއްވާފައެވެ. މި ރަސްމިއްޔާތުގައި އެމްޓީސީސީގެ ސީއީއޯ އާދަމް އާޒިމްގެ އިތުރުން، ބާރަށު ދާއިރާގެ މެމްބަރު އަހުމަދު އަބްދުﷲވެސް ބައިވެރިވެވަޑައިގެންނެވިއެވެ.

މި މަޝްރޫޢު ހިންގުމަށްޓަކައި ޕްރޮޖެކްޓް ސައިޓް މޮބލައިޒްކޮށް، ބަނދަރު ހެދުމަށް ބޭނުންވާ ސާމާނު އެރަށަށް ގެންގޮސްފައިވަނީ ޖެނުއަރީ މަހުގެ އެއްވަނަ ދުވަހުއެވެ.

މުރައިދޫ ބަނދަރު ހެދުމުގެ މަޝްރޫޢުގެ ތެރޭގައި 29،841 ކިއުބިކް މީޓަރުގެ ސަރަޙައްދެއް ފުން ކުުރުމާއި 3،546 ކިއުބިކް މީޓަރުގެ ފުޅާމިނުގައި ބަނދަރަށް ވަންނަ ނެރު ފުން ކުރުމާއި 212 މީޓަރުގެ އެއްގަމު ތޮށި ޖެހުން ހިމެނެއެވެ.

މީގެ އިތުރުން ބަނދަރުގެ 50 މީޓަރުގައި ގްރޮއިން ޖަހާއި 107 މީޓަރު އެގްޒިސްޓިންގ ބްރޭކްވޯޓާ ރިފްރޮފައިލް ކުރުމުގެ އިތުރުން އެއްގަމު ތޮށިން ބޭރު ތޮށްޓަށް އަރަން ބްރިޖެއް ހެދުމާއި ރޭމްޕް ހެދުމާއި ޕޭވްމަންޓް ހެދުމާއި މަގުބައްތި ހަރުކުރުމާއި ނެވިގޭޝަން ލައިޓް ހަރުކުރުމަށްވަނީ ހަމަޖެހިފައެވެ.