އިރާނާއި ޗައިނާގެ އިގްތިޞާދީ އަދި ސިޔާސީ ގުޅުން އިތުރު ހަރުފަތަކަށް، ޗައިނާގެ ބަހުގެ ހަމަލާތައް އެމެރިކާއަށް

އެމެރިކާއިން އިރާނަށް އަޅާފައިވާ ދަތިކުރުމުގެ ފިޔަވަޅުތަކާއި ގުޅިގެން ޗައިނާއިން އެމެރިކާއަށް ވަރަށް ބޮޑަށް ފާޑުކިޔުންތައް އަމާޒުކޮށްފިއެވެ.

ޗައިނާއިން އެމެރިކާއަށް ބަހުގެ ހަމަލާތަކެއް ދީފައިމިވަނީ އިރާނާއި ޗައިނާ އާ ދެމެދު އިގްތިޞާދީ އަދި ސިޔާސީ ގޮތުން އިތުރަށް ގުޅުން ވަރުގަދަވެގެންދާނެ 25 އަހަރު ދުވަހުގެ ކޯޕަރޭޝަން އެގްރިމެންޓަށް އަމަލުކުރަން ފެށުމާ ދިމާކޮށެވެ. ހުކުރު ދުވަހު ޗައިނާގައި އެޤައުމުގެ ފޮރިން މިނިސްޓަރ ވެންގ ޔީ އާއި އިރާނުގެ ފޮރިން މިނިސްޓަރ ހުސައިން އާމިރު އަބްދުﷲހިއަން އާއެކު ވަނީ ބައްދަލުވުމެއް ބާއްވާފައެވެ.

މިބައްދަލުވުމުގައި ހިނގާދިޔަ ކަންތައްތަކާއި ގުޅޭ ޚުލާސާއެއް ޗައިނާގެ ފޮރިން މިނިސްޓްރީ ވެބްސައިޓްގައި ހޮނިހިރު ދުވަހު ވަނީ ހިމަނާފައެވެ. ވެންގ ވިދާޅުވީ އިރާނަށް މިހާރު ކުރިމަތިވެފައިވާ ދަތި އުނދަގޫ ހުރިހާ ކަމަކީވެސް އެމެރިކާއިން ޒިންމާނަގަންޖެހޭ ކަމެއްކަމަށެވެ. އަދި 2015 ވަނަ އަހަރު އެއްބަސްވެވުނު އިރާނުގެ ނިޔުކްލިއަރ ޑީލުން އެމެރިކާއިން ވަކިވުމުން އެކަމަށް ވެންގ ވަނީ ފާޑުވިދާޅުވެފައެވެ.

ނިޔުކްލިއަރ އެއްބަސްވުމުގައިވާ ގޮތުގެމަތިން އިރާނުން ޔުރޭނިއަމް ފައްކާކުރުން ވަކި މިންވަރެއްގައި ހިފަހައްޓަންޖެހޭނެއެވެ. އޭގެ ބަދަލެއްގެ ގޮތުގައި އިރާނާ ދެކޮޅަށް އަޅާފައިވާ ހުރިހާ ފިޔަވަޅުތަކެއް އުވާލާނެއެވެ. އިރާނުން އަންނަނީ ނިޔުކްލިއަރ ހަތިޔާރު އެގައުމުން އުފައްދާކަމަށް ތުހުމަތުކުރާކުރުން ތަކުރާރުކޮށް ދޮގުކުރަމުންނެވެ. އިރާނުން ބުނަމުން އަންނަނީ ނިޔުކްލިއަރ ހަތިޔާރު އުފެއްދުމުގެ ވިސްނުމެއް އެގައުމުގެ ނެތްކަމަށެވެ.

ވެންގ ވިދާޅުވީ ނިޔުކްލިއަރ އެއްބަސްވުމާއި ގުޅޭގޮތުން އަލުން ވާހަކަތައް ދެއްކުމަށް ޗައިނާއިން ތާއީދުކަމަށެވެ. ނަމަވެސް އިރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ބަލައިނުގަނެވޭކަމަށް ޗައިނާއިން ބުނެއެވެ. އިންސާނީ ހައްގުތަކުގެ ނަމުގަޔާއި އެނޫން ގޮތްގޮތަށް އިރާނަށް ސިޔާސީ ގޮތުން ނުފޫޒު ފޯރުވުމަށް ކުރަމުންދާ މަސައްކަތްތަކާއި އިރާނުގެ އެތެރޭގައި ހިނގާ ކަންކަމަށް ބާރުފޯރުވުމަށް މަސައްކަތްކުރުމާއި މެދުއިރުމައްޗަށް އެމެރިކާގެ ނުފޫޒު ފޯރުވަން ކުރަމުންދާ މަސައްކަތްތައް ބަލައިނުގަނެވޭކަމަށް ޗައިނާއިން ބުނެއެވެ.

އިރާނުގެ ނިޔުކުލިއަރ އެއްބަސްވުމުން އެމެރިކާ ވަކިވުމަށްފަހު އިރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން އިރާނުގެ އިގްތިޞާދަށް އަންނަނީ ބޮޑެތި ގެއްލުންތަކެއްވަމުންނެވެ. އެމެރިކާއިން ތުހުމަތުކުރާ ގޮތުގައި އިރާނުން އަންނަނީ ނިޔުކްލިއަރ ހަތިޔާރު އުފައްދާ ބެލެސްޓިކް މިސައިލް ޕްރޮގްރާމް ފުޅާކޮށް އެސަރަހައްދަށް ނުފޫޒު ފޯރުވުމަށް މަސައްކަތްކުރަމުންނެވެ.

އެމެރިކާގެ ދަތިކުރުމުގެ ފިޔަވަޅުތަކާއި ކުރިމަތިވެފައިވާ ދެގައުމު ކަމުގައިވާ ޗައިނާ އާއި އިރާނުން ވަނީ މިދިޔަ އަހަރުގެ މަރޗް މަހު 25 އަހަރުގެ ކޯޕަރޭޝަން އެގްރިމެންޓެއްގައި ސޮއިކޮށްފައެވެ. މިއީ ޗައިނާގެ ބެލްޓް އެންޑް ރޯޑް އިނިޝިއޭޓިވްގެ ދަށުން އެތައް މިލިއަން ޑޮލަރެއްގެ އިންފްރާސްޓަރަކްޗަރ އިރުމަތީ އޭޝިޔާ އާއި ޔޫރަޕްގައި ގާއިމުކުރުމަށް ގެންގުޅޭ މަޝްރޫޢުގެ ބައެކެވެ.

މި މަޝްރޫޢުގެ މައިގަނޑު މަގްސަދަކީ ޗައިނާގެ އިގްތިޞާދީ އަދި ސިޔާސީ ނުފޫޒު ފުޅާކޮށް އެމެރިކާގެ ނުފޫޒު ކުޑަކުރުމަށް މަސައްކަތްކުރުމެވެ.

ޗައިނާ އާއި އިރާނާ ދެމެދު ވެވުނު އެއްބަސްވުމުގެ ދަށުން ހަކަތައާއި، އިންފްރާސްޓްރަކްޗަރ، ދަނޑުވެރިކަން، ސިއްހީ ނިޒާމާއި ޘަގާފަތް ކުރިއެރުވުމާއި ސައިބަރ ސެކިޔުރިޓީ އާއި އެހެނިހެން ގައުމުތަކާއެކު ގުޅުން ކުރިޔަށްގެންދިޔުމާއި ގުޅޭގޮތުން އެހީތެރިކަން ފޯރުކޮށްދޭނެއެވެ.

ވެންގ ވަނީ ހަމަ މިހަފްތާތެރޭގައި ގަލްފްގައި ހިމެނޭ އަރަބި އެހެން ގައުމުތަކުގެ އިސްވެރިންނާ ބައްދަލުކުރައްވާފައެވެ. އެބައްދަލުކުރެއްވުން ތަކުގައި އެގައުމުތަކުން ވަނީ އިރާނުގެ ފަރާތުން އެސަރަހައްދަށް ނުރައްކާވަމުން އަންނަކަން ފާހަގަކޮށްފައެވެ. އެހެންކަމުން ޗައިނާއިން އަންނަނީ ގަލްފް ގައުމުތަކުގެ މެދުގައި އެސަރަހައްދުގެ ސަލާމަތާއި ގުޅޭގޮތުން ހުރި މައްސަލަތަކާއި ގުޅޭގޮތުން ވާހަކަތައް ދެއްކޭނެ މާހައުލެއް ގާއިމުކުރުމުގެ މަސައްކަތްކުރަމުންނެވެ.