މި ސަރުކާރަކީ އަބަދުވެސް ފޮޅިފައި އޮންނަ މަލެއް - އާޒިމް

މިއަދުގެ ސަރުކާރަކީ އިންތިޚާބަށް ފޮޅޭ މަލެއް ނޫންކަމަށާއި، މިއީ އަބަދުވެސް ފޮޅިފައި އޮންނަ މަލެއްކަން ރައްޔިތުންނަށް ހާމަވަމުންދާ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

ދައުލަތުގެ މީޑިއާގެ ޕްރޮގްރާމެއްގައި ތަރައްގީގެ މަޝްރޫއުތަކާ ގުޅޭގޮތުން ވާހަކަދައްކަވަމުން އާޒިމް ވިދާޅުވީ، ދެ ކޮމަންޑޫ ގުޅާލުމަށް މީގެ މަހެއްހާ ދުވަސް ކުރިން މަސައްކަތް ފަށައި، އީއައިއޭއަށް ބޭނުންވާ ޑޭޓާތައް ހޯދަމުން ދިޔަ ކަމަށެވެ. އެހެންކަމުން މިއަދުގެ ސަރުކާރަކީ ކޮންމެ ދުވަހަކުވެސް ރައްޔިތުންނަށް ބޭނުންވާ ކަންކަން ބަލައި ހޯދައި، މަސައްކަތް ހަވާލު ކުރަމުން އެ މަސައްކަތް ނިންމަމުންދާ ސަރުކާރެއް ކަމަށެވެ. އާޒިމް ވިދާޅުވީ، ކޮންމެ ދުވަހަކުވެސް މިސަރުކާރުގެ މާ ފޮޅޭނެ ކަމަށާއި، އިންތިޚާބަށްޓަކައި މަސައްކަތް ކުރަނީއޭ އެއްވެސް މީހަކަށް ބުނެވެން ނޯންނާނެ ކަމަށެވެ.

Advertisement

ދެ ކޮމަންޑޫ ގުޅާލައި، ކުރިން ހިއްކާފައި އޮތް ތަން ބޭނުން ކުރެވޭގޮތް ހަދައި ކުރިން ޖަހާފައި ހުރި ހިލަތައް ބަދަލުކޮށް، އެމްޓީސީސީން ފައިބައިގެންދާނީ ގޯތިދެވޭ ފެންވަރަށް އެ މަސައްކަތް ނިންމުމަށް ފަހު ކަމުގެ ޔަގީންކަން އާޒިމް ދެއްވިއެވެ.

މިހާރު ސައިޓް މޮބިލައިޒް ކުރަން ފަށާފައިވާ ކަމަށާއި، ހުކުރު ދުވަހު ކޮމަންޑޫގައި 3 މަސައްކަތެއް ފެށިގެންދާނެކަން ފާހަގަކުރައްވަމުން އާޒިމް ވިދާޅުވީ، އެމްޓީސީސީގެ ސީއެސްއާރްގެ ދަށުން ކޮމަންޑޫގައި އަޅާ ފުޓުބޯޅަދަނޑަކާއި، ކުރީ ސަރުކާރުން ރަށުގައި ޖަހާފައި އޮތް ރިވެޓްމެންޓް ރަނގަޅު ކުރުމުގެ މަސައްކަތާއި، ދެރަށް ގުޅުވާލުމުގެ މަސައްކަތްވެސް ފެށިގެންދާނެ ކަމަށެވެ.

މިދިޔަ 2 އަހަރު، ދަތި ހާލުގައި 25ށް ވުރެ ގިނަ ބަނދަރު ނިންމައި، 34 ބަނދަރު މަސައްކަތް މިހާރުވެސް ކުރިއަށްދާ ކަމަށާއި، އެއަރޕޯޓެއް ނިންމައި 2 އެއަރޕޯޓެއްގެ މަސައްކަތް ކުރަމުން އަންނަކަމަށް އާޒިމް ވިދާޅުވިއެވެ. އެހެންކަމުން މި ސަރުކާރަކީ އިންތިޚާބެއް އަޔަސް ނަޔަސް މަޝްރޫއުތައް ހިންގާ ސަރުކާރެއް ކަމަށް އާޒިމް ވިދާޅުވިއެވެ.  

މިދިޔަ ދެ އަހަރު ރައްޔިތުންނަށް އިހުސާސް ނުވާ ވަރަށް ތަރައްގީގެ މަސައްކަތް ދިޔައީ ކުރިއަށް ކަމަށް ވިދާޅުވިއެވެ. ކިތަންމެ ބޮޑު ގޮންޖެހުމަކާއެކުވެސް އެމްޓީސީސީން ގެންދިޔައީ މަސައްކަތް ކުރަމުން ކަމަށާއި، ޕެންޑަމިކްގެ އެންމެ ދުވަހަކުވެސް މަސައްކަތް ހުއްޓާލާފައި ނޯންނާނެ ކަމަށް އާޒިމް ވިދާޅުވިއެވެ. ދަތި އުނދަގޫ ވުމަކީ ކަމެއް ހުއްޓާލުމެއް ނޫން، އެއީ ކަން ކުރުމަށް އިތުރު ބާރެއް ލައިގެން ކުރިއަށް ދިޔުން ކަމަށް އެމްޓީސީސީން ގަބޫލް ކުރާ ކަމަށް ވިދާޅުވިއެވެ.

އެމްޓީސީސީން މަސައްކަތް ކުރަނީ ހުރިހާ މަސައްކަތެއްވެސް ފުރިހަމަ ކަމާއެކު ކުރަން ކަމަށް އާޒިމް ވިދާޅުވިއެވެ. ރަށަކުން މަސައްކަތެއް ނިންމައި ފައިބައިގެންދާނީ، ރައްޔިތުން ހިތްހަމަޖައްސާފައި ކަމަށް ވިދާޅުވިއެވެ.

ކުރީ ސަރުކާރުތަކުން ބިން ހިއްކައި ނިންމާއިރު، އެތަނުގެ ބޭނުން ކުރަން އެތައް ދުވަހެއް ނެގި ނަމަވެސް، މިހާރު މި ސަރުކާރުން ހިންގާ އެފަދަ މަޝްރޫއުތައް ނިންމާއިރު، ވަގުތުން އެތަނުގެ މަންފާ ހޯދޭ ފެންވަރަށް އެމްޓީސީސީން މަސައްކަތް ނިންމާ ކަމަށް އާޒިމް ވިދާޅުވިއެވެ.

ރައްޔިތުން އަސާސި ޚިދުމަތް ބޭނުންވެފައިވާތާ އެތައް އަހަރެއް ވެފައިވާއިރު، މިއަދު ރައީސުލްޖުމްހޫރިއްޔާގެ ވިސްނުމަކީ، އެ ޚިދުމަތްތައް ފޯރުކޮށްދިނުން ކަމަށާއި އެމްޓީސީސީ ދެމި އޮންނާނީ ރައީސް އެދިވަޑައިގަންނަވާ ކަން ވަގުތަށް ނިންމުމަށް ކަމަށެވެ. ފައިސާގެ ދަތިކަމެއް މިއަދު އެކަމުގައި ނެތްކަމަށް އާޒިމް ފާހަގަކުރެއްވިއެވެ. ރައްޔިތުންނަށް ޚިދުމަތް ކޮށްދޭން ވެރިއަކު ހުރުމުން މިއަދު ސާބިތުވެ މިތިބީ ރައްޔިތުންނަށް ޚިދުމަތް ކޮށްދިނުމަށް ކަމަށް އާޒިމް ވިދާޅުވިއެވެ.