ނޯތު ހާބަރަށް ދިމާވެފައިވާ ޖާގައިގެ ދަތިކަމަށް ހައްލެއް ލިބިގެންދާނީ އިތުރު ސަރަހައްދެއްގައި ބަނދަރެއް ހެދިގެން ކަމަށް މޯލްޑިވްސް ޕޯޓްސް ލިމިޑެޓްގެ ސީއީއޯ ޝާހިދު ޢަލީ ވިދާޅުވެއްޖެއެވެ.

ރާއްޖެއެމްވީއަށް ދެއްވި ޚާއްސަ އިންޓަވިއުއެއްގައި ޝާހިދު ވިދާޅުވީ ނޯތު ހާބަރަށް ދިމާވެފައިވާ ޖާގައިގެ ދަތިކަމަކީ ޒަމާންތަކެއްވީ މައްސަލައެއް ކަމަށާއި، އެމައްސަލަ ހައްލު ކުރުމަށް މިވަގުތު ކުރެވޭނެ މަސައްކަތެއް ނެތް ކަމަށެވެ. އަދި ނޯތު ހާބަރުގެ ޖާގަ އިތުރު ކުރުމަށް ޖާގަ ނެތް ކަމަށް ވެސް ވިދާޅުވިއެވެ.

ޝާހިދު ވިދާޅުވީ މީހުން ދިރިއުޅޭ ހުރިހާ ރަށެއްގެ އޮޑިދޯނިފަހަރުތަކާއި، ބޯޓުތައް މުދާ ބަލާ އަންނަނީ މާލެއަށް ކަމަށްވާއިރު، ބޯޓުތައް ކައިރި ކުރުމަށް ނޯތު ހާބަރު ފިޔަވައި އިތުރު ބަނދަރެއް ނެތް ކަމަށެވެ. އެހެންކަމުން މިމައްސަލައަށް ހައްލު ގެނައުމަށް އެހެން ސަރަހައްދެއްގައި ބަނދަރެއް ހަދަން ޖެހޭ ކަމަށް ޝާހިދު ވިދާޅުވިއެވެ. އަދި ވިދާޅުވީ ދެތިން ހަތަރު ދުވަސްވަންދެން ދޯނިފަހަރުތައް ކިޔުގައި އޮންނަ ކަމަށެވެ. މިމައްސަލައަށް ކުޑަވެސް ހައްލެއް ގެނައުމުގައި އޮޑިވެރިންގެ އެއްބާރުލުން ބޭނުންވާ ކަމަށާއި، ބޯޓުފަހަރުތަކަށް މުދާބަރުކުރުން އަވަސް ކުރަންޖެހޭ ކަމަށް ޝާހިދު ވިދާޅުވިއެވެ.

ނޯތު ހާބަރަށް ދިމާވެފައިވާ ޖާގައިގެ ދަތިކަމަށް ދާއިމީ ހައްލެއް ގެނައުމަށް ކުރަމުންދާ މަސައްކަތަށް އަލިއަޅުއްވާލައްވާ ޝާހިދު ވިދާޅުވީ ގުޅީފަޅުގައި ގާއިމްކުރެވޭ ބައިނަލްއަގްވާމީ ބަނދަރާއެކު މައްސަލަ ހައްލުވާނެ ކަމަށެވެ. ގްރޭޓަރ މާލޭ ކަނެކްޓިވިޓީ ބްރިޖްގެ މަޝްރޫއުގެ ދަށުން މާލެ-ވިލިމާލެ-ގުޅިފަޅު އަދި ތިލަފުށި ގުޅާލުމާއެކު ރައްޔިތުންނަށް ވަރަށް ބޮޑު ލުއި ފަސޭހަކަމެއް ލިބޭނެ ކަމަށް ޝާހިދު ވިދާޅުވިއެވެ.

މިޕްރޮޖެކްޓާއެކު ގްރޭޓަރ މާލެ ސަރަޙައްދުން އެންމެ ބޮޑު ބަދަލެއް އަންނާނީ ގުޅީފަޅަށެވެ. ބޯހިޔާވަހިކަމުގެ މަޝްރޫއުތަކާއެކު، ވިޔަފާރީގެ ގޮތުން ވެސް ގުޅީފަޅުވެގެންދާނީ ސަރަޙައްދުގެ އިގްތިސާދީ މައި ހަބަށެވެ. މިބޮޑު މަންޒަރު ގުޅެނީ ގްރޭޓަރ މާލެ ކަނެކްވިޓީ ބްރިޖްގެ މަޝްރޫއާއެވެ. ގުޅީފަޅާއި ބްރިޖް ގުޅާލާ ސަރަހައްދު ހިމެނޭހެން 6 މިލިއަން ކިއުބިކް މީޓަރުގެ ސަރަޙައްދެއް ހިއްކުމުގެ މަސައްކަތް ނެދަލޭންޑްސްގެ ބޮސްކާލިސް ކުންފުންޏާ ހަވާލުކޮށްގެންވަނީ ކުރިއަށްގެންގޮސްފައެވެ.

ގުޅީފަޅު ތަރައްގީކުރުމުގެ އެންމެ ބޮޑު މަގުސަދަކީ މާލޭގެ ވިޔަފާރި ބަނދަރު ގުޅީފަޅަށް ބަދަލުކުރުމެވެ. މި މަސައްކަތް ކުރިއަށްގެންދިއުމަށް މިއަހަރުގެ ބަޖެޓުގައި 400 މިލިއަނަށްވުރެ ގިނަ ރުފިޔާ ހިމަނާފައިވެއެވެ.

ގުޅީފަޅުގައި ބައިނަލްއަގުވާމީ ވިޔަފާރި ބަނދަރެއް އެޅުމުގެ މަޝްރޫއަކީ މާލޭގެ ބަނދަރުތަކުގެ ޖާގައިގެ ދަތިކަމުގެ ސަބަބުން ޚިދުމަތް ހޯދާ މީހުންނަށް ދިމާވާ ދަތިތައް ހައްލު ކުރުމަށްޓަކައި ކުރިއަށް ގެންދިޔުމަށް ހަމަޖެހިފައިވާ ޕްރޮޖެކްޓެކެވެ. މިގޮތުން، ސަރުކާރުން ނިންމާފައިވަނީ 2023 ވަނަ އަހަރު ގުޅީފަޅު ޕޯރޓް ހުޅުވުމުން އެ ސަރަހައްދަށް މާލޭ ކޮމާރޝަލް ހާބަރު، ނޯތު ހާބަރު، އަދި ޓީ ޖެޓީ ސަރަހައްދުގެ ބައެއް ހިދުމަތްތަކާއި މަސައްކަތްތައް ބަދަލު ކުރުމަށެވެ.