އެއްބައިވަންތަކަން ނަގާލުމުގެ އުކުޅުތަކުގެ އެއްގޮތްކަން ހާދަހާ ބޮޑެވެ.
މުޖުތަމައުގެ އެކުވެރިކަން ނަގާލައި ބައިވައިވުން އުފެއްދުމަކީ މި ފަލްސަފާގެ އެންމެ މުހިއްމު ބައި
ޑުސަޑޯފުން 1919 ވަނަ އަހަރު ފެނުުނު ލިޔުމުގެ މައްޗަށް 1975 ގައި ނޫހެއްގައި ލިޔެފައިވާ ދިރާސާ ލިޔުމެއް
ދުނިޔޭގެ ފުރަތަމަ ބޮޑު ހަނގުރާމަ ނިމުނުތަނާހެން ޖަރުމަންވިލާތުގެ ޑުސެޑޯފޭ ކިޔުނު ރަށުން ކޮމިއުނިސްޓުންގެ ވަރަށް ސިއްރު ލިޔުމެއް ފެނުނެވެ. އެދުވަސްވަރަކީ ރަޝިޔާގެ އެތައްސަތޭކަ އަހަރުވީ ވަރުގަދަ ރަސްކަން ވައްޓާލައި ކޮމިއުނިސްޓް އިންގިލާބެެއް ގެނެސް އެ އިންގިލާބުގެ މޫތައް ދުނިޔޭގެ އެކިކަންކޮޅުތަކަށް ފެތުރުމަށް ގަދައަޅައި މަސައްކަތްކުރި ޒަމާނެވެ. ކޮމިއުނިޒަމުގެ ޅަފަތުގެ ޒަމާނެވެ. މުޅި ދުނިޔެ އިންގިލާބު ކުރުމަށް ކޮމިއުނިސްޓުން ބަލައިގަތް ފަލްސަފާ އޮތީ މިދެންނެވި ލިޔުމުގައި ވަރަށް ސާފުކޮށް ނަލަކޮށް ބަޔާންކުރެވިފައެވެ. އެ ލިޔުން ހާމަވެ އިންގިލާބީ ފިކުރުގެ ސިއްރުތައް ބޭޒާރުވެގެންދިޔަތާ ސަތޭކަ އަހަރުވީއެވެ.
ކުރިން ބަޔާންކުރެވުނު ލިޔުމާއި ފަލްސަފާޔަށް އެއްގަރުނަށްވުރެ ގިނަ ދުވަސްވެއްޖެއެވެ. އެކަމަކު އޭގައި ހުރި ނުގުތާތަކަށް ވަކިވަކިން ބަލާއިރު ދިވެހިރާއްޖެވެސް ހިމެނޭގޮތުން އެކި ގައުމުތަކުގައި މިއަދު ހިނގަމުންދާ ކަންކަމާއި އާއްމުގޮތެއްގައި ފިކުރުތައް ބައްޓަން ކުރެވޭ ހަމަޔަށް ވިސްނައިލީމާ ހުރިހާ ކަމެއްވެސް ތަރުތީބުވެގެން މިއަންނަނީ ކޮމިއުނިސްޓް އިންގިލާބީ ފަލްސަފާ ކާމިޔާބުކުރުމުގެ ރޭވުންތަކުގައި ބަޔާންކުރާ ނުގުތާތަކުގެ މަތީގައޭ ހީކުރެވެއެވެ. އެހާވެސް އެއްގޮތްކަން ބޮޑެވެ. އެހެންވީމާ އޭގައިހުރީ ކޮން ވާހަކަތަކެއްތޯ ބަޔާންކުޅައުމަށް ގަސްތުކުރީއެވެ. ކަންކަން ހިނގަނީ އެ ފަލްސަފާގެ ދަށުންނޭ ދަންނަވަނީއެއް ނޫނެވެ. އެއްގޮތްކަން އެބަހުއްޓޭ ހިތަށް އަރަނީއެވެ.
ޖުމްލަ އަށެއްކަ ނުގުތާގެ މައްޗަށް އެކުލެވިގެންވާ މި ލިޔުމުގައި ބުނެއެވެ. ސަރުކާރާއި ވެރީންނާމެދު ވިސްނައި ފިކުރުކުރަން ރައްޔިތުންނަށް ފުރުސަތުދީގެން ނުވާނެއެވެ. ރައްޔިތުން ބައިތިއްބަންވާނީ ދުނިޔަވީ އުފަލާއި ކުޅިވަރުގެ މައްޗަށް އާފިލުކަމުގެ ނިންޖެއްގެ ތެރޭގައެވެ. ލަވަޔާއި މިއުޒިކާއި ކުޅިވަރާއި ޝަހުވަތްތެރިކަމުގެ ދުނިޔެއެއްގައެވެ. މައްސަލަޔަކަށް ނުވާ އާދައިގެ ކަންކަންވެސް ބޮޑުކޮށް ރައްޔިތުން ތިބެންވާނީ ވާނުވާގައެވެ. އެއްބަޔަކު އަނެއްބަޔަކާ މުޑިއަރައި ކުރިއަށް ނުދެވޭ ހާލަތުގައެވެ. ރައްޔިތުންގެ މެދުގައި އެކުވެރިކަމާއި އެއްބައިވަންތަކަން އެއްގޮތަކަށްވެސް އޮތަދީގެން ނުވާނެއެވެ. އެކަން އޮތީ އެހެންކަން ކަށަވަރުވެސް ކުރަންވާނެއެވެ.
ރައްޔިތުންގެ ތެރެއިން ކަންކަމާމެދު ވިސްނައި ފިކުރުކޮށްހަދާ އަދި ރައްޔިތުންނަށް ހެޔޮގޮތް ބުނެދޭ މީހުން ފާހަގަކޮށް އެމީހުންގެ އަގާއި ހުރުމަތް ވެއްޔާއި މޮޑެލަންވާނެއެވެ. ރައްޔިތުންގެ ގަދަރާއި އިހުތިރާމާއި އިތުބާރު ލިބިގެންވާ މީހަކު ހުރެގެން ނުވާނެއެވެ. މިކަންކުރުމަށްޓަކައި ކޮންމެވެސް ބަޔަކު އަބަދުވެސް އެމީހުންނާ ފާކޮށްފައި ބައިތިއްބަންވާނެއެވެ. ވަކާލާތު ކުރަންވާނީ ޑިމޮކްރަސީއަށެވެ. ދައްކާންވާނީ ރައްޔިތުންގެ ހައްގުތައް ކަށަވަރުކޮށްދިނުމުގެ ވާހަކައެވެ. އެކަމަކު ވެރިކަން ލިބިގަތުމާއި އެވެރިކަން ދެމެހެއްޓުމަށްޓަކައި އަމަލުތައް ބައްޓަންކުރަންވާނީ ބަހާއި އިދިކޮޅަށެވެ. ވެރިކަމަށްޓަކައި ގުރުބާން ނުކުރެވޭ ހަމައެއްވެސް އެއްޗެއް އޮވެގެން ނުވާނެއެވެ.
ސަރުކާރުގެ ބޭކާރު ޚަރަދުތައް އިތުރުކުރަން ގަދައަޅަންވާނެއެވެ. ހިތްވަރުދޭން ވާނެއެވެ. ލޭންދޭނަށް ތަކެތި ލިބުމުގެ ދޮރު ރައްޔިތުންނަށް ހަނިކުރާން ވާނެއެވެ. ފައިސާގެ އަގުވެއްޓި ތަކެތީގެ އަގު އަތްނުފޯރާފަށަށް އެރުމުގެ ބިރުވެރިކަން ދަމަހައްޓަންވާނެއެވެ. އިގްތިސާދީ ހާލަތާމެދު ރުހޭ މީހަކު ހުރެގެންނުވާނެއެވެ. ބޮޑެތި ސިނާއަތްތަކުގައި މަސައްކަތް ކުރާ މީހުން ހަޅުތާލަށް ނެރެންވާނެއެވެ. އެއްވެސް ސިނާއަތެއްގައި ހަމަޖެހުން އޮވެގެން ނުވާނެއެވެ. ރައްޔިތުން ބައިތިއްބަންވާނީ ބަސްނޭހުމާއި ނުކިޔަމަންތެރިކަން ފާޅުކުރުމުގެ ވެއްޓެއްގައެވެ. މާތުރަ، އެޒާތުގެ ކަންކަން މައިތިރިކުރަން ހަރުކަށިކަން ކުރިއަށް ނެރުމެއް ނެތެވެ. މިކަމުގައި ކުޅެންޖެހޭނީ ތަމްސީލެވެ.
ރައްޔިތުން އެެއްބައިކުރުވާ ހުރިހާ އުސޫލުތަކާ ފޭއަށް ޖެއްސުމަށް ކުރެވެންހުރި އެންމެހައި ކަންކަން ކުރާންވާނެއެވެ. ގައުމިއްޔަތުގެ ވާހަކަ ދައްކާންވާނެއެވެ. އެކަމަކު ގައުމިއްޔަތަށް ތަބާވިޔަދީގެން ނުވާނެއެވެ. ދީނާއި އާޚިރަތުގެ ވާހަކަވެސް ދައްކާންވާނެއެވެ. އެކަމަކު އެމަގު އިޚުތިޔާރު ކުރުމުގެ ފުރުސަތު ފަހިކޮށްދީގެން ނުވާނެއެވެ. ގައުމުދެކެ ލޯބިވާންޖެހޭ ވާހަކަ ބުނާންވާނެއެވެ. އެކަމަކު ގައުމުދެކެ ލޯބިވުމަކީ ކޮބައިކަން ނޭނގޭ މިންވަރަށް މީސްތަކުން އޮޅުން ބޮޅުން ކުރާންވާނެއެވެ. ކުރީޒަމާނުން ފެށިގެން މީސްތަކުން ތަބާވަމުން އައި ހަރުދަނާ އުސޫލުތަކަކީ ޒަމާނަށް ނުފެތޭ ބޯދާ އެއްޗަކަށް ހަދައި އެފަދަ ކަންކަމަށް މީސްތަކުން އެލާޖިކް ކުރާންވާނެއެވެ.
