ކުޑަކުދިން ގްރޫމްކޮށްގެން ކުށްކުރުވާ މައްސަލަތައް ހުރީ ހީކުރާ ވަރަށްވުރެ މަތީގައި ކަމަށް ސަބް އިންސްޕެކްޓަރ އޮފް ޕޮލިސް އަހުމަދު ފާރިޝް ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ކުށުގެވެށިން ކުދިން ސަލާމަތްކުރުމާއި ގުޅޭގޮތުން ވާހަކަ ދައްކަވަމުން ފާރިޝް ވިދާޅުވީ ކުށުގެ މާހައުލުގައި ކުޑަކުދިން ގެންގުޅުމާއި ކުޑަކުދިން ބޭނުންކޮށްގެން އެކި ބާވަތްތަކުގެ ކުށްކުރުން ކުރިޔާ އަޅާބަލާއިރު މިހާރު އިތުރުވެފައިވާކަމަށެވެ. އަދި ބޮޑެތި މީހުން ހިންގާ ކުށްކުށުގައި ކުޑަކުދިން ބައިވެރިކުރުމަކީ ސީރިޔަސް މައްސަލައެއްކަމަށް ފާރިޝް ވިދާޅުވިއެވެ.
އާންމުގޮތެއްގައި މިކަމުގައި ފާހަގަވަނީ އަތޮޅުތެރޭގައި އުޅޭ ކުދިންނަށް ރަނގަޅު ގޮތެއް ހޯދައިދޭނެކަމެއް ބުނެ މާލެގެނެސްގެން އެކުދިން ބޭނުންކޮށްގެން ކުށްކުރާކުުރުން ކަމަށް ފާރިޝް ވިދާޅުވިއެވެ. އަދި އެގޮތަށް ކުދިން މާލެ ގެންނައިރު ގެންނަނީ ކުއްޖާގެ މައިންބަފައިންނަށްވެސް އެނގިގެންކަމަށް ފާރިޝް ވިދާޅުވިއެވެ. އަދި ބައެއް ފަހަރު އާއިލާގެ ތެރެއިން ކޮންމެވެސް މީހަކާއި ގުޅިގެންވެސް ކުދިން ގެނެސްފައި އެބަހުރިކަމަށް ފާރިޝް ވިދާޅުވިއެވެ.
މައިންބަފައިންނަށް ކުދިން ގެންނަ ފަރާތްތަކުން ދައްކަނީ މުޅިން އެހެން މަންޒަރެއް. މައިންބަފައިންނަށް ދައްކާ މަންޒަރަކީ ކުދިންނަށް ރަނގަޅު ގޮތެއް ހޯދައިދޭނެކަމަށް، ކުދިން ސްކޫލަށް ފޮނުވާ ނުވަތަ ކުދިންނަށް ރަނގަޅު ތައުލީމެއްދޭނެ ކަމަށް ބުނެ ގެންނަނީ. އެގޮތަށް ކުދިން ގެންނަ ގެނައުމުގައި މައިންބަފައިންގެވެސް ކޮންމެވެސް ވަރެއްގެ ރުހުމެއް އޮވެގެން ގެންނަނީ. ގެނެސްފައި ކުށްކުށް ކުރުވަނީ. ބައެއް ފަހަރު އެބަހުރި އާއިލާގެ ތެރެއިން ގުޅިގެންވެސް ނޫނީ ކޮންމެވެސް އެހެން ގޮތަކަށް ދިމާވެގެން ކުއްޖާގެ މައިންބަފައިންނާ ދިމާވެ ދެކެވޭ ވާހަކައިގެ ތެރެއިންވެސް ގެނެސްފައި.އަހުމަދު ފާރިޝް /ސަބް އިންސްޕެކްޓަރ އޮފް ޕޮލިސް
ފާރިޝް ވިދާޅުވީ ޖިނާއީ ކުށްތަކުގައި ކުދިން ބައިވެރިކޮށްގެން އެކަންކަން ކުރުވާ ފަރާތްތަކުން ކުދިންނަށް ވިސްނައިދީފައި އޮންނަނީ އެކުށްތައް ކުރުމަކުން އަދި ކުއްޖާ ކުށްވެރިވަނީ ނޫންކަމުގައި ކަމަށެވެ. ކުށްކުރާ ހިސާބުން ނުވަތަ ކުށުގެ ތުހުމަތުގައި ކުއްޖާ ފުލުހުންގެ ބެލުމުގެ ދަށަށް ގެންނަ ހިސާބުން ނުވަތަ މުއްދަތު ޖަހަން ކޯޓަށް ގެންގޮސް ބަންދުގެ މުއްދަތު ދަމަހައްޓާ ހިސާބުންވެސް ކުއްޖާއަށް އެއީ ކުށްވެރިއެއް ނޫންކަމަށް ބަޔަކު ވިސްނައިދޭކަމަށް ފާރިޝް ވިދާޅުވިއެވެ.
ކުއްޖާ ކުށުގެ މާހައުލުގެ ތެރެއަށް އެންމެ ފުރަތަމަވެސް ވައްދަނީ އެވިސްނުވުމުގެ ތެރެއިން ކުއްޖާ ގްރޫމްކޮށްގެން ކަމަށް ފާރިޝް ވިދާޅުވިއެވެ. އަދި ކުދިން ގްރޫމްކޮށްގެން ހިންގާ މިފަދަ ކުށްތައް ހުއްޓުވުމަށް މައިންބަފައިންނާއި މުޖުތަމައުގައި އުޅޭ އެހެން މީހުންނަށްވެސް މަސައްކަތްތަކެއް ކުރެވޭނެކަމަށް ފާރިޝް ވިދާޅުވިއެވެ.
ކުއްޖާގެ އުޅުމަށް އަންނަ ބަދަލުތަކަށް ބެލެނިވެރިން ސަމާލުކަންދިނުމަކީވެސް ކުށުގެ ވެށިން ކުއްޖާ ސަލާމަތްކުރުމަށް މުހިންމު ކަމެއްކަމަށް ފާރިޝް ވިދާޅުވިއެވެ.
