ޖުމްހޫރީ މައިދާނުގެ ވިނަގަނޑު ބެލެހެއްޓުމަށް އެއްވެސް ބާވަތެއްގެ ކެމިކަލްއެއް ބޭނުމެއް ނުކުރަން: މާލެސިޓީ ކައުންސިލް
12 ޖެނުއަރީ 2022 | ބުދަ 18:20އެތަނަށް އަޅައިފައި ހުންނާނީ ކެމިކަލް ބޭސް ކަމަށް ނަރީޝް ވިދާޅުވި
ޖުމްހޫރީ މައިދާނުގައި ކުޑަކުދިން ބެެލެނެވެރިންނާއެކު ކޮތަރު ބަލަން އައިސް އުފާވެރި ވަގުތުކޮޅެއް ހޭދަކޮށްލަނީ
ޖުމްހޫރީ މައިދާނުގެ ވިނަ ގަނޑު ބެލެހެއްޓުމަށް އެއްވެސް ބާވަތެއްގެ ކެމިކަލްއެއް ބޭނުން ނުކުރާ ކަމަށް މާލެސިޓީ ކައުންސިލުން ބުނެފިއެވެ.
މާލޭސިޓީ ކައުންސިލުން މިހެން ބުނެފައިމިވަނީ ކައުންސިލުގެ ޑެޕިއުޓީ މޭޔަރު އަހްމަދު ނަރީޝްއާ ހަވާލާދީ، އެ ވިނަތަކަށް ޓްރީޓްމެންޓު ދެމުންދާ ކަމަށް މީޑިއާތަކުގައި ރިޕޯޓުކޮށްފައިވަނިކޮށްށެވެ. ނަރީޝް ވިދާޅުވީ އެތަނަށް އަޅައިފައި ހުންނާނީ ކެމިކަލް ބޭސް ކަމަށާއި ކޮތަރުތައް އެ ތަނަށް ގާތްވުން ސިޓީ ކައުންސިލަށް ނުހުއްޓުވޭނެ ކަމަށެވެ. އަދި ދެ އަހަރު ވަންދެން ވިނަގަނޑަށް އަޅައިނުލައި ދޫކޮށްލައިފައި އޮތުމުން ޓްރީޓް ކުރުމަށް ބޮޑު ހޭދައެއް ކުރަން ޖެހިފައިވާ ކަމަށް ވެސް ނަރީޝް ވިދާޅުވިއެވެ.
އެކަމާއި ގުޅިގެން ގިނަ ބައެއްގެ ފާޑު ކިޔުން މާލެސިޓީ ކައުންސިލަށް އަމާޒުވެފައިވަނިކޮށް، ކައުންސިލުން ބުނީ ޖުމްހޫރީ މައިދާނުގެ ވިނަގަނޑު ބެލެހެއްޓުމަށް އެއްވެސް ބާވަތެއްގެ ކެމިކަލެއް ބޭނުން ނުކުރާ ކަމަށާއި، ވިނަތައް ބެލެހެއްޓުމަށް ފެންޖެހުން ފިޔަވާ އިތުރު ކަމެއް ނުކުރާ ކަމަށެވެ.
ޒަމާނުއްސުރެ ޖުމްހޫރީ މައިދާނަށް ވަރަށް ގިނަ ކޮތަރު އެއްވެއެވެ. އެ ކޮތަރުތަކަށް ކާން ދިނުމަށް އެސަރަހައްދަށް ގިނަ އަދަދެއްގެ ކުޑަކުދިންނާއި، އާއްމުން ގޮސް އުޅެއެވެ. ނަމަވެސް މިފަހުން ކޮތަރުތަކަށް ގޮތް ނޭނގޭ ބައްޔެއް ވަނީ ޖެހިފައެވެ. މުޅި އެސަރަހައްދުގައި އުދުހޭ ކޮތަރުތަކަށް ގޮތް ނޭނގޭ ބައްޔެއް ޖެހުމާއެކު، ކޮތަރުތަކުގެ ވަރު ދެރަވެފައިވާކަން ވަނީ ފާހަގަކުރެވިފައެވެ. ބައެއް ކޮތަރުތައް އެއްވެސް ވަރަކަށް އުދުހިއެއް ނުގަނެވެއެވެ.
ކޮތަރުތަކުގެ ފޮޓޯތައް ވަނީ ސޯޝަލް މީޑިއާގައި އާއްމުވެފައެވެ. އެ ބަލީގެ ސަބަބުން ކޮތަރުތަކުގެ ލޮލާއި ތުންގަނޑު ކައިރީގައި ވަރަށް ގިނަ އުން ނަގާފައިވެެއެވެ. އަދި ބައެއް ކޮތަރުތަކުގެ ލޯ ކައިރީގައި ބޮޑެތި އުންތަކެއް ނަގާފައި ހުރުމުން އެ އެއްޗެހީ ލޯ ވެސް ވަނީ ފޮރުވިފަ އެވެ. އެއީ ކޮން ބައްޔެއްކަން ދެނެގަނެވިފައިނުވި ނަމަވެސް ބޮޑަށް ބެލެވެނީ "ޕިޖަން ޕޮކްސް" ނަމަކަށް ކިޔާ ބައްޔަކާ ކަމަށެވެ. މިބަލީގެ ނުރައްކަލެއް އިންސާނުންނަކަށް ނެތެވެ. ނަމަވެސް ދޫނިތަކުގެ ގައިންގަޔަށް ވަރަށް އަވަހަށް މިބަލި އަރައެވެ.
މިމައްސަލައާ ގުޅިގެން އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)އިން ބުނީ ކޮތަރުތަކަށް ޖެހިފައި ވަނީ ކޮން ބައްޔެއްތޯ ބަލަމުންދާ ކަމަށެވެ.
