އެވަޓަނަށް ކުޅެމުން އަންނަ ފްރާންސްގެ ޑިފެންޑަރު ލޫކަސް ޑީނިއޭ އެސްޓަން ވިލާއަށް ބަދަލުވާން އެއްބަސްވެފައިވާ ކަމަށް ރިޕޯޓުތައް ބުނެފިއެވެ.
އިނގިރޭސި މީޑިއާ ރިޕޯޓުތައް ބުނާ ގޮތުން އެވަޓަނުން މިހާރު ވަނީ އުމުރުން 28 އަހަރުގެ ޑީނިއޭ ވިލާއަށް ވިއްކާލުމަށް އެއްބަސްވެފައެވެ. އަދި އެވަޓަނުން އޭނާ ވިލާއަށް ވިއްކާނީ 25 މިލިޔަން ޕައުންޑުގެ ފީއަކަށް ކަމަށްވެސް ވަނީ ރިޕޯޓުކޮށްފައެވެ.
ޑީނިއޭ އެވަޓަން ދޫކޮށްލާއިރު، އޭނާ އެ ޓީމާ ގުޅުނީ ބާސެލޯނާ ދޫކޮށް 2018 ވަނަ އަހަރު 18 މިލިޔަން ޕައުންޑުގެ ފީއަކަށެވެ. އެ ފަހަރު ޑީނިއޭ އެވަޓަނާއެކު ފަސް އަހަރުގެ އެއްބަސްވުމެއް ހެދިއިރު، މިދިޔަ އަހަރުގެ ފެބްރުއަރީ މަހު އޭނާ ވަނީ 2025 ވަނަ އަހަރުގެ ޖޫން މަހުގެ ނިޔަލަށް އެއްބަސްވުން އާކޮށްފައެވެ. އެހެންކަމުން އެ އެއްބަސްވުމުގެ މުއްދަތު ހަމަވަން ތިން އަހަރާ ބައި އަދި އެބައޮތެވެ.
އެކަމަކު މިދިޔަ ހަފުތާގައި އެވަޓަނުގެ ކޯޗު ރަފައެލް ބެނިޓޭޒް ވަނީ އެވަޓަނުގައި ޑީނިއޭ ހުރީ އުފަލުން ނޫން ކަމަށާއި، އެއާއެކު އެ ޓީމު ދޫކޮށްލަން އޭނާ ބޭނުންވާކަމަށް ބުނެފައެވެ. އެވަޓަން ދޫކޮށް ޑީނިއޭ ވިލާއާ ގުޅޭއިރު، އޭނާ ހޯދަން ނާޕޮލީ އާއި، ނިއުކާސަލް ޔުނައިޓެޑާއި، ޗެލްސީ އަދި ވެސްޓް ހޭމް ޔުނައިޓެޑުންވެސް މަސައްކަތްކޮށްފައިވާ ކަމަށް ރިޕޯޓުތައް ބުނެއެވެ.
މީގެ ކުރިން ފްރާންސްގެ ލިލް އާއި ޕީއެސްޖީއަށްވެސް ކުޅުނު ޑީނިއޭ އެންމެ ބޮޑަށް ވިދާލީ ބާސާއިންނެވެ. އެގޮތުން ބާސާގައި ހޭދަކުރި ދެ ސީޒަނުގައި ޑީނިއޭ ވަނީ އެ ޓީމާއެކު ސްޕެނިޝް ލީގާއި، ސްޕެނިޝް ކަޕް އަދި ސްޕެނިޝް ސުޕަ ކަޕް ކާމިޔާބުކޮށްފައެވެ. އަދި އޭގެ ފަހުން އެވަޓަނަށް ބަދަލުވެ ޑީނިއޭ ވަނީ އެ ޓީމަށް ކުޅެދިން 125 މެޗުގައި ހަ ލަނޑު ޖަހާފައެވެ.
ސްޓީވެން ޖެރާޑުގެ އިރުޝާދުގެ ދަށުން ކުޅެމުން އަންނަ ވިލާއިން ޑީނިއޭގެ ސޮއި ހޯދިއިރު، އެ ޓީމުން ދާދި ފަހުން ވަނީ ލޯނު އެއްބަސްވުމެއްގެ ދަށުން ބާސާއަށް ކުޅެމުން އައި ބްރެޒިލުގެ މިޑްފީލްޑަރު ފިލިއްޕޭ ކުޓީނިއޯގެ ސޮއިވެސް ހޯދާފައެވެ. ރިޕޯޓުތައް ބުނާ ގޮތުން ހަ މަސް ދުވަހުގެ ލޯނު އެއްބަސްވުމެއްގައި ކުޓީނިއޯ ވިލާއަށް ބަދަލުވީ އެ ޓީމުގެ ކޯޗު ޖެރާޑުގެ އެދުމަށެވެ.
