މިސީޒަންގެ ޕްރިމިއަރ ލީގުގައި ކޮޅަށް ގޯލެއް ނުވަދެ ނިންމާލި ފުރަތަމަ މެޗާއެކު ބްރައިޓަން ލީގު ތާވަލްގެ ހަތް ވަނަ އަށް ޖެހިލައިފި އެވެ.
ބްރައިޓަން ހަތް ވަނަ އަށް ޖެހިލީ ވެސްޓް ހޭމް އަތުން ޕޮއިންޓެއް ހޯދައިގެންނެވެ. މިސީޒަންގައި ރަނގަޅު ނަތީޖާތަކެއް ހޯދާ, ލީގު ތާވަލްގައި ރަނގަޅު ހިސާބެއްގައި ހިފަހައްޓަމުން އަންނަ ދެޓީމް ވާދަކުރި މެޗު އެއްވަރުވީ ލަނޑެއް ނުޖެހިއެވެ. މިނަތީޖާއާއެކު ބްރައިޓަން ހަތް ވަނާގައި އޮތީ މެންޗެސްޓަރ ޔުނައިޓެޑާ އެއް އަދަދަކަށް ޕޮއިންޓް ހޯދާ, ގޯލްގެ ތަފާތުން ކުރި ހޯދައިގެންނެވެ. ބްރައިޓަންގެ ކުރީގައި ހަ ވަނާގައި އޮތީ ތިން ޕޮއިންޓްގެ ލީޑަކާއެކު ވެސްޓް ހޭމް އެވެ. މިސީޒަންގައި ވެސްޓް ހޭމްގެ އަމާޒަކީވެސް ގަދަ ހައެއްގެ ތެރޭގައި ލީގު ނިންމާލުމެވެ.
މެޗަށްފަހު ބްރައިޓަންގެ ކޯޗު ޑި ޒާބީ ބުނީ ޓީމުން ދެއްކި ކުޅުމާއި, ޚާއްޞަކޮށް ކޮޅަށް ލަނޑެއް ނުވަދެ ނިންމާލެވުމުން ހިތްހަމަޖެހޭ ކަމަށެވެ. އޭނާ ބުނީ މެޗުން މޮޅުވުން ހައްގު ކަމަށާއި, ވެސްޓް ހޭމްގެ އެންމެ ނުރައްކާތެރި ހަތިޔާރު ކަމަށްވާ ކައުންޓަރ އެޓޭކްތައް ވެސް މެޗުގައި ހުއްޓުވުނު ކަމަށެވެ. އެއާއެކު ލަނޑުޖަހާނެ ރަނގަޅު އަށް ފުުޞަތެއް ތަނަވަސްކުރެވުނު ކަންވެސް ފާހަގަކުރިއެވެ.
