އަލަމާ ދޯނީގެ ކެޕްޓަން ހޯދުމަށް ހިންގި އެކްޓިވް ސަރޗް ނިންމާލައިފި
މިހާރު ހިންގަމުންދަނީ ސަރފޭސް ސަރޗެއް
ގެއްލިގެން ހޯދަމުންދާ އަލަމާ ދޯނީގެ ކެޕްޓަން އާދަމް ޝަފީގް
އަލަމާ-05 ދޯނީގެ ކެޕްޓަން ހޯދުމަށް ހިންގި އެކްޓިވް ސަރޗް ނިންމާލާފައިވާކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
ފ.ފީއަލީން ފުރައިގެން މާލެއަށް ދަތުރުކުރި އަލަމާ-05 ދޯނި ޖެނުއަރީ 3 ވަނަދުވަހުގެ 22:50 ހާއިރު ވ.ފުސްފަރު ހުޅަނގުން އަޑިއަށް ގޮސް ތިން މީހުން ވަނީ ކަނޑުވެފައެވެ. ކޯސްޓްގާޑުން ވަނީ ކަނޑާއި ވައިގެމަގުން އެމީހުން ހޯދުމުގެ މަސައްކަތް ކޮށްފައެވެ.
އެމީހުން ހޯދަން ކުރެވުނު މަސައްކަތުން ޖެނުއަރީ 5 ވަނަ ދުވަހުގެ ހެނދުނު 06:50 ހާއިރު އެ ދޯނިން ދަތުރުކުރި ދެ ފަޅުވެރިން ހޯދިފައިވާކަމަށް އެމްއެންޑީއެފުން ބުނެފައިވެއެވެ. އެހެންނަމަވެސް ދޯނީގެ ކެޕްޓަން ނުފެންނާތީ ކޯސްޓްގާޑުން ވަނީ ދޯނީގެ ކެޕްޓަން ހޯދުމުގެ މަސައްކަތް ހުއްޓުމެއްނެތި ކޮށްފައެވެ. އެއީ ކ. ގުރައިދޫ/ނަލަވާ 32 އަހަރުގެ އާދަމް ޝަފީގެވެ.
އޭނާ ހޯދުމަށް ކަނޑާއި ވައިގެ މަގުންް 7299.78 މޭލުގެ ބޮޑު ސަރަހައްދެއް ވަނީ ބަލާފައެވެ. މީހުން ހޯދުމަށް ދޯނީގެ ވެރިފަރާތުގެ އިތުރުން މި ސަރަހައްދުގެ ރަށު ކައުންސިލް އިދާރާތަކާއި، ރިސޯޓްތަކާއި، ދިވެހި ފުލުހުންގެ ޚިދުމަތް އަދި ރާއްޖޭގެ ފްލައިޓް އޮޕަރޭޓްކުރާ ފަރާތްތަކުގެ އެހީތެރިކަން އެމްއެންޑީއެފުން ވަނީ ހޯދާފައެެވެ.
އެމްއެންޑީއެފުން ބުނީ އަލަމާ-05 ދޯނީގެ ކެޕްޓަން ހޯދުމުގެ ސަރޗް އެންޑް ރެސްކިޔު އޮޕަރޭޝަންގައި ޒަމާނީ ވަސީލަތްތައް ބޭނުންކޮށްފައިވާކަމަށެވެ. އެހެންނަމަވެސް ކޯސްޓްގާޑާއި އާންމު ފަރާތްތަކާ ގުޅިގެން ހޯދަމުންދިޔަ ދޯނީގެ ކެޕްޓަންގެ އެއްވެސް ނިޝާނެއް މިހާތަނަށް ފެނިފައި ނުވާތީ، މި އޮޕަރޭޝަންގެ އެކްޓިވް ސަރޗް ޖެނުއަރީ 8 ވަނަ ދުވަހުގެ ރެއާ ހިސާބަށް ނިންމާލާފައިވާކަމަށް އެމްއެންޑީއެފުން ވަނީ ބުނެފައެވެ.
އަދި މި އޮޕަރޭޝަން ސަރފޭސް ސަރޗަކަށް ބަދަލުކޮށްފައިވާކަމަށް އެމްއެންޑީއެފުން ވަނީ ބުނެފައެވެ. އެހެންކަމުން ހޯދަމުންދާ ކެޕްޓަންގެ އިތުރު މައުލޫމާތެއް ނުވަތަ ނިޝާނެއް ފެނިއްޖެނަމަ ކޯސްޓްގާޑާ އެކަން ހިއްސާކޮށްދިނުމަށް ވަނީ އެދިފައެވެ.
