ރަސްމާދޫ ބަނދަރު ނިމުމާއެކު އެންމެބޮޑު ފައިދާއެއްވާނީ އިގްތިސާދީ ގޮތުން: ކައުންސިލް

ރ. ރަސްމާދޫގެ ބަނދަރު ހަދާނިމުމާއެކު އެރަށަށް އެންމެ ފައިދާވާނީ އިޤްތިޞާދީ ގޮތުންކަމަށް އެރަށުގެ ކައުންސިލުން ބުނެފިއެވެ.

ރަސްމާދޫ ކައުންސިލްގެ ރައީސް މުޙައްމަދު އާސިފް ރާއްޖެއެމްވީއަށް ވިދާޅުވީ މި ބަނދަރު ނިމުމާއެކު އެރަށަށް އެންމެ ބޮޑަށް ފައިދާވާނީ އިޤްތިޞާދީ ގޮތުން ކަމަށެވެ. އެއީ އެރަށް ކައިރީގައި ގިނަ ރިސޯތުތަކެއް ހުރުމުން އެރިސޯޓުތަކަށް ގެންނަ މުދާތައް އެރަށުގެ ބަނދަރަށް ބޭލޭނެތީއެވެ. ހަމައެހެންމެ ލޯކަލް ޓޫރިޒަމަށް ބަލާއިރުވެސް ރަނގަޅު ފެންވަރެއްގެ ބަނދަރެއް ހެދިފައި އޮތުމުން ގިނަ ފައިދާތަކެއް ކުރާނެކަމަށް އާސިފް ވިދާޅުވިއެވެ.

ރަސްމާދޫ ކައުންސިލުން ލަފާކުރާ ގޮތުގައި ބަނދަރުގެ މަސައްކަތް ނިމޭނީ މިއަހަރުގެ މާޗު މަހުގައެވެ.

ރަސްމާދޫ ބަނދަރު ތަރައްޤީ ކުރުމުގެ މަޝްރޫއުގެ މަސައްކަތުގެ 75 އިންސައްތަ މިހާރު ނިމިފައިވާކަމަށް އެމަސައްކަތްކުރާ އެމްޓީސީސީން ވަނީ ބުނެފައެވެ. އެމްޓީސީސީން ބުނީ ބަނދަރުގެ 75 އިންސައްތަ މަސައްކަތް ނިމިފައި ވާއިރު، އެއްގަމު ތޮށިލުމަށް ބޭނުންވާ ކޮންކްރީޓް ގަލުގެ ފުރަތަމަ ބާރޖް 9 ޖެނުއަރީ 2022 ވަނަ ދުވަހު ވަނީ ޕްރޮޖެކްޓް ސައިޓަށް ގެންދެވިފައި ކަމަށެވެ.

މި މަޝްރޫއުގެ ދަށުން، 8،100 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 377 މީޓަރުގެ ސަރަހައްދެއްގައި ބޭރުތޮށި ލުމާއި، 600 އަކަ މީޓަރުގެ ސަރަހައްދެއްގައި ޕޭވްމަންޓް ހެދުން ހިމެނެއެވެ. އަދި ނެރުބައްތި ހަރުކުރުމާއި މަގުބައްތި ހަރުކުރުމުގެ މަސައްކަތްވެސް މި މަޝްރޫއުގެ ތެރޭގައި ހިމެނެއެވެ.

މި މަޝްރޫއަކީ 28.1 މިލިއަން ރުފިޔާގެ މަޝްރޫއެކެވެ.