އިދިކޮޅު ޕީޕީއެމް/ޕީއެންސީ ކޯލިޝަނުން ކުރިއަށް ގެންދިޔަ މުޒާހަރާގެ ތެރެއިން ހައްޔަރު ކުރި ދެމީހުން ޝަރުތުތަކާއެކު ކްރިމިނަލް ކޯޓުން ދޫކޮށްލައިފިއެވެ.

އިންޑިއާ އައުޓް ކެމްޕޭން ހުކުރު ދުވަހު ހަވީރު ކުރިއަށް ގެންގޮސްފައިވާއިރު މި މުޒާހަރާގެ ތެރެއިން 29 މީހުން ފުލުހުންގެ ބެލުމުގެ ދަށަށް ގެންދިޔައެވެ. އޭގެ ތެރެއިން ދެ މީހުން ފިޔަވައި އެންމެން ވެސް ހުކުރު ދުވަހުގެ ރޭގެ ވަގުތެއްގައި ވަނީ ދޫކޮށްލާފައެވެ.

ފުލުހުން ބުނީ އެދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، ޝަރުތުތަކަށްފަހު ހޮނިހިރު ދުވަހު ދޫކޮށްލާފައިވާ ކަމަށެވެ. ބަންދުގައި ތިބި ދެ މީހުންގެ ތެރެއިން އެކަކަކީ ފުލުހުންގެ އަމުރަށް ނުކިޔަމަންތެރިވެ، ފުލުހުންނަށް ހަމަލާދީ، ފުލުހުންގެ ދައުރު އަދާކުރުމަށް ހުރަސްއަޅައި އެކަމަށް ހިތްވަރުދީ އެކަން ރާވައި ހިންގުމުގައި އިސްކޮށް ހަރަކާތްތެރިވާކަމަށް ތުހުމަތު ކުރެވޭ ދިވެހި ފިރިހެނެއް ކަމަށެވެ. އަދި ދެވަނަ މީހަކީ ފުލުހުންގެ ދައުރު އަދާކުުރުމަށް ހުރަސްއަޅައި ފުލުހަކަށް ހަމަލާދީ މާރާމާރީ ހިންގައި ފުލުހުންގެ ވެހިކަލްއަށް ގެއްލުންދިންކަމުގެ ތުހުމަތުގައި ހައްޔަރުކޮށްފައިވާ އަންހެނެއް ކަމަށެވެ.

އިދިކޮޅު ކޯލިޝަނުން ކޮންމެ ހަފުތާއަކު ކަހަލަ ގޮތަކަށް އަންނަނީ މި ކެމްޕޭން ހިންގަމުންނެވެ. އަދި އިންޑިއާ މިލިޓަރީ އައުޓް ޖަހާފައިވާ ޓީޝާޓުތައް ލައިގެން ސަޕޯޓަރުން ތިބޭއިރު އިންޑިއާ އައުޓް ލިޔެފައިވާ ދިދަތައް ވެސް ޝުއޫރު ފާޅުކުރުމަށް ބޭނުން ކުރެއެވެ.

ރާއްޖޭގައި ތިބިކަމަށްބުނާ އިންޑިއާ ސިފައިން ބޭރުކުރުމަށް ގޮވާލައި އިދިކޮޅު ޕީޕީއެމުން ފަށާފައިވާ ހަރަކާތްތަކުގައި ބޭނުންކުރާ "އިންޑިއާ އައުޓް" ޖެހި ޓީޝާޓް ނުލާން ފުލުހުން އެންގިކަމަށް އިދިކޮޅުން މީގެ ކުރިން ވަނީ ބުނެފައެވެ. ނަމަވެސް ފުލުހުން ވަނީ އެ ވާހަކަތައް ދޮގުކޮށްފައެވެ

އިދިކޮޅު ޕީޕީއެމް/ޕީއެންސީ ކޯލިޝަންގެ ލީޑަރު ރައީސް ޔާމީން މިނިވަންވެވަޑައިގަތް ފަހުން ކުރިއަށްވުރެ ބޮޑަށް އިންޑިއާ އައުޓް ކެމްޕެއިން ކުރިއަށްގެންދެއެވެ. އެގޮތުން އެމަނިކުފާނު އިސްވެ ހުންނަވައިގެން އަތޮޅުތެރޭގައި ވެސް މި ކެމްޕެއިން ކުރިއަށް ގެންގޮސްފައިވެއެވެ. އަދި އިންޑިއާ އައުޓްގެ ނަމުގައި ޕެޓިޝަނެއްގައި ސޮއިކުރުންވެސް ކުރިއަށްގެންގޮސްފައިވާއިރު، މި ޕެޓިޝަންގައި ބުނަނީ މި ސަރުކާރުން އިންޑިއާއާއެކު ސިއްރު އަސްކަރީ އެއްބަސްވުންތަކެއްގައި ސޮއިކުރަމުން ގެންދާ ކަމަށެވެ. އަދި ގާނޫނުއަސާސީއާ ޚިލާފަށް ރާއްޖޭގެ ތަންތަން އިންޑިއާއަށް ދޫކޮށްފައިވާ ކަމަށެވެ.

މި ކެމްޕެއިނާ ގުޅިގެން ސަރުކާރުން ބުނީ ރާއްޖެއާ ދޭދޭ ގައުމުތަކުގެ މެދުގައި އޮންނަ ގުޅުންތަކާ ގުޅޭގޮތުން ފިތުނަ އުފައްދައި ގޯސް ތުހުމަތުތަކެއް ފެތުރުމަކީ، ރާއްޖެއަށް އަބަދުވެސް އެހީތެރިވެދޭ އަވައްޓެރި ގާތް އެކުވެރި ގައުމުތަކާމެދު އޮންނަ ބަދަހި ގުޅުންތަކަށް ނޭދެވޭ އަސަރު ކުރާނެ ކަމެއް ކަމަށެވެ.

ސަރުކާރުން ބުނީ ރާއްޖެއިން ޒަމާންވީ ބަދަހި ގުޅުންތައް ބާއްވަމުން އަންނަ ގައުމުތަކާ ދެމެދު އޮންނަ ގުޅުމަކީ ގައުމުތަކުގެ ދެމެދުގައި އޮންނަ އިހުތިރާމާއި ރާއްޖޭގެ ގާނޫނުތަކާއި އެއްގޮތަށް މި ސަރުކާރުން ނަގަހައްޓާނޭ ގުޅުންތަކެއްކަމަށެވެ. އަދި އެފަދަ ގުޅުންތަކުގެ ސަބަބުން ރާއްޖޭގެ ސިޔާދަތާއި މިނިވަންކަމާއި ސަރަހައްދީ ރައްކާތެރިކަމަށް ނުރައްކަލެއް ނުވާނެ ކަމަށާއި، އޭގެ ބަދަލުގައި އެފަދަ ގުޅުންތަކުގެ ސަބަބުން ރާއްޖެއަށް ފައިދާވެ، އެ ފައިދާތައް ރާއްޖޭގެ ރައްޔިތުންނަށް ވެސް ލިބިގެންދާނެ ކަމަށެވެ.