ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިން ހަމައެކަނި ވެރިޔަކީ ރައީސް ސާލިހު: ސައީދު

މުޅި ދުނިޔޭގައިވެސް ގައުމެއްގެ ރައްޔިތުންނަށް ބޭނުންވާ އަސާސީ ޚިދުމަތްތައް ފުރިހަމައަށް ގާއިމްކޮށްދިން ހަމައެކަނި ވެރިޔަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ސައީދު ވިދާޅުވީ ކޮވިޑް-19ގެ ހާލަތުގައިވެސް ރައްޔިތުންނަށް ބޭނުންވާ އަސާސީ ޚިދުމަތްތައް ދެމެހެއްޓެނިވިގޮތެއްގައި ފޯރުކޮށްދިނުމަށް ސަރުކާރުން މަސައްކަތްކޮށްފައިވާކަމަށެވެ. އަދި ތަރައްގީގެ މަސައްކަތްތައްވެސް ހުއްޓާލާފައި ނުވާ ކަމަށެވެ.

ސައީދު ވިދާޅުވީ ރައްޔިތުންނަށް ބޭނުންވާ އަސާސީ ޚިދުމަތްތައް ގާއިމްކޮށްދިނުމަށް މި ސަރުކާރުން މިހާރުވެސް ގެންދަނީ ގިނަ މަސައްކަތްތަކެއް ކުރަމުން ކަމަށެވެ. މީގެ ތެރޭގައި 2021 ވަނަ އަހަރު ސޮއިކުރެވިގެންދިޔަ ރާއްޖޭގެ ހުރިހާ ރަށެއްގައި ފެނާއި ނަރުދަމާ ގާއިމްކުރުމުގެ މަސައްކަތް ހިމެނޭ ކަމަށް ސައީދު ވިދާޅުވިއެވެ.

އަދި 2022 ވަނަ އަހަރު ނިމިގެންދާއިރު، ރާއްޖޭގެ އަސާސީ ޚިދުމަތްތައް މި ސަރުކާރުން ވައުދުވީގޮތަށް ފުދިގެންދާނެ ކަމަށާއި، މުޅި ދުނިޔޭގައިވެސް ގައުމެއްގެ ރައްޔިތުންނަށް ބޭނުންވާ އަސާސީ ޚިދުމަތްތައް ފުރިހަމައަށް ގާއިމްކޮށްދިން ހަމައެކަނި ވެރިޔަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ކަމަށް ސައީދު ވިދާޅުވިއެވެ.

ސައީދު ވިދާޅުވީ ދެމެހެއްޓެނިވޮގޮތެއްގައި ނިޒާމުތައް ރައްޔިތުންނަށް ޚިދުމަތް ދޭން މަސައްކަތްކުރުމަކީ ވަރަށް ބޮޑު ގޮންޖެހުމެއް ކަމަށެވެ. މިކަން ކުރެވޭނީ ދުރުރާސްތާއަށް ވިސްނައިގެން މަސައްކަތް ކުރުމުން ކަމަށް ސައީދު ވިދާޅުވިއެވެ. މިއަދަށް އެކަނި ވިސްނައިގެން މަސައްކަތެއް ކުރުމުގެ ނަތީޖާ މާލެއިންވެސް ފެންނަމުންދާކަމަށް ސައީދު ވިދާޅުވިއެވެ. ނިޒާމުތައް ގާއިމްކުރާއިރު އެންމެ މަދުވެގެންވެސް 20 ނުވަތަ 25 އަހަރަށް މިކަން ދެމިގެންދާ ވަރަށް ޕްލޭން ކުރަންޖެހޭ ކަމަށް ސައީދު ވިދާޅުވިއެވެ.