މަގޫދޫ އައު އިންޖީނުގެ ހުޅުވައިފި
ފެނަކައިން ރާއްޖޭގެ 150 ރަށެއްގައި ފެނާއި ކަރަންޓުގެ ޚިދުމަތް އަންނަނީ ފޯރުކޮށްދެމުން
މަގޫދޫ އައު އިންޖީނުގެ ހުޅުވުމަށް ބޭވި ރަސްމިއްޔާތުގެ ތެރެއިން
ނ.މަގޫދޫގައި ސަރުކާރުން އެޅި އައު އިންޖީނުގެ އާއި އޮފީސް އިމާރާތް، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ހުޅުވައިދެއްވައިފިއެވެ.
މަގޫދޫގައި އަލަށް އެޅި އިންޖީނުގެއަކީ 400 ކިލޯވޮޓްގެ ކަރަންޓް އުފެއްދުމުގެ ގާބިލްކަން ހުރި އިންޖީނުގެއެކެވެ. މަގޫދޫގައި ހުޅުވުނު އިންޖީނުގެއަކީ މީގެ ކުރިން އެރަށުގެ ރައްޔިތުންގެ ދިރިއުޅޭ ސަރަހައްދުގައި މީހުންނަށް ދަތިވާގޮތަށް ހުރި ތަނެކެވެ. އެހެންނަމަވެސް އައު އިންޖީނުގެއަކީ ޒަމާނީ ވަސީލަތްތަކާއެކު ގާއިމްކުރެވުނު އިންޖީނުގެއެކެވެ. މިއާއެކު މަގޫދޫގެ ގެތަކަށް ކަރަންޓުގެ ޚިދުމަތް ފަސޭހައިންލިބި ކުރިން ކުރިމަތިވި ދަތިތަކަށް ދާއިމީ ހައްލެއް ލިބިގެން ދިޔައީއެވެ.
ރަށުގެ މީހުން ދިރިއުޅޭ ހިސާބުގައި ހުރި އިންޖީނުގެތައް މީހުން އުޅޭ ހިސާބުތަކާ ދުރަށް ގެންދިޔުމަށް ސަރުކާރުން ވަނީ މަސައްކަތް ފަށާފައެވެ. ރަށްރަށުގެ އިންޖީނުގެތައް އާއްމުން ދިރިއުޅޭ ސަރަހައްދުތަކާ ދުރަށް ގެންދިއުމުގެ މަސައްކަތުގެ 99 ޕަސެންޓް ނިމިފައިވާ ކަމަށް ފެނަކައިން ބުނެފައިވެއެވެ.
ފެނަކައިން ރާއްޖޭގެ 150 ރަށެއްގައި ފެނާއި ކަރަންޓުގެ ޚިދުމަތް އަންނަނީ ފޯރުކޮށްދެމުންނެވެ.
