ޒިގްޒެގް އިންޓަ އޮފީސް ފުޓްސަލް މުބާރާތުގައި ބައިވެރިވުމުގެ ފުރުސަތު ހުޅުވާލައިފި

ކުޅުދުއްފުށީ ސިޓީގައި ރަޖިސްޓަރީ ކޮށްގެން ހިންގަމުން އަންނަ ޖަމިއްޔާއެއް ކަމަށްވާ ޒިގްޒެގް ފޯ ޔޫތު ލިންކޭޖުން އިންތިޒާމް ކޮށްގެން އެ ރަށުގައި ސަރުކާރު މުއައްސަސާތަކާއި ކުންފުނިތަކަށް އަމާޒުކޮށްގެން ބޭއްވުމަށް ހަމަޖެހިފައިވާ "ޒިގްޒެގް އިންޓަ އޮފީސް ފުޓްސަލް ޓޯނަމަންޓް" ގައި ބައިވެރި ވުމުގެ ފުރުސަތު ހުޅުވާލައިފިއެވެ.

އަންނަ ފެބްރުއަރީ މަހުގެ އެއްވަނަ ދުވަހު ކުޅުދުއްފުށީ ސްޕޯޓްސް އެރީނާގެ ފުޓްސަލް ދަނޑުގައި ފެށުމަށް ހަމަޖެހިފައިވާ މި މުބާރާތުގައި ބައިވެރިވުމުގެ ފުރުސަތު ވަނީ 09 ޖަނަވަރީ 2022 ގެ ނިޔަލަށް ހުޅުވާލާފައެވެ.

އެ ޖަމިއްޔާއިން ހާމަކޮށްފައިވާ ގޮތުގައި މި މުބާރާތް ކުރިއަށް ގެންދިޔުމުގެ މައިގަނޑު މަގުސަދުތަކުގެ ތެރޭގައި ހިމެނެނީ ކުޅުދުއްފުށީގައި ހުރި ސަރުކާރުގެ އޮފީސްތަކާއި ކުންފުނިތަކުގެ މުވައްޒަފުންގެ މެދުގައި އެކުވެރިކަމާއި ކުޅިވަރުގެ ރޫހު އާލާކުރުމާއެކު ފުޓުސަލްއަށް ޝައުގުވެރިކަން އުފެއްދުމެވެ. އަދި މުބާރާތެއްގައި ވާދަ ކުރުމުގެ ފުރުޞަތު ސަރުކާރުގެ އޮފީސްތަކާއި ކުންފުނިތަކުގެ މުވައްޒަފުންނަށް ހޯދައިދީ މުވައްޒަފުން އެއްތަނަކުން ބައްދަލުވެ، ގުޅުން ބަދަހިވުމަށް ފުރުސަތު ހުޅުވާލަދިނުމަކީ ވެސް މަގުސަދެކެވެ.

މި މުބާރާތުގައި އޮފީހަށް ނުވަތަ ކުންފުންޏަށް ނިސްބަތްނުވާ އެއް ކުޅުންތެރިޔަކު ޓީމުގައި ހިމެނުމަށް ފުރުސަތު ކޮންމެ ޓީމަކަށް ވެސް ދީފައިވާއިރު، އެއީ މުބާރާތް ފޯރިގަދަކޮށް މުބާރާތުގައި މޮޅެތި ކުޅުންތެރިން ފެނުމުގެ ފުރުސަތު ފަހި ކުރުމުގެ ގޮތުން ދީފައިވާ ފުރުސަތެއް ކަމުގައި ޖަމްއިއްޔާއިން ބުނެއެވެ.

މި މުބާރާތުގައި ބައިވެރިވާ ކޮންމެ ޓީމަކުން 2500 (ދެހާސް ފަސްސަތޭކް ރުފިޔާ) ގެ ފީއެއް ދައްކަން ޖެހޭއިރު، މުބާރާތުގައި ބައިވެރިވާން ހުށަހަޅާ ފޯމާއެކު ރުފިޔާ ޖަމާކުރި ބޭންކް ސްލިޕް އެ ޖަމިއްޔާގެ މެއިލް އެޑްރެހަށް މެއިން ކުރުމަށް ވަނީ އެދިފައެވެ.

މިއީ އެ ޖަމިއްޔާއިން މި މުބާރާތް ބާއްވާ 8 ވަނަ ފަހަރެވެ. ފާއިތުވެދިޔަ މުބާރާތްތަކަކީ ވެސް ގިނަ އޮފީސްތަކާއި ކުންފުނިތަކުގެ ޓީމުތަކުން ބައިވެރިވެ ވަރަށް ބޮޑު ތަރުހީބެއް ލިބުނު މުބާރާތް ތަކެއް ކަމަށް އިންތިޒާމްކުރާ ފަރާތުން ބުނެއެވެ.