ސަރުކާރުން ތަރައްގީގެ މަޝްރޫއުތައް ކުރިއަށްގެންދާނީ ރައްޔިތުން ބޭނުންވާ ގޮތަށް - ރައީސް
4 ޖެނުއަރީ 2022 | އަންގާރަ 10:25128 ބަނދަރު، 5 އަަހަރުތެރޭ ނިންމުމަށް ވަނީ އަމާޒު ހިފާފައި
ލަންދޫ ބަނދަރު ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ ވާހަކަފުޅު ދައްކަވަނީ
ސަރުކާރުން ތަރައްގީގެ މަޝްރޫއުތައް ކުރިއަށްގެންދާނީ ރައްޔިތުންގެ އަޑު އަހައިގެން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް މިހެން ވިދާޅުވީ, ނ. ލަންދޫގެ ބަނދަރުޅު ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. ރައީސް ވިދާޅުވީ, ސަރުކާރުގެ ވިސްނުމަކީ ކަމެއް ކުރިއަށްދާއިރު ރައްޔިތުން ބޭނުންވާ ގޮތް ހިއްސާކުރުމުން އެކަން އެގޮތަކަށް ކުރިއަށް ގެންދިޔުން ކަަމަށެވެ. ރައްޔިތުން އެދޭގޮތަކީ ސަރުކާރުން އެދޭ ގޮތް ކަމުގައި ރައީސް ވިދާޅުވިއެވެ. މިހާރު އަތޮޅު ތެރެއަށް އެމަނިކުފާނު މިކުރައްވާ ދަތުރުފުޅުތަކުގައި, ތަރައްގީގެ މަޝްރޫއުތައް ބައްލަވާލައްވައި އިތުރަށް ކުރަން ޖެހޭ ކަންކަން ކުރެއްވުން އެއީ މަގުސަދެއް ކަމުގައި ވިދާޅުވިއެވެ.
ރައީސް ވިދާޅުވީ, މިއަދަކީ ސަރުކާރަށް ހިތްހަމަ ޖެހުން ލިބިގެންދާ ދުވަސް ކަމަށެވެ. އެއީ ލަންދޫ ރައްޔިތުންނަށް ސަރުކާރުން ވީ ވައުދު ފުދިގެން ދާ ދުވަސް ކަމަށާއި, ރައްޔިތުން އެދުނު އެއް އެދުން ކަމުގައިވާ ބަނދަރު ބޮޑު ކުރުމުގެ މަސައްކަތް ނިމި، މިއަދަކީ ކައުންސިލާ ބަނދަރު ހަވާލުރެވުނު ދުވަސް ކަމުގައެވެ.
އަދި 300 ފޫޓުގެ ބަނދަރެެއް ރައްޔިތުން ބޭނުންވި ގޮތަށް، ރައްޔިތުންގެ ބޭނުންތައް ފުދޭ ގޮތަށް މިހާރު ބޮޑު ކުރެވިފައިވާ ކަމަށެވެ. އަދި ރައްޔިތުންގެ ކަންބޮޑުވުން ކަމުގައިވާ އޮޑި އެހެލާ ސަރަހައްދުވެސް އެގޮތަށް ނިމިގެންދާނެ ކަން ފާހަގަކުރައްވަމުން ވިދާޅުވީ, ލަންދޫއިން އެމްޓީސީސީ ފައިބާއިރު އޮޑިއެހެލާ ސަރަަހައްދު ރައްޔިތުން ބޭނުންވާ ގޮތަށް ހެދިގެންދާނެ ކަމަށެވެ.
ރާއްޖޭގެ އެކި ކަންކޮޅުތަކުގައި ކުރިއަށްދާ ބަނދަރުގެ މަޝްރޫއުތައް ތަފްސީލްކޮށްދެއްވަމުން ރައީސް ވިދާޅުވީ, މިހާތަނަށް އައިރު ބަނދަރާއި ޖެޓީގެ ގޮތުގައި 25 ތަނެއް ނިންމާފައިވާ ކަމަށާއި, 39 ރަށެއްގެ އަމަލީ މަސައްކަތް އަދި 13 ރަށެއްގެ މަސައްކަތް ކޮންޓްރެކްޓް ކޮށްފައިވާ ކަމަށެވެ. ޓެންޑަރ މަރުހަލާގައި 29 ބަނދަރެއް އެބައޮތް ކަމަށާއި, އިތުރަށް 22 ރަށުގެ މަސައްކަތް ރޭވިފައި އޮތްކަމަށެވެ. އަދި 128 ބަނދަރު ފަސް އަަހަރުގައި ނިންމަން އަމާޒު ހިފާފައިވާ ކަމުގައި ރައީސް ވިދާޅުވިއެވެ.
ރައީސް ވިދާޅުވީ 2020ވަނަ އަހަރަކީ އިގުތިސާދީ ގޮތުން އެންމެ ދަތި އަހަރަށް ވީނަމަވެސް، ވިސްނުމަކަށްވީ ރައްޔިތުންނަށް ދޭންޖެހޭ ޚިދުމަތް ދިނުން ކަމަށެވެ. އޭގެ ނަތީޖާވެސް ރަނގަޅު ކަމަށާއި, މި ސަރަހައްދުގައި އިގުތިސާދު އެންމެ ކުރިއަރައިދާ ގައުމަކަށް ވެފައި މިއޮތީ ރާއްޖެކަން ރަައީސް އުފަލާއެކު ފާހަގަކުރެއްވިއެވެ. މިކަން ކުރެވުނީ ރައްޔިތުންނާ އެހެން މުއައްސަސާތައް ގުޅިގެން ކުރި މަސައްކަތުން ކަމުގައި ވިދާޅުވިއެވެ.
ކޮވިޑުގެ އައު ވޭރިއަންޓް ފެތުރެމުންދާތީ ސިއްހީ މާހިރުންނާއެކު މަޝްވަރާ ކުރެވުނު ކަމަށާއި, ކުރިއަށް އޮތް 3 ހަފުތާއަކީ ކޮވިޑް ފެތުރުން ބޮޑު 3 ހަފުތާ ކަމަށް އެ ބޭފުޅުންގެ ފަރާތުން މައުލޫމާތު ލިބުނު ކަމަށް ވިދާޅުވިއެވެ. އެހެންކަމުން ރައްކާތެރިކަމުގެ ފިޔަވަޅުތައް އެޅުމަށް ރައީސް ނަސޭހަތްތެރިވެވަޑައިގެންނެވިއެވެ. ސަރުކާރުން މަސައްކަތް ކުރަނީ ވީވަރަކުން ވިޔަފާރިތައް ބަންދު ނުކޮށް އާއްމު ހާލަތުގައި ކުރިއަށް ދިޔުން ކަމުގައި ވިދާޅުވިއެވެ.
ލަންދޫގެ ތަރައްގީއަށް އިތުރުކަންކަން ކުރަން އެބަހުރި ކަމަށާއި, އިތުރު ވައުދެއްގެ ގޮތުގައި މިސްކިތެއް ގާއިމުކުރުމަށް ވެވަޑައިގެންނެވި ވައުދުވެސް މިއަދު ފުދިގެންދާކަމަށް ވިދާޅުވިއެވެ.
އައިސް ޕްލާންޓް ގާއިމް ކުރުމުގެ މަސައްކަތް މިހާރު ކުރިއަށްދާ ކަމަށާއި, ފެނުގެ ނިޒާމު ގާއިމު ކުރުމަށް ކޮންޓްރެކްޓް ކުރެވިފައިވާކަން ރައީސް ފާހަގަކުރެއްވިއެވެ. ސިއްހީ މަރުކަޒު އަޕްގްރޭޑް ކުރުމުގެ މަސައްކަތް ހެލްތު މިނިސްޓްރީން ކުރިއަށް ގެންދާނެ ކަމަށާއި, 24 ގަޑިއިރަށް ޚިދުމަތް ބަދަލު ކުރުމުގެ މަސައްކަތް ވަރަށް އަވަހަށް ނިމިގެންދާނެ ކަމަށް ރައީސް ވިދާޅުވިއެވެ.
ރާއްޖޭގައި މިހާރު އޮތް އެންމެ ބޮޑު މައްސަލައަކީ, ޑްރަގްގެ މައްސަލަ ކަމަށާއި, މިކަން ހައްލު ކުރުމަށް ނެޝަނަލް ޓާސްކް ފޯސްއެއް އުފައްދާފައިވާ ކަމަށާއި, އޭގެ ނަތީޖާ މި އަހަރުގެ މެދުތެރޭގައި ފެނިގެންދާނެ ކަމަށް ވިދާޅުވިއެވެ.
ޑްރަގް އަތުލައިގަންނާތީ ކަންބޮޑުވާ ބަޔަކު އެބަތިބި ކަމަށާއި, އެހީ ލިބެން އޮތް ހުރިހާ ފަރާތެއްގެ އެހީތެރިކަމާއެކު ރާއްޖޭގެ ބޯޑަރު ބަލަހައްޓައި, ކުރެވެން އޮތް ހުރިހާ ކަމެއް ކުރައްވާނެ ކަމަށާއި، ޖީލެއް ނެތިގެންދާތަން ބަލަން ނުތިބޭނެ ކަމަށް ވިދާޅުވިއެވެ.
ލަންދޫގެ ބަނދަރުގެ މަސައްކަތް ކުރިއަށް ގެންދިޔައީ އެމްޓީސީސީންނެވެ. މި މަސައްކަތް މުޅިން ނިންމާފައިވަނީ 31 ޑިސެމްބަރ 2021ގައެވެ.
