ނ.ލަންދޫގެ ބަނދަރު ރަސްމީކޮށް އިފްތިތާހުކޮށްފިއެވެ.

ބަނދަރު ރަސްމީކޮށް އިފްތިތާހު ކޮށްދެއްވީ, ރައީސުލްޖުމްހޫރިއްޔާ އިބްރާހިމް މުހައްމދު ސާލިހެވެ. މިކަމަށްޓަކައި ޚާއްސަކުރެވިފައިވާ ހަނދާނީ ބިނާގެ ފަރުދާ ކައްސަވައިދެއްވީ, ރައީސް ސާލިހާއި ހައުސިން މިނިސްޓަރ މުހައްމަދު އަސްލަމެވެ.

މިކަމަށްޓަކައި ބޭއްވި ޚާއްސަ ރަސްމިއްޔާތުގައި ކައުންސިލްގެ ފަރާތުން ވަނީ ރައީސަށް ހަނދާނީ ހަދިޔާއެެއް އަރުވާފައެވެ.

ރައްޔިތުންގެ އެދުމަށް 3 ފަހަރައްގެ މަތިން ބަނދަރު ބޮޑުކުރުމުގެ މަސައްކަތް ސަރުކާރުން ކޮށްދެއްވިކަން ކައުންސިލުން ފާހަގަކުރެއްވިއެވެ. ރައްޔިތުން ބޭނުންވާ ގޮތަށް ބަނދަރު ނިމިގެން ދިޔުމަކީ ސަރުކާރުން ރަށްރަށުގެ ތަރައްގީއަށް ދެއްވާ އިސްކަންކަމުގައި ލަންދޫ ކައުންސިލުން ފާހަގަކުރިއެވެ.

މި މަޝްރޫއުގެ ދަށުން ހާބަރ ބޭސިން ފުންކުރުމާއި، 2،336 ކިޔުބިކް މީޓަރުގެ ނެރު ފުންކުރުމާއި، 42،335 ކިޔުބިކް މީޓަރުގެ ބަނދަރު ފުން ކުރުމާއި، 4،080 ކިޔުބިކް މީޓަރުގެ ކުރިން ފުންކޮށްފައިވާ ފަޅު އަލުން ފުން ކުރުމާއި، 399 މީޓަރުގެ ބޭރުތޮށި ލުމާއި، 73 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 80 މީޓަރުގެ ސަރަހައްދެއްގައި ގްރޮއިންސް ޖެހުމާއި، ޖުމްލަ 1،842 އަކަމީޓަރުގެ ސަރަހައްދެއްގައި ޕޭވްމެންޓް ހެދުމާއި، ަބަނދަރު ބައްތި ޖެހުމުގެ އިތުރުން، ރޭންޕެއް ހެދުން ހިމެނެއެވެ. މި މަޝްރޫޢަކީ 35.6 މިލިއަން ރުފިޔާގެ މަޝްރޫއެކެވެ. މަޝްރޫއުގެ އަމަލީ މަސައްކަތް ނިމުނީ 31 ޑިސެމްބަރ 2021 ވަނަ ދުވަހުއެވެ.