އަތޮޅުތަކުން ޓޯކުރި ވެހިކަލްތައް ނައްތާލަނީ
4 ޖެނުއަރީ 2022 | އަންގާރަ 06:47މިފަހަރު ޖުމްލަ 52 ވެހިކަލެއް ނައްތާލަން ފުލުހުން ވަނީ ނިންމާފައި
ޓޯކޮށްފައިވާ ވެހިކަލްތަކެއް
އަތޮޅުތަކުގެ ރަށްރަށުން ފުލުހުންގެ ބެލުމުގެ ދަށަށް ގެނެސްފައިވާ އެއްގަމު އުޅަނދުތައް ނައްތާލުމުގެ ކުރިން އެކަން އިއުލާނު ކޮށްފިއެވެ.
ފުލުހުން އެ ވެހިކަލްތައް ނައްތާލުމުގެ ކުރިން އެކަން އިޢްލާނުކޮށްފައި ވަނީ ވެހިކަލްތަކުގެ ވެރިފަރާތުން އެތަކެއްޗާއި ހަވާލު ވުމަށް އެންމެފަހު ފުރުސަތު ދިނުމުގެ ގޮތުންނެވެ.
އާއްމު ގޮތެއްގައި ފުލުހުން ނައްތާލަނީ މާލޭގައި ގަވައިދާއި ޚިލާފަށް ޕާކް ކުރުމުން ފުލުހުންގެ ބެލުމުގެ ދަށަށް ގެންދާ ވެހިކަލްތަކެވެ. ނަމަވެސް އަންގާރަ ދުވަހު ފުލުހުން ވަނީ އަތޮޅުތަކުގެ ބައެއް ރަށްރަށުން ވެސް ފުލުހުންގެ ބެލުމުގެ ދަށަށް ގެނެސްފައިވާ ބައެއް ވެހިކަލްތައް ނައްތާލަން ނިންމައި އެކަން އިއުލާނު ކޮށްފައެވެ.
ފުލުހުން ވެހިކަލްތައް ގެންގޮސްފައިވާ ރަށްރަށުގެ ތެރޭގައި ކުޅުދުއްފުށި، ފުވައްމުލައް، ނ.މަނަދޫ، އއ.ތޮއްޑޫ، ލ.ގަން، ގދ.ތިނަދޫ ހިމެނެއެވެ.
ފުލުހުން މައުލޫމާތުދިން ގޮތުގައި މާލެއިން ފުލުހުންގެ ބެލުމުގެ ދަށަށް ގެނެސްފައިވާ ބައެއް ވެހިކަލްތައް ވެރިފަރާތުން އަނބުރާ ގެންދަންވެސް ފަހު ފުރުސަތު ދީފައި ވެއެވެ. މިފަހަރު ޖުމްލަ 52 ވެހިކަލެއް ނައްތާލަން ނިންމާފައިވާ ކަމަށް މައުލޫމާތު ދެއެވެ.
