ރައީސް ނ އަތޮޅަށް ކުރައްވާ ދަތުރުފުޅެއް އަންގާރަ ދުވަހު ފައްޓަވަނީ
3 ޖެނުއަރީ 2022 | ހޯމަ 16:20ރައީސްގެ މިދަތުރުފުޅުގައި ނ މާފަރު، ލަންދޫ، މަގޫދޫ، ހޮޅުދޫ، އަދި މަނަދޫއަށް ވަޑައިގަންނަވާނެ
ރައީސުލްޖުމްހޫރިއްޔާ ތިލަދުންމައްޗަށް ވަޑައިގަތުމުގެ ތެރެއިން
ނ އަތޮޅުގެ 5 ރަށަކަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ކުރައްވާ ދަތުރުފުޅުގައި އަންގާރަ ދުވަހު ފުރާވަޑައިގަތުމަށް ހަމަޖެހިއްޖެއެވެ.
ރައީސް އޮފީހުގެ ތަރުޖަމާން މަބްރޫކް އަޒީޒު ކުރެއްވި ޓްވީޓެއްގައި ވިދާޅުވީ ރައީސްގެ މިދަތުރުފުޅުގައި ނ. މާފަރު، ލަންދޫ، މަގޫދޫ، ހޮޅުދޫ، އަދި މަނަދޫއަށް ވަޑައިގަންނަވާނެކަމަށެވެ. މި ދަތުރުފުޅު އަންގާރަ ދުވަހުގެ ހެނދުނު ފެއްޓެވުމަށް ވަނީ ހަމަޖެހިފައެވެ.
މިދަތުރުފުޅުގައި ނ އަތޮޅު ކައުންސިލާއި ރަށްރަށުގެ ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި އެރަށްރަށުގެ ރައްޔިތުންނާ ބައްދަލުކުރައްވާނެކަމަށް މަބްރޫކް ވިދާޅުވިއެވެ.
ރައީސުލްޖުމްހޫރިއްޔާ ނ އަތޮޅަށް މިކުރައްވަނީ ދެ ދުވަހުގެ ދަތުރުފުޅެކެވެ. މައުލޫމާތުލިބިފައިވާ ގޮތުގައި ރައީސްގެ މިދަތުރުފުޅުގައި ރަށްރަށުގައި ނިމިފައި ހުރި ތަންތަން ހުޅުއްވައިދެއްވާނެއެވެ.
ރައީސް ވަނީ މިދިޔަ އަހަރު ނިމެން އުޅެނިކޮށް ކ. މާފުއްޓަށް ވަޑައިގެން އެރަށުގައި އަލަށް އިތުރުކުރެވުނު ބިމާއި ޕިކްނިކް އައިލެންޑް ރަސްމީކޮށް މާފުށީ ކައުންސިލާ ހަވާލުކުރުމުގެ ރަސްމިއްޔާތުގައި ބައިވެރިވެވަޑައިގަންނަވާފައެވެ.
