ހުސްވެފައިވާ ތިން ރަށެއްގެ އަންހެނުންގެ ތަރައްޤީއަށް މަސައްކަތް ކުރާ ކޮމެޓީ އިންތިޚާބަށް ކުރިމަތިލުމުގެ މުއްދަތު ހަމަވާއިރުވެސް އެއްވެސް ކެނޑިޑޭޓަކު ކުރިމަތިނުލާތީ، އިލެކްޝަންސް ކޮމިޝަން (އީސީ)ން ކަންބޮޑުވުން ފާޅުކޮށްފިއެވެ.
އީސީން ބުނީ ފެބްރުއަރީ މަހުގެ 5 ވަނަ ދުވަހު ބޭއްވުމަށް އިއުލާނު ކޮށްފައިވާ ހއ.ތަކަންދޫ, ތ.ވިލިފުށި, ގއ.ގެމަނަފުށީ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި އިލެކްޝަނަށް މިއަދާ ހަމައަށް އެއްވެސް ކެނޑިޑޭޓަކު ކުރިމަތި ލާފައިނުވާކަމަށެވެ. މި ދާއިރާތަކުގެ ބައި އިލެކްޝަނަށް ކުރިމަތިލުމަށް ދީފައިވާ މުއްދަތު ޖެނުއަރީ މަހުގެ 5 ވަނަ ދުވަހަށް ހަމަވާނެ ކަމަށާއި، މުއްދަތު ހަމަވުމުގެކުރިން ފޯމު ހުށަހެޅުމަށް އިލްތިމާސް ކުރާކަމަށް އީސީން ބުނެއެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަނާއެކު ބޭއްވުމަށް ހަމަޖެހިފައިވާ މި އިންތިޚާބުތަކުގައި އެރަށްތަކުގެ ރައްޔިތުންގެ އެއްބާރުލުން ބޭނުންވާކަމަށް އިލެކްޝަންސް ކޮމިޝަނުން ވަނީ ބުނެފައެވެ. މިދިޔަ އަހަރު ވަނީ ފުރަތަމަ ފަހަރަށް އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބު ބާއްވާފައެވެ. މަގާމަށް އިންތިޚާބުވީ ފަހުން ގިނަ ބަޔަކު އިސްތިއުފާދެމުން އަންނާތީ ޑަބްލިޔުޑީސީގެ ބައި-އިލެކްޝަންތައް އަންނަނީ ބާއްވަމުންނެވެ.
