ޝުރޭހު ހޯދުމަށް ބޮޑު ސަރަހައްދެއް ބަލައިފި
2 ޖެނުއަރީ 2022 | އާދީއްތަ 08:59ބޮލިފުށި، ގުޅީފަޅު އަދި ވިލިނގިލި ހުޅަނގު ކަނުން ފެށިގެން ގިރާވަރުގެ އުތުރު ކަނާ ހަމައަށް ވަނީ ބަލާފައި
ޝުރޭހު ހޯދުމަށް ބަލާފައިވާ ސަރަހައްދު
ގުޅީފަޅު ކައިރިއަށް ގެއްލުނު ޒުވާނާ ހޯދުމަށް ހިންގާ އޮޕަރޭޝަންގައި ބޮޑު ސަރަހައްދެއް ބަލާފައިވާކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
އެމްއެންޑީއެފްއިން ބުނީ ޝުރޭހު ހޯދުމަށް ބޮލިފުށި، ގުޅީފަޅު އަދި ވިލިނގިލި ހުޅަނގު ކަނުން ފެށިގެން ގިރާވަރުގެ އުތުރު ކަނާ ހަމައަށް ބަލާފައިވާކަމަށެވެ. ގިރާވަރު ކަނޑުގެ 69.3 ސްކޮއަރ މޭލުގެ ސަރަހައްދެއް ވަނީ ބަލާފައެވެ.
އެމްއެންޑީއެފުން ބުނީ އޭނާ ހޯދުމުގެ މަސައްކަތް ކުރަމުންދަނީ ހަރބަރ ކްރާފްޓް އަދި ފާސްޓް އިންޓަރސެޕްޓަރ ކްރާފްޓް ބޭނުންކޮށްގެން ކަމަށެވެ. މި ވަގުތު ކުރިއަށްދަނީ ސަރފޭސް ސަރޗްއެއް ކަމަށް އެމްއެންޑީއެފްއިން ބުނެއެވެ.
ހދ. ކުމުންދޫ، އަރާއިރު، 21 އަހަރުގެ ޝުރޭހު ހަސަން ގެއްލިގެން ރިޕޯޓްކޮށްފައިވަނީ 31 ޑިސެންބަރު 2021 ވީ ހުކުރު ދުވަހުގެ ހެނދުނު 8:58 ހާއިރުއެވެ. އެމްއެންޑީއެފް ކޯސްޓްގާޑަށް މައުލޫމާތު ލިބިފައިވާ ގޮތުގައި، ގުޅީފަޅުގެ ހުޅަނގުދެކުނު ކަންމަތީގައި ބޯވަ ހިފަން އުޅެނިކޮށް އޭނާ އޮޔާ ދަމައިގަތީ ވާދޫ ކަނޑުތެރެއަށް ހުޅަނގަށް ވާގޮތަށެވެ. އެޒުވާނާ ލައިގެން ހުރީ އަޅިކުލައިގެ ޓީޝާޓަކާއި ކަޅުކުލައިގެ ސޯޓެއްކަމަށާއި އަދި ނޫކުލައިގެ މާސްކެއް އަޅައިގެން ހުރިކަމަށް ކޯސްޓްގާޑަށް ވަނީ މައުލޫމާތު ލިބިފައެވެ.
އެޒުވާނާއާ ބެހޭ އެއްވެސް ޚަބަރެއް ވޭތޯ އެސަރަހައްދުން ދަތުރުކުރާ އުޅަނދުފަހަރުންނާއި އެހިސާބުގެ ރަށްތަކުން ބަލައިދިނުމަށް އެމްއެންޑީއެފުން އެދިފައިވެއެވެ. އަދި އޭނާ އާއި ބެހޭ އެއްވެސް މައުލޫމާތެއް ލިބިއްޖެނަމަ ލަސްނުކޮށް ކޯސްޓްގާޑްގެ ހިލޭ ގުޅޭ ނަމްބަރ 191ށް ގުޅައިދިނުމަށް ވަނީ އިލްތިމާސްކޮށްފައެވެ.
