އިންޑިއާ އައުޓް ކެމްޕޭނުގެ ބިރުވެރިކަން އިންޑިއާގައި ތިބި ދިވެހިންގެ ހިތްތަކާ ހަމައަށް

ކުރީގެ ރައީސް އަބްދުﷲ ޔާމީން މިނިވަންވެވަޑައިގަތުމާއެކު، "އިންޑިއާ އައުޓް" ނަމުގައި އިދިކޮޅުން ކުރިއަށް ގެންދިޔަ ހަރަކާތްތައް ވަނީ އިތުރަށް ފުޅާކޮށްފައެވެ. މި ހަރަކާތުގެ އަސަރު ސީދާ ގޮތުންނާއި ނުސީދާ ގޮތުން ދިވެހިންނާއި މި ދިވެހި ގައުމަށްވެސް ކުރަމުންދާއިރު، އިންޑިއާ އައުޓް ކެމްޕޭންގެ ބިރުވެރިކަން އިންޑިއާގައި ތިބި ދިވެހިންގެ ހިތްތަކާ ހަމައަށް މިހާރުވަނީ ފޯރާފައެވެ.

އިންޑިއާގެ އަންހެނަކާއި ކައިވެނިކޮށްގެން އުޅޭ ދިވެއްސަކު އޭނާގެ ފޭސްބުކްގައި ހިއްސާ ކޮށްފައިވާ ޕޯސްޓަކާއި ގުޅިގެން ރާއްޖެއެމްވީން އޭނާއާ ސުވާލުކޮށްލީމެވެ. ނަން ހާމަކުރަން ބޭނުންނުވާ އެ މީހާ ބުނެފައިވާ ގޮތުގައި ގޮތުގައި އެއީ ދޭތެރެ ދޭތެރެއިން އިންޑިއާއަށް ދާންޖެހޭ ދެމަފިރިންނެވެ. 13 އަހަރުވީ ދިގު ކައިވެނީގައި އެތައް ފަހަރަކު އިންޑިއާއަށް ދާން ޖެހިފައިވެއެވެ. މިވަގުތުވެސް އޭނާ ހުރީ އިންޑިއާގައެވެ.

އޭނާ ބުނެފައިވާ ގޮތުގައި އިންޑިއާއަކީ އުފަން ބިން ނޫން ނަމަވެސް، އެ ބިމެއްގައި އަނބިދަރިންގެ ގެދޮރު ހުރި ގައުމެވެ. އޭނާ މިވަގުތުވެސް އުޅެނީ އަންހެނުންގެ އޮޕަރޭޝަނުގެ ކަންކަމުގައެވެ. އަންހެނުންގެ ކިޑްނީ އޮޕަރޭޝަނެއް ކޮށް ނިމި ތިއޭޓަރުން ބޭރަށް ނެރުނު ވަގުތު ކުރެވުނު ބައެއް އިހުސާސްތައް އޭނާ ވަނީ ހިއްސާ ކޮށްފައެވެ. އޭނާ ބުނާ ގޮތުން އެފަދަ ހާލަތެއްގައި ތިއްބައި، މުޅި މަގުތައް ފުރައި "މޯލްޑިވްސް އައުޓް" އަށް ގޮވަމުން ބަޔަކު ދާތަން ފެނިއްޖެނަމަ ގައިމުވެސް ހިތަށް އެތައް އަސަރެއް ކުރާނެއެވެ. އެފަދަ ކިތައް އާއިލާ އިންޑިއާގައި އުޅެމުންދާނެތޯ ވިސްނާލުމަށް އޭނާ ވަނީ އެދިފައެވެ.

އެފަދަ ހާލެއްގައި ތިއްބައި ބަޔަކު މޯލްޑިވްސް އައުޓް ގޮވަން ފަށައިފިނަމަ ލިބޭނެ ވޭނާއި ކަންބޮޑުވުން އޭނާވެސް ވަނީ ފާހަގަކޮށްފައެވެ.

ދިވެހި ގައުމުގެ މިނިވަންކަން ދިފާއު ކުރުމަށް ފުރާނައިން ގުރުބާންވާން ޖެހިލުން ނުވާނެކަން ފާހަގަކޮށް އޭނާ ބުނީ، އަަބަދުވެސް އަޒުމަކީ އެއީ ކަމަށެވެ. ނަމަވެސް "އިންޑިއާ އައުޓް" ނަމުގައި މި ހިންގާ ހަރަކާތާއި ދޭތެރޭގައި ވިސްނާލަން ޖެހޭކަމަށް އޭނާ ބުނެއެވެ.

އޭނާ ބުނާ ގޮތުގައި އިންޑިޔާގައި މިވަގުތު އުޅެމުންދާ އިރުވެސް، އިންޑިޔާގެ އެއްވެސް ރައްޔިތެއްގެ ފަރާތަކުން ނުވަތަ އިމިގްރޭޝަން އޮފިސަރެއްގެ ފަރާތުންވެސް ހިނިތުންވުން ފިޔަވައި އެއްވެސް އެއްޗެއް ނުފެނެއެވެ. މުސްލިމަކަށް ވާތީ ތަފާތު ކުރާތަނެއްވެސް ނުފެނެއެވެ. އޭނާ ބުނާ ގޮތުން އޭނާ ދަންނަ އެންމެންވެސް ގޮވާލަނީ "ބާއިޖާން" ކިޔާފައެވެ. އެންމެންވެސް ދައްކަނީ ރާއްޖޭގެ ރީތިކަމުގެ ވާހަކައެވެ. އެމީހުންވެސް ބުނާ ގޮތުގައި "ކުރޮޅި" ޑުރައިވަރުންގެވެސް ހުވަފެނަކީ ކޮންމެވެސް ދުވަހަކުން ރާއްޖޭގެ ރީތިކަން ހަމަލޮލުން ދެކިލުމެވެ.

އޭނާއަށް އިންޑިއާ އައުޓް ކެމްޕޭން ސިފަ ކުރެވެނީ ބަޔަކަށް ކުރޭވޭ މަލާމާތެއްގެ ގޮތުގައެވެ. ޖެއްސުމެއްގެ ގޮތުގައެވެ. އަމިއްލަ އެދުން ފޮރުވުމަށްޓަކައި ގައުމީ ފަސްފުނި ހުސްކުރުމުގެ ގޮތުގައެވެ.