ލަންދޫ ބަނދަރާއި އައު މިސްކިތް ހުޅުވައިދެއްވުމަށް ރައީސް ވަޑައިގަންނަވަނީ

ނ. ލަންދޫ ބަނދަރު ހުޅުވައިދެއްވުމަށާއި، އެރަށުގައި ސަރުކާރުން އިމާރާތްކުރި މިސްކިތް ހުޅުވައިދެއްވުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު އެރަށަށް ވަޑައިގެންނެވުމަށް ހަމަޖެހިއްޖެއެވެ.

އެކަމާ ގުޅޭގޮތުން ރާއްޖެއެމްވީއަށް ނ ލަންދޫ ކައުންސިލުގެ ނާއިބްރައީސް މަންސޫރު ވިދާޅުވީ، ރައީސް އެރަށަށް ވަޑައިގެންނެވުމަށް ހަމަޖެހިފައިވަނީ ޖެނުއަރީ މަހުގެ 4 ވާ އަންގާރަ ދުވަހު ކަމަށެވެ. ރައީސްގެ މި ދަތުރުފުޅުގައި ނ. ލަންދޫ ބަނދަރު ރަސްމީކޮށް ހުޅުވައިދެއްވާނެއެވެ.

ނ ލަންދޫ ބަނދަރުގެ މަޝްރޫއަކީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށް ގެންގޮސްފައިވާ މަޝްރޫއެކެވެ. މި މަޝްރޫއުގެ އަގަކީ 32.4 މިލިއަން ރުފިޔާއެވެ. މި މަޝްރޫއުގެ ދަށުން، 227 މީޓަރުގެ ސަރަހައްދެއްގައި އެއްގަމު ތޮށި ލުމާއި، 1690 އަކަ މީޓަރު ސަރަހައްދެއްގައި ޕޭވްމަންޓް ހެދުމާއި، މޫރިންގް ރިންގ ސަޕްލައިކޮށް ހަރުކުރުމާއި ރޭމްޕެއް ހެދުމުގެ މަސައްކަތް ކޮށްފައިވެއެވެ.

ޑިޒައިން އެންޑް ބިލްޑް އުސޫލުން ކުރިއަށް ގެންދާ މި މަޝްރޫއުގެ ދަށުން ބޮޑު ހިލަ ބޭނުންކޮށްގެން 401 މީޓަރުގެ ބޭރު ތޮށި ހެދުމާއި، 256 މީޓަރުގެ އެއްގަމު ތޮށި ހެދުމާއި، 13 މޫރިން ބުލޮކް ލުމާއި، 13 ބަނދަރު ބައްތި ހަރުކުރުމާއި، 2 ނެރުބައްތި ހަރުކުރުމާއި، 1280 ސްކެއަރ މީޓަރު ޕޭވްމަންޓެއް ހެދުމާއި، 23000 ކިއުބިކް މީޓަރު ބަނދަރު ފުންކުރުމާއި، 2000 ކިއުބިކް މީޓަރު ނެރު ފުންކުރުމާއި، 60 މީޓަރު ރިވެޓްމަންޓް ޖެހުމާއި އަދި 65 މީޓަރު ގުރޯއިން ޖެހުން ވެސް ހިމެނެއެވެ.

ލަންދޫ ބަނދަރުގެ އިތުރުން، ރައީސްގެ މި ދަތުރުފުޅުގައި އެރަށުގައި މި ސަރުކާރުން އިމާރަތް ކޮށްފައިވާ މިސްކިތް ހުޅުވުމަށްވެސް ވަނީ ހަމަޖެހިފައެވެ. ލަންދޫ ކައުންސިލުން މައުލޫމާތު ދޭ ގޮތުގައި އެއީ 500 މީހުންގެ ޖާގައިގެ މިސްކިތެކެވެ. މި މިސްކިތުގެ މަސައްކަތް މިނިސްޓްރީން ހަވާލުކުރީ ހައިމަން ކޮންސްޓްރަކްޝަނާއެވެ.

އެ މަޝްރޫއަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ރިޔާސީ ކެމްޕެއިންގައި އެރަށަށް ވަޑައިގެން ވެވަޑައިގެންނެވި ރިޔާސީ ވައުދުފުޅެކެވެ. މިނިސްޓްރީ އޮފް އިސްލާމިކް އެފެއާޒްއިން ހިންގާފައިވާ އެ މަޝްރޫއަކީ ސައުދީ އަރަބިއާ ސަރުކާރުގެ ހިލޭ އެހީގެ ދަށުން ފަންޑުކޮށް 2020 ވަނަ އަހަރުގެ ބަޖެޓުގައިވެސް 3،218،757ރ. ކަނޑައެޅި މަޝްރޫއެކެވެ.