ކޯސްޓްގާޑުގެ ވަސީލަތްތައް އިތުރުކުރުމުގެ މަސައްކަތް ދަނީ ކުރަމުން: ޖެނެރަލް ޝަމާލް
1 ޖެނުއަރީ 2022 | ހޮނިހިރު 11:57އިންސާނީ ވަސީލަތް އިތުރުކުރުމުގެ މަސައްކަތް ކުރިއަށްދޭ
ޗީފް އޮފް ޑިފެންސް ފޯސް، މޭޖަރ ޖެނެރަލް އަބްދުﷲ ޝަމާލް
ކޯސްޓްގާޑުގެ ގާބިލްކަން އިތުރުކޮށް، ވަސީލަތް އިތުރުކުރުމުގެ މަަސައްކަތްތަކެއް ކުރަމުންދާކަމަށް ޗީފް އޮފް ޑިފެންސް ފޯސް، މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.
ކޯސްޓްގާޑުގެ ޚިދުމަތަށް 42 އަހަރު ފުރުމާއި ގުޅިގެން ދެއްވި އިންޓަރވިއުއެއްގައި މޭޖަރ ޖެނެރަލް އަބްދުﷲ ޝަމާލް ވިދާޅުވީ ކޯސްޓްގާޑުގެ ގާބިލްކަން އިތުރުކުރުމަށްޓަކައި ވަރަށް ގިނަ މަސައްކަތްތަކެއް ފަށާފައިވާކަމަށެވެ. މިގޮތުން ކޯސްޓްގާޑަށް އިތުރު ވަސީލަތްތަކާއި، އިންސާނީ ވަސީލަތްތައް ހޯދުމުގެ މަސައްކަތްވެސް ކުރަމުންދާކަމަށް ޝަމާލް ވިދާޅުވިއެވެ.
ޝަމާލް ވިދާޅުވީ ކޯސްޓްގާޑުގެ ވަސީލަތްތައް އިތުރުކުރުމަށް އޮފްޝޯރ ޕެޓްރޯލް ވެސެލްސްއާއި، އިނީޝިއަލް ޕެޓްރޯލް ވެސެލްސްއާއި، ފާސްޓް އިންޓަރސެޕްޓް ކްރާފްޓް ފަދަ މުހިންމު ވަސީލަތްތައް ހޯދުމަށްޓަކައި ގިނަ މަސައްކަތްތައް ކުރެވި، ގިނަ ކާމިޔާބީތަކެއް ހޯދިފައިވާކަމަށެވެ. މިހާރުވެސް އިންޝޯރ ޕެޓްރޯލް ވެސެލްއެއް ހޯދިފައިވާކަމަށާއި، އަދިވެސް މިފަދަ އުޅަނދުފަހަރު ހޯދުމަށް އެކި ގައުމުތަކާއެކު މަޝްވަރާކުރެވެމުންދާކަމަށް މޭޖަރ ޖެނެރަލް ޝަމާލް ވިދާޅުވިއެވެ.
މީގެ އިތުރުން މެރިޓައިމް އެންޑް ރެސްކިއު ކޯޑިނޭޝަން ސެންޓަރ (އެމްއާރްސީސީ) ބޭރު ގައުމެއްގެ އެހީއާއެކު ބިނާކުރަމުންދާކަމަށް ޝަމާލް ވިދާޅުވިއެވެ. މި މަސައްކަތުގެ ތެރެއިން ތަނުގެ ބިންގާ އަޅާފައިވާކަމަށާއި، މި މަސައްކަތްވެސް ކުރިއަށްދާކަމަށް ވިދާޅުވިއެވެ.
އަދި އިންޑިއާ ކަނޑުގެ ސަރަހައްދުގައި ހިނގާ އެކި އެކި ނުރަނގަޅު ކަންތައްތައް ދެނެގަނެވި އެކަންކަން ހުއްޓުވިގެންދާނެ ކަމަށް ޝަމާލް ވިދާޅުވިއެވެ. އޭގެތެރޭގައި ކްރޮސް ބޯޑަރ ޓެރަރިޒަމް، ޑްރަގް ޓްރެފިކިން، ހަތިޔާރުގެ އެކި ވިޔަފާރިތައް ފަދަ ކަންކަމާ ގުޅޭގޮތުން މައުލޫމާތުތައް ބަދަލުކޮށް އެކަންކަމާ ކުރިމަތިލެވިގެންދާނެ ކަމަށާއި، މިކަމަށް ކުރަންޖެހޭ ހުރިހާ މަސައްކަތެއްވެސް މިހާރު ދަނީ ކުރެވެމުން ކަމަށް މޭޖަރ ޖެނެރަލް އަބްދުﷲ ޝަމާލް ވިދާޅުވިއެވެ.
ޝަމާލް ވިދާޅުވީ ރާއްޖޭގެ ކަނޑުތައް ހިމާޔަތްކޮށް ރައްކާތެރިކުރުމުގެ އެންމެ ބޮޑު ދައުރެއް އަދާކުރަމުންދަނީ ކޯސްޓްގާޑުން ކަމަށެވެ. އިންޑިއާ ކަނޑުގެ ސަރަހައްދުގައި އޮތް ކޮންމެ ނުރައްކަލަކީ ރާއްޖެއަށްވެސް އޮތް ނުރައްކަލެއް ކަމަށާއި އެހެންކަމުން ގައުމުތަކާ ގައުމުތަކުގެ އަސްކަރިއްޔާތައް ގުޅިގެން ކުރަމުންދާ މަސައްކަތްތައް ޝަމާލް ވަނީ ފާހަގަކުރައްވާފައެވެ.
ޝަމާލް ވިދާޅުވީ ރައްޔިތުންގެ ފުރާނައާއި މުދާ ސަލާމަތްކުރުމުގައި ގަދަ ކަނޑުތަކުގައި ކޯސްޓްގާޑުގެ ސިފައިން ގެންދަނީ ކެނޑިނޭޅި މަސައްކަތްކުރަމުން ކަމަށެވެ. އޭގެތެރޭގައި ސަރޗް އެންޑް ރެސްކިއު އޮޕަރޭޝަންތަކާއި، އިންސާނިއްޔަތާ ގުޅޭ އެކި ޚިދުމަތްތަކާއި، މެޑިކަލް އިވެކުއޭޝަންތަކާއި، ސީ އެމްބިއުލާންސްގެ ޚިދުމަތާއި އަދި މިނޫންވެސް ގިނަ ޚިދުމަތްތަކެއް ކޯސްޓްގާޑުން ދަނީ ފޯރުކޮށްދެމުން ކަމަށް ޝަމާލް ވިދާޅުވިއެވެ.
