ގުޅީފަޅު ކައިރިއަށް ގެއްލުނު ޒުވާނާ ހޯދުމުގެ އޮޕަރޭޝަން ފުޅާކޮށްފައިވާ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.

ގެއްލިގެން ހޯދަމުންދަނީ ހދ. ކުމުންދޫ، އަރާއިރު، 21 އަހަރުގެ ޝުރޭހު ހަސަންއެވެ. އެޒުވާނާ ގެއްލުނު ކަމުގެ ރިޕޯޓު ލިބިފައިވަނީ 31 ޑިސެންބަރު 2021 ވީ ހުކުރު ދުވަހުގެ ހެނދުނު 8:58 ހާއިރުއެވެ. އެމްއެންޑީއެފް ކޯސްޓްގާޑަށް މައުލޫމާތު ލިބިފައިވާ ގޮތުގައި، ގުޅީފަޅުގެ ހުޅަނގުދެކުނު ކަންމަތީގައި ބޯވަ ހިފަން އުޅެނިކޮށް އޭނާ އޮޔާ ދަމައިގަތީ ވާދޫ ކަނޑުތެރެއަށް ހުޅަނގަށް ވާގޮތަށެވެ. އެޒުވާނާ ލައިގެން ހުރީ އަޅިކުލައިގެ ޓީޝާޓަކާއި ކަޅުކުލައިގެ ސޯޓެއްކަމަށާއި އަދި ނޫކުލައިގެ މާސްކެއް އަޅައިގެން ހުރިކަމަށް ކޯސްޓްގާޑަށް ވަނީ މައުލޫމާތު ލިބިފައެވެ.

އެމްއެންޑީއެފުން ބުނީ އެޒުވާނާ ހޯދުމުގެ މަސައްކަތް ކުރިއަށްދާ ކަމަށާއި، އޮޕަރޭޝަން އިތުރަށްފުޅާ ކޮށްފައިވާ ކަމަށެވެ. އެގޮތުން ކޯސްޓްގާޑް ނޫރައްދީން އަދި ހާބާ ކްރާފްޓް ލޯންޗެއް މިހާރުވެސް ދަނީ އެ ޒުވާނާ ހޯދުމުގެ މަސައްކަތް ކުރަމުން ކަމަށް އެމްއެންޑީއެފުން ބުނެއެވެ.

ގެއްލުނު މީހާ ހޯދުމުގެ މަސައްކަތް ކޯސްޓްގާޑްގެ ޓީމުން ކުރަމުންދާއިރު ހުކުރު ދުވަހުގެ ރޭގެ ނިޔަލަށް ޑައިވްކޮށްގެން 55،000 އަކަމީޓަރުގެ ސަރަހައްދެއް ވަނީ ބަލާފައެވެ. އަދި ސްނޯކްލިން ކޮށްގެން 36،000 އަކަމީޓަރުގެ ސަރަހައްދެއް ބަލާފައިވާ ކަމަށް އެމްއެންޑީއެފުން ބުނެއެވެ.

އެޒުވާނާއާ ބެހޭ އެއްވެސް ޚަބަރެއް ވޭތޯ އެސަރަހައްދުން ދަތުރުކުރާ އުޅަނދުފަހަރުންނާއި އެހިސާބުގެ ރަށްތަކުން ބަލައިދިނުމަށް އެމްއެންޑީއެފުން އެދިފައިވެއެވެ. އަދި އޭނާ އާއި ބެހޭ އެއްވެސް މައުލޫމާތެއް ލިބިއްޖެނަމަ ލަސްނުކޮށް ކޯސްޓްގާޑްގެ ހިލޭ ގުޅޭ ނަމްބަރ 191ށް ގުޅައިދިނުމަށް ވަނީ އިލްތިމާސްކޮށްފައެވެ.

ބޯވަ ނެގުމަށާއި، ފީނަށް ގޮސްގެން އުޅޭ މީހުން ގެއްލިގެން ދުވަސްދުވަހުން ރިޕޯޓު ކުރެވެމުންދާއިރު، މިފަދަ ކަންކަމުގައި އެކަނި ނުދިއުމަށް ކަމާބެހޭ ފަރާތްތަކުން އިލްތިމާސްކުރެއެވެ.