ޑްރަގް ވިޔަފާރި ކުރާ ސިޔާސީ މީހުންގެ ވަނަވަރު ހާމަކުރަން ޖެހޭ

314 ކިލޯގެ މަސްތުވާތަކެތި ނައްތާލުމަށް ދޫނިދޫގައި އޮތް ރަސްމިއްޔާތުގައި ވާހަކަ ދައްކަވަމުން ހޯމް މިނިސްޓަރ ޝައިޚު އިމްރާން އަބްދުﷲ ވަނީ ފާހަގަކުރެވޭ ވަކިވަކި ސިޔާސީ ފަރާތްތައް މަސްތުވާތަކެތީގެ ވިޔަފާރީގައި ފުޅާ ދާއިރާއެއްގައި އެބަ އުޅޭ ކަމަށް ވިދާޅުވެފައެވެ. އެމީހުންގެ ފަރާތުން ނުފޫޒުތައް ކުރިމަތިވާކަން ފާހަގަކުރައްވައި އިމްރާން ވަނީ އެކި މުއައްސަސާތަކަށާއި މިނިސްޓަރަށް ވެސް އެފަރާތްތަކުގެ ނުފޫޒު ކުރިމަތިވާ ކަމަށް ވިދާޅުވެފައެވެ.

އެހެންނަމަވެސް، އެ ފަރާތްތަކަކީ ކޮބައިކަން ހާމަ ކުރައްވަން މިނިސްޓަރ ވަނީ އުޒުރުވެރިވެވަޑައިގެންފައެވެ. ނުވިތާކަށް އެމީހުންނާ ހަމައަށް ވާސިލްވުމަށް މަސައްކަތް ކުރަމުން އަންނަ މުއަސަސާތަކަށް ވެސް ގިނަ ގޮންޖެހުންތައް ކުރިމަތި ކުރުވާ ކަމަށާއި، ނޫސްވެރިއަކު ތަހުގީގީ ނަޒަރަކުން އެ ވާހަކަތައް ގެންނަން މަސައްކަތް ކުރާނަމަ އެކަމަށްވެސް ހުރަސްއަޅާ ބަޔަކު އެބަތިބި ކަމަށް މިނިސްޓަރ ވިދާޅުވިއެވެ.

އެހެންނަމަވެސް، ރާއްޖޭގެ މަސްތުވާތަކެތީގެ ވިޔަފާރިއާއި، ބޭނުން ކުރުމުގެ މައްސަލަތައް މިހާރު އޮތީ އެކަންކަން ސިއްރު ކޮށްގެން ތިބެވޭނެ ހާލަތެއްގައެއް ނޫނެވެ. ކޮންމެ އަހަރަކުވެސް ރެކޯޑު އަދަދުތަކުން މަސްތުވާތަކެތި އަތުލައިގަންނަމުންދާއިރު، އެތައް ސަތޭކަ ކިލޯއެއް އެއްފަހަރާވެސް އަތުލައިގަންނަނީއެވެ. އަދި ޖެހިގެން އަންނަ ދުވަހު އެކަމުގައި ހިމެނޭ ފަރާތްތައް ދޫވެގެންދާ މަންޒަރަކީވެސް މިއަދު ހަމަ އާންމު މަންޒަރެކެވެ.

އަހަރެއްގެ މައްޗަށް 400 އާއި 500 ދެމެދުގެ އަދަދެއްގެ މީހުން އަލަށް މަސްތުވާތަކެތި ބޭނުންކުރާ ކަމަށާއި، ހަމައެކަނި މާލެ ސަރަޙައްދުން ވެސް 1100 އެއްހާ މީހުން މަސްތުވާތަކެއްޗަށް ދެވިހިފާފައިވާ މީހުން ގޮތުގައި ފާހަގަ ކުރެވޭކަމަށް ކޮމިޝަނަރ އޮފް ޕޮލިސް (ސީޕީ) މުޙައްމަދު ހަމީދުވެސް ވިދާޅުވެއެވެ. އެގޮތުން މުޅި ރާއްޖެއަށް ބަލާއިރު، ތަކުރާރުކޮށް މަސްތުވާތަކެތި ބޭނުންކުރާ މީހުންގެ އަދަދު 9000 އާ ގާތްކުރާއިރު، ކޮންމެ އަހަރަކުވެސް މި ލިސްޓަށް ހާހަކާއި ގާތްކުރާ އަދަދަކަށް މީހުން އިތުރުވެގެން ދިއުމަކީ ހަމަ ގައިމުވެސް ކަންބޮޑުވުމެކެވެ. އެއީވެސް ޑްރަގް ވިޔަފާރިން މަންފާ ހޯދާ ފަރާތްތަކެއް މުގުލުގައި ތިބެ ހިންގަމުންދާ މި ކަންކަން ސިއްރު ކޮށްގެން ތިބެވެން ނެތް ސަބަބެކެވެ.

މަސްތުވާތަކެތީގެ ބޮޑެތި މައްސަލަތަކުގައި ހައްޔަރުކުރާ މީހުން ދޫވެގެން ދިޔަތަން 2021 ވަނަ އަހަރުވެސް އެކި ފަހަރުމަތިން ވަނީ ފެނިފައެވެ. ގިނަ ފަހަރު އެގޮތަށް ދޫވެގެން ދަނީ އެކަންކަމުގައި އެންމެ އިސްކޮށް އުޅޭ ފަރާތްތައް ކަމަށް ފުލުހުންވެސް ފާހަގަކޮށްފައިވެއެވެ. އެހިސާބުން ދެން އާންމުންގެ ނުރުހުން އަމާޒުވަނީ ތަންފީޒީ އިދާރާތަކަށެވެ. ފުލުހުންނަށްވެސް އެކަމުގައި އާންމުންގެ ތުހުމަތުތައް ބަންޑުންވެގެންދާއިރު، ކޯޓުތަކާއި، ޕްރޮސެކިއުޓަރ ޖެނެރަލް އޮފީހާއި ދައުލަތުގެ އިދާރާތަކަށް އާންމުންގެ ނުރުހުމާއި، ތުހުމަތުތައް އަމާޒުވެގެން ދަނީ މަދަކުން ނޫނެވެ.

ވަކިން ޚާއްސަކޮށް، ފާހަގަކުރެވޭ ވަކިވަކި ސިޔާސީ ފަރާތްތައް މަސްތުވާތަކެތީގެ ވިޔަފާރީގައި ފުޅާ ދާއިރާއެއްގައި އުޅެމުންދާކަމަށް ދައުލަތުގެ ހޯމް މިނިސްޓަރ ވިދާޅުވެފައިވާއިރު، އެ މަންޒަރުތައް ފެންނަތަން ތަކުރާރުވެގެން ދިއުމަކީ އާންމުންގެ ރުޅިވެސް އިންތިހާއަށް އިތުރުވެގެންދާނެ ކަމެކެވެ. މުއައްސަސާތަކަށް އޮންނަ އިތުބާރު ގެއްލިގެންދާނެ ކަމެކެވެ.

ރާއްޖޭގައި 9000އާ ގާތްކުރާ އަދަދަކަަށް ޑްރަގް ބޭނުންކުރާ މީހުން އުޅޭއިރު އޭގެ ތެރެއިން 10 އިންސައްތަ ވެސް ފަރުވާގެ ނިޒާމުގެ ތެރޭގައި ނެތެވެ. ކޮންމެ އަހަރަކުވެސް ހާހަކަށްވުރެ ގިނަ މީހުން ފަރުވާގައި ކިއޫގައި ތިބެންޖެހޭއިރު، ރާއްޖޭގައި ޑްރަގް ފަރުވާގެ ނިޒާމު އޮތީ މުޅިން ބޮއްސުންލާފައި ކަމަށް ކަމާގުޅުންހުރި އިދާރާތަކުންވެސް ބަޔާންކުރަމުންދެއެވެ.

ޑްރަގްގެ ވަބާގައި ޖެހި، ފަރުވާއަށް ބޭނުންވި ނަމަވެސް މުޖުތަމައަށް ދޫވެފައިތިބި އެތައް ޒުވާނުންނެއް ތިބިއިރު، އޭގެ ސަބަބުން އަނެއްކާވެސް އިތުރުވަނީ އިތުރު ކުށްތަކެވެ. ވައްކަމާއި ފޭރުމާއި، މީހުން ރަހީނުކޮށްގެން ބްލެކްމެއިލް ކުރާ ބޮޑެތި ނެޓްވޯރކުތައް އޮޕަރޭޓް ކުރާ ހިސާބަށް ކަންކަން ދާއިރު، އެކަމަށް މަގުފަހިވުމުގެ ފަހަތުގައި ތިބޭ ފަރާތްތައް މިނިސްޓަރަށް އެނގިވަޑައިގަންނަވާނަމަ، އެކަން ހާމަކުރައްވާ އެބޭފުޅުންނަށް ފިޔަވަޅު އެޅުން މިހާރު މާ ލަސްވެސް ވެއްޖެ ނޫންތޯއެވެ؟