ބަދަހި ހިރަފުސް ކަޕުގެ ޗެމްޕިއަންކަން ވައިލެޓަށް

ބަދަހި ހިރަފުސް ކަޕް 2021 ގެ ޗެމްޕިއަންކަން ޓީމް ވައިލެޓުން ހޯދައިފި އެވެ. ވައިލެޓް މިމުބާރާތުގެ ތަށި ހިއްލާލީ ފައިނަލުގައި ޕެނަލްޓީ ޖަހައިގެން ފެމެލީ ބޭކަރީ ބަލިކޮށެވެ.

ބުރާސްފަތި ދުވަހު ކުޅުނު ފައިނަލު މެޗުގައި ދެޓީމުގެ ފަރާތުން ވެސް ވާދަވެރި ކުޅުމެއް ފެނިގެންދިޔައިރު މެޗުގެ ފުރިހަމަ ވަގުތު ހަމަވީއިރު ދެޓީމު އޮތީ 1-1 ން އެއްވަރުވެފަ އެވެ. މެޗުގައި ފުރަތަމަ ލަނޑުޖަހާ ލީޑު ނެގީ ފެމެލީ ބޭކަރީންނެވެ. އެލަނޑު އެޓީމަށް ކާމިޔާބުކޮށްދިނީ މެޗުގައި ރަނގަޅު ކުޅުމެއް ދެއްކި އެޓީމުގެ ޖޯޒީ ނަމްބަރު 9 އިބްރާހިމް ހުސެއިން (މައްލެ) އެވެ.

މެޗުގެ ފުރިހަމަ ވަގުތުގެ ކުޅުން ހަމަވީއިރު 1-1 ން އެއްވަރުވެފައި އޮތުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީ ޖަހައިގެން 4-3 ން މެޗު ކާމިޔާބުކުރީ ވައިލެޓުންނެވެ. ފެމެލީ ބޭކަރީގެ 5 ޕެނަލްޓީގެ ތެރެއިން 2 ޕެނަލްޓީ ކާމިޔާބުވީއިރު ވައިލެޓްގެ 4 ޕެނަލްޓީގެ ތެރެއިން 3 ޕެނަލްޓީ ވަނީ ކާމިޔާބުވެފަ އެވެ. ފައިނަލް މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ ފެމެލީ ބޭކަރީގެ ޖޯޒީ ނަމްބަރު 9 އިބްރާހިމް ހުސެއިން (މައްލެ) އެވެ.

މިމުބާރާތުގެ އެންމެ މޮޅު 3 ކުޅުންތެރިންނަށް ހޮވިފައިވަނީ ޓީމް ވައިލެޓްގެ ޖާރޒީ ނަންބަރ 11 އަލީ ރިޒާ، ހަމަ އެޓީމްގެ ޖާރޒީ ނަންބަރ 3 އަމްޖަދު ހަސަން އަދި ފެމެލީބޭކަރީގެ ޖާރޒީ ނަންބަރ 19 މުހައްމަދު ހަމްދާން އެވެ.

އެންމެ ގިނަ ގޯލްޖެހި ކުޅުންތެރިއަކަށް ހޮވިފައިވަނީ ރެޑްސްނެޕާރސްގެ ޖާރޒީ ނަންބަރ 27 މާއްދު އަދުނާން އެވެ. އަދި އެންމެ މޮޅު ގޯލް ކީޕަރަކަށް ހޮވިފައިވަނީ ޓީމް ވައިލެޓްގެ ޖާރޒީ ނަންބަރ 1 އަހުމަދު ފިޔާޒުއެވެ.