މޮނިޓަރިންގައި އޮތް ނަމަވެސް ގައިޑްލައިންތަކާ އެއްގޮތަށް މާފުށީގައި އައު އަހަރު ކުލަގަދަކޮށް ފާހަގަކުރާނެ

މާފުށި މޮނިޓަރިންގައި އޮތް ނަމަވެސް ގައިޑްލައިންތަކާ އެއްގޮތަށް އައު އަހަރުގެ ހަރަކާތްތައް ކުލަގަދަކޮށް ފާހަގަ ކުރާނެ ކަމަށް އެރަށު ކައުންސިލުން ބުނެފިއެވެ.

ކޮވިޑް ކޭސްތަކެއް ފެނި ރަށް މޮނިޓަރިންއަށް ލާފައިވަނީ، ބުރާސްފަތި ދުވަހުގެ ހަވީރުއެވެ. އެރަށުން 21 މީހަކު ކޮވިޑަށް ޕޮޒިޓިވްވެ ފަރުވާ ހޯދަމުން ދެއެވެ. މިހާރު މޮނިޓަރިންގެ ހާލަތުގައި އޮތީ ޖުމްލަ 16 ރަށެކެވެ.

ކުލަގަދަކޮށް އާ އަހަރުގެ ހަރަކާތްތައް މާފުށީގައި ފާހަގަކުރާއިރު، އެ ރަށަކީ މާލެ ސަރަހައްދުގެ ގިނަ ބަޔަކުވެސް އައު އަހަރު ފާހަގަ ކުރުމަށްދާ ރަށެކެވެ. ރާއްޖޭގައި 2009 ވަނަ އަހަރު އަލަށް ލޯކަލް ޓޫރިޒަމް ފެށީ މާފުށީގައެވެ. މިހާރު މާފުށީގައި 46 ގެސްޓް ހައުސްއެއްގައި 840 ކޮޓަރި ހުރިއިރު އައު އަހަރާ ދިމާކޮށް ހުރިހާ ގެސްޓް ހައުސްއެއް ވެސް ވަނީ ފުލްވެފައެވެ.

ފަތުރުވެރިންނާއެކު ގިނަ އަދަދެއްގެ ދިވެހިން ވެސް އައު އަހަރާ ދިމާކޮށް އެރަށުގައި މިހާރު ވެސް ތިބިިއިރު، ރަށުގެ 95 އިންސައްތަ މީހުން ވަނީ ވެކްސިން ފުރިހަމަކޮށްފައެވެ. އެހެންކަމުން މޮނިޓަރިންގގައި އޮތްނަމަވެސް ރަށަށް އަރައި ފޭބުމުގައި އެއްވެސް ދައްޗެއް ނޯންނާނެ ކަމަށް ކައުންސިލުން ބުނެއެވެ.

އެޗްޕީއޭގެ އުސޫލުގައިވާ ގޮތުން ރަށުގައި ދިރިއުޅޭ، ވެކްސިން ޖެހުމަށް ޝަރުތު ހަމަވާ 12 އަހަރުން މަތީގެ އާބަދީގެ 90 އިންސައްތަ ވެކްސިން ފުރިހަމަކޮށްފައިވާ ނަމަ، ޕީސީއާރު ޓެސްޓަކާ ނުލާ އެރަށަކަށް ދެވޭނެއެވެ. އެކަމަކު މޮނިޓަރިންގައި އޮތް ރަށަކީ ވެކްސިން ކަވަރޭޖް ހަމަނުވާ ރަށެއް ނަމަ، ދެވޭނީ 72 ގަޑިއިރު ނުވާ ޕީސީއާރު ނެގެޓިވް ނަތީޖާއަކާ އެކުއެވެ.