އައު އަހަރު ފާހަގަކުރުމުގެ ގޮތުން ހުޅުމާލޭގައި ހަވާ އަރުވަނީ

އައު އަހަރު ފާހަގަކުރުމުގެ ގޮތުން ހުޅުމާލޭގައި ހަވާ އެރުވުމަށް ހަމަޖެހިފައިވާކަމަށް މޯލްޑިވްސް ނޭޝަނަލް ޑިފެންސް ފޯސް(އެމްއެންޑީއެފް)ން ބުނެފިއެވެ.

އެކަމާ ގުޅިގެން އެމްއެންޑީއެފުން ކުރި ޓްވީޓެއްގައި ބުނެފައިވަނީ ޑިސެންބަރު 31 ވަނަ ދުވަހުގެރޭ 23:59 ގައި، ހުޅުމާލޭ ސެންޓްރަލް ޕާކްގައި ހަވާއެރުވުން ބޭއްވުމަށް ހަމަޖެހިފައިވާކަމަށެވެ.

މީގެއިތުރުން "މަރުހަބާވީސް"ގެ ނަމުގައި އައު އަހަރު ފާހަގަކުރުމަށް ހުޅުމާލޭގައި ޝޯ އެއް ބޭއްވުމަށް ވެސް ވަނީ ހަމަޖެހިފައެވެ. ޝޯ އޮންނާނީ މި މަހުގެ 31 ވަނަ ދުވަހުގެ ރޭ 8:30ގައި ހުޅުމާލޭ ދުވާ ޓްރެކްގައެވެ. މި ޝޯ ގައި ބޮލީވޫޑްގެ މަޝްހޫރު ލަވަކިޔުންތެރިޔާ އަންކިތު ތިވާރީގެ ހުށަހެޅުންތައް ހުށަހަޅައިދޭނެއެވެ. އަންކިތުއާއެކު ދިވެހި ފަންނާނުން ވެސް މި ޝޯގައި ލަވަތައް ހުށަހަޅައިދޭނެއެވެ.

މި ޝޯއަކީ ޔޫތު މިނިސްޓްރީއާއި ޓޫރިޒަމް މިނިސްޓްރީ ގުޅިގެން އުރީދޫ، ދިރާގު، މޯލްޑިވިއަން، ފެނަކަ ކޯޕަރޭޝަން، އެމްޓީސީސީ، މޯލްޑިވްސް ޕޯޓްސް ލިމިޓެޑް، އެމްޑަބްލިއުއެސްސީ، ސްޓެލްކޯ އަދި އެސްޓީއޯގެ ބައިވެރިވުމާއެކު ބާއްވާ ޝޯއެކެވެ.