ކޮމަންޑޫ ދާއިރާގެ ބައި-އިލެކްޝަން އޮބްޒަރވް ކުރުމަށާއި މޮނިޓަރަކަށްވުމުގެ ފުރުސަތު ހުޅުވާލައިފި

އަންނަ ފެބްރުއަރީ މަހުގެ 5 ވަނަ ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި-އިލެކްޝަން އޮބްޒަރވް ކުރުމަށާއި މޮނިޓަރ ކުރަން ބޭނުންވާ ފަރާތްތަކަށް އެފުރުސަތު ހުޅުވާލައިފިއެވެ.

އިލެކްޝަން ކޮމިޝަން(އީސީ)ން ކޮށްފައިވާ އިއުލާނެއްގައި ބުނެފައިވަނީ އިންތިޚާބު އޮބްޒަރވްކުރުމަށް ބޭނުންވާ ފަރާތްތަކާއި މޮނިޓަރަކަށް ވާން އެދޭ ފަރާތްތަކަށް އެފުރުސަތު ޑިސެމްބަރ 30ވާ ބުރާސްފަތި ދުވަހުގެ 17:30ން ފެށިގެން 2022 ވަނަ އަހަރުގެ ޖެނުއަރީ މަހުގެ 4 ވާ އަންގާރަ ދުވަހުގެ 15:00އާ ހަމައަށް ފުރުސަތު ހުޅުވާލާފައިވާކަމަށެވެ. ފޯމު ބަލައިގަތުމަށް ހަމަޖެހިފައިވަނީ އީމެއިލް މެދުވެރިކޮށެވެ.

މޮނިޓަރ ކުރުމުގެ ހުއްދަ ދެވޭނީ އުމުން 18 އަހަރުވެފައިވާ ދިވެހިންނަށެވެ. އަދި އެމީހަކީ ޖިނާއީ ކުށެއްގައި ހުކުމް ތަންފީޒުކުރަމުންދާ މީހަކު ކަމުގައި ވެގެން ނުވާނެއެވެ. މީގެއިތުރުން މޯލްޑިވްސް ބްރޯޑްކާސްޓިންގ ކޮމިޝަންގައި ރަޖިސްޓްރީކޮށްފައިވާ ރޭޑިއޯ ނުވަތަ ޓީވީ ސްޓޭޝަނެއްގައި މަސައްކަތްކުރާ މީހެއްކަން އީސީއަށް ކަށަވަރުވާ މީހަކަށް އެމީހަކު ވާންޖެހޭނެއެވެ. އަދި ނޫސް މަޖައްލާފަދަ ތަކެތީގެ ގާނޫނުގެ ދަށުން ރަޖިސްޓްރީކޮށްފައިވާ ނޫސް މަޖައްލާއެއްގައި މަސައްކަތްކުރާ މީހެއްކަން އީސީއަށް ކަށަވަރުވާ މީހަކަށް ވެސް އެމީހަކު ވާންޖެހެނެއެވެ. ނުވަތަ އެމީހަކީ ބައިނަލްއަގްވާމީ މީޑިޔާއެއްގައި މަސައްކަތްކުރާ މީހެއްކަން އީސީއަށް ކަށަވަރުވާންޖެހޭނެއެވެ.

އަދި މޮނީޓަރަކަށް ވާ މީހަކީ ރައްޔިތުންގެ މަޖިލީހުގެ އިންތިޚާބާބެހޭ މަސައްކަތެއް ކުރުމަށް އީސީގެ ފަރާތުން ހަވާލުވެފައި ހުރި މީހަކު ކަމުގައި ވެސް އެމީހަކު ވެގެންނުވާނެއެވެ.

އޮބްޒަރވްކުރުމަށް ހުއްދަދެވެނީ އެމީހަކީ 18 އަހަރުވެފައިވާ ދިވެއްސެއް ނަމައެވެ. އަދި އެމީހަކީ ޖިނާއީ ކުށެއްގައި ހުކުމް ތަންފީޒުކުރަމުންދާ މީހަކު ކަމުގައި ވެގެން ނުވާނެއެވެ. މީގެއިތުރުން އެމީހަކީ ސިޔާސީ ޕާޓީތައް ފިޔަވައި މަދަނީ ޖަމާއަތަކުން ނުވަތަ އަމިއްލަގޮތުން އޮބްޒަރވަރަކަށް ވުމަށް ހުށަހަޅާ ފަރާތެއްނަމަ ސިޔާސީ ޕާޓީއެއްގެ ރަޖިސްޓްރީއެއްގައި އެމީހެއްގެ ނަން ހިމެނިފައިވާ މީހަކަށް ވެގެން ނުވާނެއެވެ.

އަދި އޮބްޒަރވަރަކަށް ވާ މީހަކީ ރައްޔިތުންގެ މަޖިލީހުގެ އިންތިޚާބާބެހޭ މަސައްކަތެއް ކުރުމަށް އީސީގެ ފަރާތުން ހަވާލުވެފައި ހުރި މީހަކު ކަމުގައި ވެސް އެމީހަކުވެގެންނުވާނެއެވެ.

ކޮމަންޑޫ ދާއިރާގެ އިންތިޚާބުގެ ވޯޓު ނެގުމަށް ހަމަޖެހިފައިވަނީ އަންނަ އަހަރުގެ ފެބުރުވަރީ 5ވާ ހޮނިހިރު ދުވަހުގެ ހެނދުނު 8:00ން ހަވީރު 4:00އަށެވެ. މި އިންތިޚާބުގެ ރަސްމީ ނަތީޖާ އިއުލާން ކުރުމަށް ހަމަޖެހިފައިވަނީ ފެބުރުވަރީ 10ވާ ބުރާސްފަތި ދުވަހުއެވެ.