ހުޅުމާލެ ދެވަނަ ފިޔަވަހީގައި އިމާރާތް ކުރަމުންދާ ޕޮލިސް ސްޓޭޝަންގެ މަސައްކަތް ނިންމައި އަންނަ އަަހަރުގެ ކުރީކޮޅު ޚިދުމަތްދޭން ފެށޭނެ ކަމަށް ފުލުހުން ބުނެފިއެވެ.
ފުލުހުން ބުނީ ކުށްމަދު ކުރުމަށް ދެވަނަ ފިޔަވަހީގައި ޚާއްސަ މަސައްކަތްތަކެއް ކުރަމުންދާއިރު، އެސަރަހައްދު ބެލެހެއްޓުމުގެ މަސައްކަތް ވެސް ކުރިއަށްދާ ކަމަށެވެ. ފޭސް ދޭއްގައި ދިރިއުޅޭ ރައްޔިތުންނަށް ފުލުހުންގެ ޚިދުމަތް ގާތުން ފޯރުކޮށްދިނުމަށް ދެ ވަނަ ފޭސްގެ ޕޮލިސް ސްޓޭޝަން އިމާރާތް އެޅުމުގެ މަސައްކަތް ވެސް ބާރު ސްޕީޑުގައި ކުރިއަށްދާ ކަމަށެވެ. އަންނަ އަަހަރުގެ ކުރީކޮޅު ޕޮލިސް ސްޓޭޝަންގެ މަސައްކަތްތައް ނިންމައި ޚިދުމަތްދޭން ފެށޭނެ ކަމަށް ފުލުހުން ބުނެއެވެ. އަދި އެކަށީގެންވާ އަދަދަށް ފުލުހުން ވެސް ހަމަޖެހޭނެ ކަމަށް ފުލުހުން ބުނެއެވެ.
ފޭސް ދެއަކީ ގިނަ ބަޔަކު ޒިޔާރަތްކޮށް އަދި ގިނަ މަސައްކަތްތަކެއް ވެސް ކުރަމުންދާ ސަރަހައްދަކަށް ވުމާއެކު ރައްޔިތުންގެ ސަލާމަތާއި ރައްކާތެރިކަމަށް ޚާއްސަ ސަމާލުކަމެއްދީގެން ފުލުހުން ދަނީ އެސަރަހައްދުގައި ހަރަކާތްތެރިވަމުންނެވެ. އެގޮތުން، ޕެޓްރޯލްކުރުމާއި ކުށުން ރައްކާތެރިކުރުމަށް ރައްޔިތުންނަށް މައުލޫމާތުދީ ހޭލުންތެރިކުރުވުމުގެ ހަރަކާތްތައް ރާވައި ސިލްސިލާކޮށް ދަނީ ހިންގަމުންނެވެ.
ކުށްމަދު އަމާން ވެއްޓެއް ގާއިމުކުރެވިގެންދާނީ ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބިގެންކަން ފާހަގަކޮށް ފުލުހުން ބުނީ އެކްސިޑެންޓުތަކުން ރައްކާތެރިވުމަށް، އެއްގަމު ދަތުރުފަތުރު ކުރުމުގެ ގާނޫނާއި ގަވާއިދުތަކާ އެއްގޮތަށް ރައްކާތެރިކަމާއެކު އުޅަނދު ދުއްވުމަށް އިލްތިމާސްކޮށްފައިވެއެވެ. އުޅަނދު ޕާކުކުރުމުގައި ވެސް އެހެން މީހުންނަށް ދަތިނުވާނޭހޭން ޕާކުކޮށްފައި ބެހެއްޓުމަށް ވަނީ ނަސޭހަތްތެރިވެފައެވެ. ވައްކަންކުރާ މީހުންނަށް ފުރުސަތު ނުލިބޭނޭހެން މުދަލަށް ރައްކާތެރިވުމާއި ދޮރުތައް ރަނގަޅަށް ތަޅުލާފައި ބެހެއްޓުމަށް އިލްތިމާސްކޮށްފައިވެއެވެ.
