އިނގިރޭސި ޕްރިމިއާ ލީގުގައި ބުދަ ދުވަހުގެރޭ ބްރެންޓްފޯޑް އަތުން މޮޅުވެ އެންމެ ފަހުގެ ޗެމްޕިއަން މެންޗެސްޓާ ސިޓީން ތާވަލުގެ އެއްވަނައިގައި އަށް ޕޮއިންޓުގެ ލީޑެއް ނެގިއިރު، އަމިއްލަ ދަނޑުގައި ކުޅުނު މެޗުން ޗެލްސީން ފަހު ވަގުތު ބްރައިޓަންއާ އެއްވަރުވެއްޖެއެވެ.

ރަށުން ބޭރުގައި ކުޅުނު މެޗުން ސިޓީ މޮޅުވީ ބްރެންޓްފޯޑް އަތުން 1-0 ގެ ނަތީޖާއަކުންނެވެ.

މި މެޗުގައި ސިޓީން ކާމިޔާބުކުރި ހަމައެކަނި ލަނޑު ފެނިގެންގޮސްފައިވަނީ މެޗު ފަށައިގެން 16 ވަނަ މިނެޓުގައެވެ. ކެވިން ޑި ބްރޭނާ ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ފިލް ފޯޑެންއެވެ. މި ލަނޑު ޖެހިއިރު، ފޯޑެން އޮފްސައިޑުގައި ހުރި ކަމަށް އެންމެ ފުރަތަމަ ނިންމި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) އިން ވަނީ އެއީ ރަނގަޅު ލަނޑެއް ކަމަށް ނިންމާފައެވެ.

އޭގެ ފަހުން މި މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗު ނިމެން ތިން މިނެޓަށް ވެފައި ވަނިކޮށް ސިޓީގެ އައިމެރިކް ލަޕޯޓް ވަނީ އިތުރު ލަނޑެއް ޖަހާފައެވެ. އެކަމަކު އެ ލަނޑު ޖެހުމުގެ ކުރިން އޭނާ އޮފްސައިޑުގައި ހުރުމުން، ވީއޭއާރުން އެ ލަނޑު ބަލައިގެންފައެއް ނުވެއެވެ.

މި މެޗުން މޮޅުވެ ސިޓީން ތާވަލުގެ އެއްވަނައިގައި ލީޑު ފުޅާކުރިއިރު، ބުދަ ދުވަހުގެރޭ ކުޅުނު މެޗުން ޗެލްސީ ވަނީ ބްރައިޓަންއާ 1-1 ގެ ނަތީޖާއަކުން އެއްވަރުވެފައެވެ.

މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ޗެލްސީންނެވެ. މެޗުގެ 28 ވަނަ މިނެޓުގައި މޭސަން މައުންޓް ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ރޮމެލޫ ލުކާކޫއެވެ. މި މެޗުގެ ދެވަނަ ހާފުގައި ބްރައިޓަނުން ގިނަ ފުރުސަތުތަކެއް ތަނަވަސްކުރިއިރު، މެޗުގެ އިތުރު ވަގުތުގައި އެ ޓީމުން ވަނީ ނަތީޖާ އެއްވަރުކޮށްފައެވެ. މާކް ކުކުރޭލާ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޑެނީ ވެލްބެކެވެ.

މި ނަތީޖާތަކާއެކު ތާވަލުގެ އެއްވަނައިގައި ސިޓީ އޮތީ ކުޅުނު 20 މެޗުން 50 ޕޮއިންޓް ހޯދައިގެންނެވެ. އަދި ބްރައިޓަނާ އެއްވަރުކުރި ޗެލްސީން ތާވަލުގެ ދެވަނައަށް ޖެހިލިއިރު، އެ ޓީމަށް ވަނީ 20 މެޗުން 42 ޕޮއިންޓް ލިބިފައެވެ. އަދި ތިންވަނައިގައި އޮތް ލިވަޕޫލަށް 19 މެޗުން 41 ޕޮއިންޓް ލިބިފައިވާއިރު، ދެން ލިވަޕޫލަށް ކުޅެން އޮތީ ޗެލްސީ މެޗެވެ.