މޭރީގެ މަރު: ލަމްހާއާއި މާވިންއަށް ދައުވާކުރުމާމެދު އަންގާރަ ދުވަހުގެ ކުރިން ގޮތެއް ނިންމަނީ
މޭރީ މަރުވެފައިވަނީ ލިބުނު ޒަޚަމްތަކުގެ ސަބަބުން
ލީމަތު ލަމްހާއާއި، މޭރީގެ ފިރިމީހާ މާވިން
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސް މަރާލި މައްސަލައިގައި ހައްޔަރުކުރި ދިވެހި އަންހެން މީހާ ހަލީމަތު ލަމްހާއާއި، މޭރީގެ ފިރިމީހާ މާވިންއަށް ދައުވާ ކުރުމާމެދު އަންނަ ހަފްތާގެ އަންގާރަ ދުވަހުގެ ކުރިން ގޮތެއް ނިންމާނެކަމަށް ޕްރޮސެކިއުޓަރ ޖެނެރަލް އޮފީހުން ބުނެފިއެވެ.
އައިޖީއެމްއެޗްގެ ޑައިލިސިސް ސެންޓަރުގައި މަސައްކަތް ކުރަމުންދިޔަ މޭރީ ގްރޭސްގެ މަރުގެ މައްސަލައިގައި ފުލުހުން އެންމެ ފުރަތަމަ ހައްޔަރުކޮށްފައިވަނީ މޭރީ ގްރޭސްގެ ފިރިމީހާ މާވިން، 29 އެވެ. އެއީވެސް އައިޖީއެމްއެޗްގައި މަސައްކަތް ކުރަމުންދާ ނަރުހެކެވެ. މޭރީގެ މަރުގެ ތުހުމަތުގައި އޭނާ ހައްޔަރުކުރީ 27 އޮކްޓޯބަރު ވީ ބުދަ ދުވަހުއެވެ.
މި މައްސަލައިގައި ދެވަނައަށް ހައްޔަރުކޮށްފައިވާ ދިވެހި އަންހެން މީހާ، ލަމްހާ އަކީ މާވިންއާ ލޯބީގެ ގޮތުން ގުޅުން އޮންނަ މީހެއް ކަމަށް މައުލޫމާތު ލިބެއެވެ.
މޭރީގެ މަރުގެ ތަހުގީގު ނިންމައި ދައުވާކޮށްދިނުން އެދި ފުލުހުންގެ ފަރާތުން ޕީޖީ އޮފީހަށް ފޮނުވާފައިވަނީ މިދިޔަ ހަފްތާގެ އާދިއްތަ ދުވަހުއެވެ. އެ މައްސަލައާމެދު އަންނަ ހަފްތާގެ އަންގާރަ ދުވަހުގެ ކުރިން ގޮތެއް ނިންމާނެކަމަށް ޕީޖީ އޮފީހުން ބުނެއެވެ. މި މައްސަލައާ ގުޅިގެން 24 އަހަރުގެ ލަމްހާ ހައްޔަރުކުރިކަން ފުލުހުން ހާމަކުރީ 16 ޑިސެމްބަރުގައެވެ.
މޭރީ ގްރޭސްގެ މަރާ ގުޅިގެން ފުލުހުން ތުހުމަތުތައް ކުރަން ފެށީ، ދަން ޖެހިފައި ހުރި ކަމަށް ބުނެ އޭނާ ހޮސްޕިޓަލަށް ގެންދިޔަ ނަމަވެސް، އޭނާގެ ހަށިގަނޑުން ދަން ޖެހިފައި ހުރިކަމުގެ ނިޝާނެއް ފެންނަން ނެތުމުންކަމަށް މައުލޫމާތު ލިބެއެވެ. އެހެންކަމުން އޭނާ މަަރުވި ސަބަބު ދެނެގަތުމަށް ފުލުހުން ވަނީ އޭނާގެ ހަށިގަނޑު އިންޑިއާއަށް ފޮނުވައިގެން ޕޯސްޓްމޯޓަމް ހަދާފައެވެ. ޕޯސްޓްމޯޓަމަށް ފަހު އޭނާގެ ހަށިގަނޑު އަނބުރާ ގެނެސްފައިވަނީ ނޮވެމްބަރު މަހުގެ 7 ވަނަ ދުވަހުއެވެ. އަދި ނޮވެމްބަރު 10 ވަނަ ދުވަހު އާއިލާއާ ހަވާލުކުރުމަށް ފިލިޕީންސަށް އޭނާގެ ހަށިގަނޑު ވަނީ ފޮނުވާފައެވެ.
ޕޯސްޓްމޯޓަމް ރިޕޯޓުން އެނގޭގޮތުގައި މޭރީ މަރުވެފައިވަނީ ލިބުނު ޒަޚަމްތަކުގެ ސަބަބުން ކަމަށް ފުލުހުން ބުނެފައިވެއެވެ.
މޭރީގެ ޕޯސްޓްމޯޓަމް ރިޕޯޓާ ގުޅިގެން ފުލުހުން ބުނެފައިވަނީ, އޭނާ މަރުވެފައިވަނީ ދަންޖެހިގެން ކަމަށް ނުބެލެވޭ ކަމަށެވެ. އަދި މަރުވެފައިވަނީ ބްލަންޓް އިންޖަރީއެއްގެ ސަބަބުން ކަމަށެވެ. ބްލަންޓް އިންޖަރީއަކީ ގަދަކަމުން މީހަކަށް އަނިޔާއެއްދީގެން ނުވަތަ އެއްޗަކުން ޖަހައިގެން ލިބޭ އަނިޔާއަކުން ނުވަތަ ގެއްލުމަކުން ވާ މަރެކެވެ.
