ޖެނުއަރީ މަހުގެ ފުރަތަމަ ދުވަހު 4 ގެއެއްގައި ހޯމް ސްޓޭ ފަތުރުވެރިކަން ފެށޭނެ: ޓޫރިޒަމް މިނިސްޓްރީ
29 ޑިސެމްބަރު 2021 | ބުދަ 13:26ފަތުރުވެރިކަން ކުރިއެރުވުމަށް ކުރި މަސައްކަތް ވަރަށް ކާމިޔާބު
ޓޫރިޒަމް މިނިސްޓްރީން ބޭއްވި ނޫސްވެރިންގެ ބައްދަލުވުން
ޖެނުއަރީ މަހުގެ ފުރަތަމަ ދުވަހު 4 ގެއެއްގައި ހޯމް ސްޓޭ ފަތުރުވެރިކަން ފެށޭނެ ކަމަށް ޓޫރިޒަމް މިނިސްޓްރީން ބުނެފިއެވެ.
ފަތުރުވެރިކަމުގެ ސިނާއަތާގުޅޭ އެންމެފަހުގެ މައުލޫމާތު ހިއްސާ ކުރުމަށް ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ޓޫރިޒަމް މިނިސްޓްރީގެ ސީނިއަރ އެގްޒެކްޓިވް ޑިރެކްޓަރ އަލީ ރައްޒާން ވިދާޅުވީ، ފަތުރުވެރިކަން ކުރިއެރުމަށް ކުރި މަސައްކަތް ވަރަށް ކާމިޔާބު ކަމަށާއި، ބޮޑު ކުރިއެރުމެއް ލިބިފައިވާ ކަމަށެވެ. ޖެނުއަރީ މަހުގެ އެއްވަނަ ދުވަހުން ފެށިގެން ހޯމް ސްޓޭ ފަތުރުވެރިކަން ތައާރަފު ކުރުމަށް މަސައްކަތް ކުރަމުންދާ ކަމަށް ރައްޒާން ވިދާޅުވިއެވެ.
އެންމެ ފުރަތަމަ ހޯމް ސްޓޭ ތައާރަފްކުރަނީ މ. ދިއްގަރުގައި ކަން ފާހަގަކުރައްވައި ރައްޒާން ވިދާޅުވީ، އެރަށުގެ ރައްޔިތުން ތިބީ ހޯމް ސްޓޭ ތައާރަފްކުރުމަށް ތައްޔާރަށް ކަމަށާއި، ގިނަ ބަޔަކު ޝައުގުވެރިކަން ފާޅުކޮށްފައިވާކަމަށެވެ. އަދި ކައުންސިލްގެ އަމާޒަކީ ޖެނުއަރީ މަސް ނިމޭއިރު ހޯމް ސްޓޭއަށް 50 އެނދު ނެރެ، ކައުންސިލްގެ ދައުރު ނިމުމުގެ ކުރިން 200 އެނދު ހޯމް ސްޓޭއަށް ނެރުމަށް ކަމަށް ރައްޒާން ވިދާޅުވިއެވެ.
ރައްޒާން ވިދާޅުވީ، ހޯމް ސްޓޭއާއެކު ފަތުރުވެރިކަމުގެ ސިނާއަތަށް ކުރިއެރުން ލިބޭނެ ކަމަށާއި، އިގުތިސާދަށް ފައިދާތައް ލިބިގެންދާނެ ކަަމަށެވެ. އަދި އަތޮޅުތެރޭގެ ރަށްރަށުގެ ތަރައްގީއަށް ވަރަށް ބޮޑު ކުރިއެރުމެއް ލިބޭނެ ކަމަށް އޭނާ ވިދާޅުވިއެވެ. ކުދި ވިޔަފާރިތައް އުފެދިގެން ގޮސް ރައްޔިތުންނަށް ބޮޑު ފައިދާއެއް ކުރާނެކަން ރައްޒާން ފާހަގަކުރެއްވިއެވެ.
ރައްޒާން ވިދާޅުވީ ހޯމް ސްޓޭ ހުރިހާ ރަށެއްގައި ތައާރަފްުކުރެވި، ބޮޑު ވާދަވެރިކަމެއް އުފެދިގެންދާނެ ކަަމަށެވެ. އަދި ގެސްޓް ހައުސް ވިޔަފާރިތަކަށް ގެއްލުން ލިބޭނެ ކަމަށް ދެކެވޭ ވާހަކަތަކަށް އިޝާރަތް ކުރައްވައި ރައްޒާން ވިދާޅުވީ، ވިޔަފާރިއަށް ގެއްލުމެއް ނުލިބޭނެ ކަމަށާއި، ހޯމް ސްޓޭއަށް، ގެސްޓްހައުސް ހިންގަމުންދާ ގިނަ އޯނަރުން ތާއީދު ކުރާ ކަމަށެވެ. އަދި މިއީ އެބޭފުޅުންގެ ވިޔަފާރި ވެސް ކުރިއެރުމަށް ލިބޭ ފުރުސަތެއް ކަމަށާއި، މިހާރު ރާއްޖެއަށް ނުލިބޭ ގިނަ މާކެޓްތަކާއި، އިންވެސްޓަރުންގެ ފަރާތުން ފަހި ފުރުސަތުތައް ލިބިގެންދާނެ ކަމަށެވެ.
ހޯމް ސްޓޭ ފަތުރުވެރިކަމަކީ، އެރަށެއްގައި ދިރިއުޅޭ ބަޔަކާއިއެކު އެއްގެއެއްގައި ފަތުރުވެރިން ޗުއްޓީ ހޭދަ ކުރާ ބާވަތުގެ ފަތުރުވެރިކަމެވެ.
