މެދުޒިޔާރަތުގެ ތަޅު ރަނގަޅުކޮށް، ނޯޓިސް ހަރުކޮށްފި
29 ޑިސެމްބަރު 2021 | ބުދަ 13:52މެދުޒިޔާރަތް ހުންނަނީ ރިޔާސީ ގަނޑުވަރު މުލީއާގެއާ އިންވެގެން
މެދުޒިޔާރަތުގެ އެތެރޭގައި ފަތުރުވެރިންތަކެއް
މެދުޒިޔާރަތުގެ ތަޅު ރަނގަޅުކޮށް، ނޯޓިސް ހަރުކޮށްފައިވާ ކަމަށް ސަގާފީ ތަރިކަ ރައްކާތެރި ކުރާ ގައުމީ މަރުކަޒުން ބުނެފިއެވެ.
މެދުޒިޔާރަތުގެ ތަޅު ދޭތެރެދޭތެރެއިން ހަލާކުވެފައި ހުރެއެވެ. އެއީ ތަޅުލާފައި ހުރި ނަމަވެސް، ނޭނގި ނަމަވެސް ބައެއް މީހުން ތަޅުގައި ހިފައި، ހުޅުވުމަށް މަސައްކަތް ކުރާތީ ކަމަށް މައުލޫމާތު ލިބެއެވެ. އަދި އަންގާރަ ދުވަހުގެ ވަގުތެއްގައި މެދުޒިޔާރަތުގެ އެތެރެއަށް ބަޔަކު ވަދެ އެތަނުގެ ފާރުބުރިތައް މަތީގައި އިށީނދެ ތިބި ފޮޓޯތަކެއް ސޯޝަލް މީޑިއާގައި އާއްމުވެގެން ގޮސްފައިވާއިރު، ބައެއް މީހުންގެ ފާޑު ކިޔުން ވެސް ހެރިޓޭޖް މިނިސްޓްރީއަށް ވަނީ އަމާޒުވެފައެވެ.
މިކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ހެރިޓޭޖް މިނިސްޓްރީގެ ޑިރެކްޓަރ ކޮމިއުނިކޭޝަން އިސްމާޢީލް ނާއިލް ނަޝީދު ވިދާޅުވީ އެމައްސަލަ ސަމާލުކަމަށް އައިސްފައިވާ ކަމަށާއި، ބެލިބެލުމުން އެއީ ތަޅު ހަލާކުވެފައި ހުރުމުން ދިމާވި ކަމެއް ކަމަށެވެ. އަދި އެފަތުރުވެރިންތައް އެތަނަށް ވަދެފައިވަނީ އެތެރެއަށް ވަނުން މަނާކަން ނޭނގި ކަމަށް ނާއިލް ވިދާޅުވިއެވެ.
ނާއިލް ވިދާޅުވީ މިހާރު އެމައްސަލަ ހައްލު ކުރެވިފައިވާ ކަމަށާއި، ތަޅު ބަދަލުކޮށްފައިވާ ކަމަށެވެ. އަދި އާއްމުކޮށް އެނގޭނެހެން ބޮޑުކޮށް ނޯޓިސްއެއް ހަރުކޮށްފައިވާ ކަމަށް ނާއިލް ވިދާޅުވިއެވެ.
މެދުޒިޔާރަތް ހުންނަނީ ރިޔާސީ ގަނޑުވަރު މުލީއާގެއާ އިންވެގެންނެވެ. މުލީއާގެއަކީ 24 ގަޑިއިރު ސިފައިން ސަލާމަތީ ކަންކަން ބަލަހައްޓާ އިމާރާތަކަށްވާއިރު، މެދުޒިޔާރަތުގައި ލަކުޑިން ހަދާފައި ހުރި އިހުގެ ދޮރުގައި ހިމެނޭ ތަންޑާއި ތަޅު ބަޔަކު މީހުން ވަނީ ހަލާކޮށްލިއިރު ސިފައިން އެކަން ހުއްޓުވާފައިނުވާތީ އެކަަމާއި ވެސް ގިނަ ބަޔަކު ސުވާލު އުފައްދާފައިވެއެވެ.
މާލޭ މެދުޒިޔާރަތަކީ ރާއްޖެއަށް އިސްލާމްދީނުގެ އަލިކަން ގެނެސްދެއްވި ފާރިސްކަރައިގެ ތަބްރޭޒަށް ނިސްބަތްވެވަޑައިގަންނަވާ ޔޫސުފް ތަބްރޭޒީގެފާނު ފަސްދާނުލެވިފައިވާ ޒިޔާރަތެވެ. ތަންކޮޅެއްފަހުން އެބޭކަލަކީ މަޣުރިބުކަރައިގެ އަބުލްބަރަކާތު ޔޫސުފުލް ބަރުބަރީ ކަމަށްވެސް ބައެއް ބޭފުޅުން ވިދާޅުވެއެވެ. ރާއްޖެއަށް އިސްލާމްދީން ތައާރަފުވީ މީލާދީން 1153 ވަނަ އަހަރުއެވެ.
