އަންގާރަ ދުވަހު ރިސޯޓުތަކުން 71 މީހުން ޕޮޒިޓިވްވެއްޖެ
28 ޑިސެމްބަރު 2021 | އަންގާރަ 17:49މާލެ ސަރަހައްދުން ޕޮޒިޓިވްވީ 47 މީހުން
ލިލީ ބީޗް ރިސޯޓް
އަންގާރަ ދުވަހު ރިސޯޓުތަކުން 71 މީހުން ކޮވިޑަށް ޕޮޒިޓިވްވެފައިވާކަމަށް ޕްރޮޓެކްޝަން އެޖެންސީ (އެޗްޕީއޭ)އިން ހާމަކޮށްފިއެވެ.
އެޗްޕީއޭއިން ބުނީ ހޯމަ ދުވަހުގެ އިރުއޮއްސި 06:00އިން އަންގާރަ ދުވަހުގެ އިރުއޮއްސި 06:00އަށް 4،224 ސާމްޕަލް ޓެސްޓުކޮށްފައިވާކަމަށެވެ. މީގެ ތެރެއިން ޕޮޒިޓިވްވީ 190 މީހުންނެވެ. އެއީ މާލެ ސަރަހައްދުން ޕޮޒިޓިވްވި 47 މީހުންނާއި، އަތޮޅުތެރެއިން ޕޮޒިޓިވްވި 71 މީހުންނާއި އަދި ހިންގަމުންދާ ރިސޯޓުތަކުންވެސް ޕޮޒިޓިވްވި 71 މީހުން ކަމަށް އެޗްޕީއޭއިން ބުނެފައިވެއެވެ. އަދި ލިވްއެބޯޑްތަކުން އެކަކު ޕޮޒިޓިވްވެފައިވާކަމަށް އެޗްޕީއޭއިން ބުނެފައިވެއެވެ.
އެޗްޕީއޭއިން ބުނީ މިހާތަނަށް ރާއްޖެއިން ޕޮޒިޓިވްވި މީހުންގެ އަދަދު 95،222އަށް އަރާފައިވާކަމަށެވެ. މިވަގުތު އެކްޓިވް ކޭހުގެ ގޮތުގައި 2،127 ކޭހެއް ގުނަމުންދާކަމަށާއި، މީގެ ތެރެއިން 11 މީހަކަށް ހޮސްޕިޓަލުތަކުގައި އެޑްމިޓުކޮށްގެން ފަރުވާދެމުންގެންދާ ކަމަށް އެޗްޕީއޭއިން ބުނެފައިވެއެވެ.
މިހާތަނަށް ބަލިން ފަސޭހަވި މީހުންގެ ޖުމްލަ 92،820އަށް އަރައެވެ. ބަލީގައި 262 މީހަކު ވަނީ ނިޔާވެފައެވެ.
