ކޮވިޑް-19 ޖެހިގެން ރާއްޖެއިން ނިޔާވި މީހުންގެ އަދަދު 262ށް އަރައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ، އަންގާރަ ދުވަހުގެ ހެނދުނު 5:30ގައި އުމުރުން 86 އަހަރުގެ ދިވެހި އަންހެނަކު ކޮވިޑް ޖެހިގެން ނިޔާވެފައިވާކަމަށެވެ. މިމީހާ ނިޔާވެފައިވަނީ ތ. ވިލުފުށީ ހެލްތު ސެންޓަރުގައި ކަމަށް އެޗްޕީއޭއިން ބުނެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ ތަފާސްހިސާބުތަކަށް ބަލާއިރު، ކޮވިޑް-19 ޖެހިގެން، މި ޑިސެމްބަރ މަހުގެ މިހާތަނަށް 12 މީހަކު ވަނީ ނިޔާވެފައެވެ. ޑިސެމްބަރ މަހުގެ 1 ވަނަ ދުވަހު އުމުރުން 79 އަހަރުގެ ދިވެހި ފިރިހެނަކު ކޮވިޑް ޖެހިގެން ނިޔާވެފައިވާއިރު، ޑިސެމްބަރ މަހުގެ 4 ވަނަ ދުވަހު 93 އަހަރުގެ ދިވެހި ފިރިހެނަކު ވަނީ ނިޔާވެފައެވެ. އަދި ހަމަ އެދުވަހު 92 އަހަރުގެ ދިވެހި ފިރިހެނަކު ވަނީ ކޮވިޑް ޖެހިގެން ނިޔާވެފައެވެ. ޑިސެމްބަރ މަހުގެ 5 ވަނަ ދުވަހު 77 އަހަރުގެ ދިވެހި އަންހެނަކު ކޮވިޑް ޖެހިގެން ނިޔާވިއިރު، ހަމަ އެދުވަހު ވަނީ 79 އަހަރުގެ ދިވެހި ފިރިހެނަކުވެސް ކޮވިޑް ޖެހިގެން ނިޔާވެފައެވެ.

ޑިސެމްބަރ މަހުގެ 10 ވަނަ ދުވަހު އުމުރުން 82 އަހަރުގެ ދިވެހި ފިރިހެނަކު ކޮވިޑް ޖެހިގެން ނިޔާވިއިރު ޑިސެމްބަރ މަހުގެ 11 ވަނަ ދުވަހު އުމުރުން 83 އަހަރުގެ ދިވެހި ފިރިހެނަކު ވަނީ ނިޔާވެފައެވެ. ޑިސެމްބަރ މަހުގެ 12 ވަނަ ދުވަހުގެ އުމުރުން 80 އަހަރުގެ ދިވެހި އަންހެނަކު ނިޔާވިއިރު ޑިސެމްބަރ މަހުގެ 15 ވަނަ ދުވަހު 62 އަހަރުގެ ދިވެހި ފިރިހެނަކު ވަނީ ނިޔާވެފައެވެ. އަދި ޑިސެމްބަރ މަހުގެ 20 ވަނަ ދުވަހު އުމުރުން 85 އަހަރުގެ ދިވެހި ފިރިހެނަކު ވަނީ ކޮވިޑް ބަލީގައި ނިޔާވެފައެވެ. އަދި ޑިސެމްބަރ މަހުގެ 21 ވަނަ ދުވަހު އުމުރުން 66 އަހަރުގެ ދިވެހި ފިރިހެނަކު ނިޔާވެފައިވާކަމަށާއި، އޭނާ ނިޔާވީ ބުދަ ދުވަހުގެރޭ 10:50ގައި ކަމަށް އެޗްޕީއޭއިން ބުނެފައިވެއެވެ.

ކޮވިޑް-19 ޖެހިގެން ނޮވެމްބަރ މަހު 7 މީހަކު ވަނީ ނިޔާވެފައެވެ.