ޗުއްޓީއަށް ދާއިރު ގޭގެ ސަލާމަތީ ފިޔަވަޅުތައް ވަރުގަދަކުރުން މުހިންމު
ވައްކަމުގެ މައްސަލަތައް މަދުކުރުމަށް ރައްކާތެރިކަމުގެ ފިޔަވަޅު އެޅުން މުހިންމު
ޗީފް އިންސްޕެކްޓަރ އޮފް ޕޮލިސް ސުލްތާން އަހުމަދު ބިޝާރު
ބޮޑު ބަންދާ ދިމާކޮށް މާލޭގައި ދިރިއުޅޭ ގިނަ ބަޔަކު އަތޮޅުތެރޭގެ ރަށްރަށަށް ދަތުރުކުރަމުން ދާއިރު، ގޭގެ ސަލާމަތީ ފިޔަވަޅުތައް އިތުރަށް ހަރުދަނާކޮށް ވަރުގަދަކުރުމަކީ ވަރަށް މުހިންމުކަމެއް ކަމަށް ފުލުހުން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން، ގަލޮޅު ޕޮލިސްގެ ހެޑް އޮފް ޕޮލިސްގެ މަގާމުގައި ހުންނެވި ޗީފް އިންސްޕެކްޓަރ އޮފް ޕޮލިސް ސުލްތާން އަހުމަދު ބިޝާރު، ވިދާޅުވީ ކޮންމެ އަހަރެއްގެ ވެސް ބޮޑުބަންދާ ދިމާކޮށް ގިނަބަޔަކު ރަށްރަށަށް ދަތުރުކުރުމުން ގޭގެއިން ވައްކަންކުރުމުގެ މައްސަލަތައް ފެންމަތިވާ ކަމަށެވެ. އަދި މިފަހަކަށް އައިސް ވަރަށް ގިނަ ގޮތްގޮތަށް ވައްކަން ކުރާކަން ފާހަގަކުރައްވައި، ސުލްތާން ވިދާޅުވީ ގިނަފަހަރަށް ވައްކަންކުރަނީ އެކަން ކުރާ މީހުންނަށް ލިބޭ ފުރުސަތުގެ ބޭނުން ހިފައިގެން ކަމަށެވެ. އެހެންކަމުން މިފަދަ މައްސަލަތައް ހުއްޓުވުމަށްޓަކައި ފަރުދީ ޒިންމާ އަދާކުރުމުގެ މުހިންމުކަމަށް ސުލްތާން އަލިއަޅުވާލިއެވެ.
މީގެ އިތުރުން، ގޭގެ ހާލަތު ބެލުމަށް ސެކިއުރިޓި ސިސްޓަމް ހަރުކޮށް، ސީސީޓީވީ ކެމެރާ މެދުވެރިކޮށް ގޭގެ ހާލަތު ބެލޭނެ ނިޒާމެއް ހޯދުމުގެ މުހިންމުކަން ސުލްތާން ފާހަގަކުރެއްވިއެވެ. ސުލްތާން ވިދާޅުވީ މިއީ ކޮންމެ ފަރާތަކަށް ނުކުރެވިދާނެ ކަމަކަށް ވާތީ ގެ ބެލެމަށް ، އިތުބާރުހުރި މީހަކާ ހަވާލުކޮށްފައި ދިއުމަކީ ވެސް ބުއްދިވެރި ގޮތެއް ކަމަށެވެ. އަދި މިފަދަ ކަމެއް ނުކުރެވޭފަދަ ހާލަތެއް ދިމާވެއްޖެ ނަމަ އެންމެ ކައިރީގައި ހުންނަ ފުލުހުންގެ އިދާރާއަކަށް ނުވަތަ ނެއިބާހޫޑް ޕޮލިހާ މައުލޫމާތު ހިއްސާކުރުމަށް ސުލްތާން އެދިވަޑައިގަތެވެ.
ހަމައެހެންމެ ވައްކަމުގެ މައްސަލަތައް ސީސީޓީވީ ކެމެރާތަކުން ރެކޯޑު ކުރެވުނަސް އެކަން ކުރި ބަޔަކު ދެނެގަތުމުގައި ދަތިތަކެއް ދިމާވާ ފަހަރު އަންނަކަން ފާހަގަކުރައްވައި ސުލްތާން ވިދާޅުވީ އެއީ ކޮންބައެއްކަން ނޭންގޭ ހާލަތުގައި ވެސް ކެމެރާތަކުގެ ސަބަބުން ފޭރޭ ތަކެތި ހޯދުމުގައި ފަސޭހަވެގެންދާ ކަމަށެވެ. އަދި މިތަކެތި ލިބުމުން ރައްޔިތު މީހާއަށް ކޮންމެވެސް ވަރެއްގެ ހިތްހަމަޖެހުމެއް ލިބިގެންދާ ކަމަށެވެ.
ވައްކަމާއި މީހުންގެ މުދަލަށް ގެއްލުން ދިނުމުގެ މައްސަލައިގެ އިތުރުން ޗުއްޓީ ދުވަސްވަރުގައި ކަނޑުމަތީގެ ހާދިސާތައް ވެސް ހިނގަމުން އާދެއެވެ. ސުލްތާން ވިދާޅުވީ މިކަންކަމަށް ކުރިއާލައި ރައްކާތެރިކަމުގެ ފިޔަވަޅުތައް އަޅަންޖެހޭ ކަމަށެވެ. އެގޮތުން ދަތުރުކުރާއިރު މޫސުމަށް ސަމާލުކަން ދިނުމާއި، ކަނޑައެޅުފައިިވާ އަދަދަށްވުރެ އިތުރަށް މީހުން އުޅަނދަށް ނޭރުވުމަށް ސުލްތާން އިލްތިމާސް ކުރެއްވިއެވެ. ހަމައެހެންމެ ލައިފް ޖެކެޓް ނޭޅުމުގެ ސަބަބުން ކަނޑުމަތީގެ ހިތާމަވެރި އެތައް ހާދިސާތަކެއް ހިނގާފައިވާކަން ފާހަގަކުރައްވައި ސުލްތާން ވިދާޅުވީ، ކޮންމެ ދަތުރެއްގައި ވެސް ލައިފް ޖެކެޓު އެޅުމަކީ ކޮންމެހެން ކުރަންޖެހޭ ކަމެއް ކަމަށެވެ. އަދި މިހާރު ވެސް ގިނަ ބަޔަކު ލައިފް ޖެކެޓް ނާޅާ ދަތުރުކުރާކަން ސުލްތާން ފާހަގަކުރެއްވިއެވެ.
