ސިވިލް ސަރވަންޓުންގެ ދައުރަކީ ވަކި ޕާޓީއަކަށް ބެލުމެއްނެތި ސިޔާސަތުތައް ތަންފީޒުކުރުން: ރައީސް

ސިވިލް ސަރވިސް މުވައްޒަފުންގެ ދައުރަކީ ވަކި ޕާޓީއަކަށް ބެލުމެއްނެތި އެއިރެއްގައި އޮތް ސަރުކާރެއްގެ ސިޔާސަތުތައް ތަންފީޒުކުރުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ރައީސް މިފަދައިން ވިދާޅުވީ ހިންގުމުގެ ދާއިރާގެ އިސް މުވައްޒަފުންގެ ހުނަރާއި ގާބިލުކަން އިތުރުކުރުމުގެ ޕްރޮގްރާމް އިފްތިތާހުކޮށްދެއްވައި ދެއްކެވި ވާހަކަފުޅުގައެވެ. ރައީސް ވިދާޅުވީ ސަރުކާރެއް ހިންގިގެންދަނީ ސިޔާސީ މަގާމުތަކުގައި ތިބޭ މުވައްޒަފުންނާއި، ސިވިލް ސަރވިސް މުވައްޒަފުން ގުޅިގެން ކުރާ މަސައްކަތުން ކަމަށެވެ.

ސިވިލް ސަރވިސް މުވައްޒަފުން މަސްއޫލިއްޔަތު އަދާކުރާއިރު، ސަރުކާރުގައި ތިބީ ކޮން ބައެއްތޯ ބެލުމަކީ އެމީހުންގެ ދައުރެއް ނޫން ކަމަށް ރައީސް ވިދާޅުވިއެވެ. ސިވިލް ސަރވިސްގެ ދައުރަކީ އެއިރަކު އޮންނަ ސަރުކާރެއްގެ ސިޔާސަތުތައް ތަންފީޒުކުރުން ކަމަށް ރައީސް ވިދާޅުވިއެވެ.

ގައުމީ ތަރައްގީއާ ގުޅިގައިވާ މަސައްކަތްތައް މިހާރުވެސް ކުރިއަށްގެންދާ ކަމަށާއި، މިއީ ހަމައެކަނި ސިޔާސަތެއް ކަނޑައަޅައިގެން ހާސިލްކުރެވޭނެ ކަމެއް ނޫން ކަމަށް ރައީސް ވިދާޅުވިއެވެ. މި ސިޔާސަތުތައް ތަންފީޒުކުރެވޭނީ އެކަން ކުރުމުގެ އެންމެ ކުރީ ސަފުގައި ތިއްބެވި ސިޔާސީ މުވައްޒަފުންގެ ވެސް މަސައްކަތުން ކަމަށް ރައީސް ވިދާޅުވިއެވެ.

އަދި މިކަންކަމަށް އެހިތެރިވެދޭން ތިބޭ ބަޔަކީ ސިވިލް ސަރވިސް މުވައްޒަފުން ކަމަށް ރައީސް ވަނީ ވިދާޅުވެފައެވެ. އެހެންކަމުން ވަކި މަސައްކަތެއް ނުނިމިއްޖެނަމަ އެ ފެއިލްވަނީ އެ އޮފީހެއްގެ ސިވިލް ސަރވިސް މުވައްޒަފުންނެއް ނޫން ކަމަށް ރައީސް ވިދާޅުވިއެވެ.

ރައީސް ވިދާޅުވީ ސަރުކާރުގެ އިދާރާތަކުން ރައްޔިތުންނަށް ދޭ ޚިދުމަތުގެ ފެންވަރު ރަނގަޅުކުރެވޭނީ އިންސާނީ ވަސީލަތް ތަރައްގީކުރެވިގެން ކަމަށެވެ. މިގޮތުން އިންސާނީ ވަސީލަތް ތަރައްގީކުރުމުގެ މަޤްޞަދުގައި މި ފެށޭ ޕްރޮގްރާމުގެ ސަބަބުން ސަރުކާރުގެ އިދާރާތަކުން ފޯރުކޮށްދޭ ޚިދުމަތުގެ ފެންވަރު މިހާރަށްވުރެ ރަނގަޅުވެގެންދާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން ތައާރަފުވި ޓެކްނޮލޮޖީއާއެކު ސަރުކާރާއި ރައްޔިތުންނާ ދެމެދު ކުރެވޭ މުއާމަލާތްތައް ވެސް ކުރިއަށްވުރެ ފަސޭހައިން ކުރެވޭނެ އިންތިޒާމު ހަމަޖެހިފައިވާކަމަށް ރައީސް ވިދާޅުވިއެވެ. މީގެ ކުރިން މިކަން ކޮށްފައިވަނީ ސިޓީބިޓީ ބަދަލުކޮށްގެން ކަމަށާއި، އެހެންނަމަވެސް މިހާރު ގަވް ޑޮޓް އެމްވީއަށް މެސެޖެއް ކޮށްގެން މިކަން ކުރެވޭ ކަމަށް ރައީސް ވިދާޅުވިއެވެ.

ސަރުކާރުގެ ޑިޖިޓަލައިޒޭޝަން ސިޔާސަތުގެ ދަށުން ސަރުކާރު އޮފީސްތަކުގެ މަސައްކަތްތައް ދެން ދާނީ ފަސޭހަވަމުން ކަމަށް ރައީސް ވިދާޅުވިއެވެ. މިއާއެކު މިކަންކަމަށް ގާބިލް ބަޔަކުވެސް އުފައްދަންޖެހޭކަމަށް ވިދާޅުވިއެވެ. މިފަދަ މަސައްކަތެއް މިހާރު ފެށިފައިވާއިރު، އުންމީދަކީ ސަރުކާރުގެ އޮފީސްތަކުން ފޯރުކޮށްދޭ ޚިދުމަތްތަކަކީ ރައްޔިތުން ބަލައިގަންނަ ފަދަ ޚިދުމަތްތަކަކަށް ވެގެންދިއުން ކަމަށް ރައީސް ވިދާޅުވިއެވެ.