ރާއްޖެއާ ދެކޮޅަށް މެޗުތަކެއް ކުޅެން ނޭޕާލުން ހުށަހަޅައިފި

އަންނަ ޖެނުއަރީ މަސްތެރޭގައި ރާއްޖެއާ ދެކޮޅަށް މެޗެއް ކުޅެން ނޭޕާލްގެ ހުށަހެޅުމެއް ލިބިފައިވާ ކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.

ނޭޕާލުގެ މީޑިއާތަކުން ރިޕޯޓްކޮށްފައިވާ ގޮތުގައި އަންނަ މަސްތެރޭގައި ރާއްޖެއާ ދެކޮޅަށް ނޭޕާލުން ދެ މެޗު ކުޅުމުގެ ކަންކަން މިހާރު އަންނަނީ މަޝްވަރާ ކުރެވެމުންނެވެ. އަދި މެޗުތައް ކުޅޭނީ ނޭޕާލުގެ ޕޮކާރާ ސްޓޭޑިއަމްގައި ކަމަށްވެސް ރިޕޯޓްކޮށްފައިވެއެވެ.

އެފްއޭއެމުން ބުނީ ދެ މެޗެއް ކުޅުމަށް ނޭޕާލުގެ ހުށަހެޅުމެއް ލިބިފައިވާ ކަމަށެވެ. އަދި އެފްއޭއެމުން ބޭނުންވަނީ ނޭޕާލު ޓީމު ރާއްޖެ ގެނަސްގެން މެޗު ކުޅުމަށެވެ. އެކަމަކު ނޭޕާލުން ބޭނުންވަނީ އެގައުމުގައި މެޗުތައް ކުޅުމަށެވެ.

އެކުވެރިކަމުގެ މެޗުތަކެއްގެ ދައުވަތު އެފްއޭއެމަށް ލިބިފައިވާއިރު، ގައުމީ ޓީމުގެ ކޯޗު ފްރެންޗެސްކޯ މޮރިއޭރޯ އަންނަ މަސްތެރޭގައި މެޗެއް ކުޅެން ބޭނުންވެއެވެ.

އެފްއޭއެމުން ބުނީ ނޭޕާލާ ދެކޮޅަށް މެޗު ކުޅެން ލިބިފައިވާ ފުރުސަތުގެ ބޭނުން ހިފުމާއި ބެހޭ ގޮތުން ވަރަށް އަވަހަށް ގޮތެއް ނިންމާނެ ކަމަށެވެ.

ރާއްޖޭގައި މިފަހަރު ކުޅުނު ސާފް ޗެމްޕިއަންޝިޕުގައި ނޭޕާލުން ވަނީ ރާއްޖޭގެ މައްޗަށް 1-0 ގެ ނަތީޖާއަކުން ކުރި ހޯދާފައެވެ.

ސާފްގެ ފައިނަލަށް ފުރަތަމަ ފަހަރަށް މި އަހަރުގެ މުބާރާތުގައި ނޭޕާލް ގެންގޮސްދިން ކޯޗު ކުވޭތުގެ އަބްދުﷲ އަލް މުތައިރީ ވަނީ އެ މުބާރާތަށް ފަހު މަގާމުން ވަކިވެފައެވެ. އެކަމަކު، ފަހުން މުތައިރީ ވަނީ އިތުރު ދެ އަހަރުގެ ކޮންޓްރެކްޓެއްގައި ނޭޕާލް ޓީމާ ހަވާލުވެފަ އެވެ.

ރާއްޖެ އާއި ނޭޕާލް އެންމެ ފަހުން ނޭޕާލުގައި ކުޅުނީ 2019 ވަނަ އަހަރުގެ ސައުތު އޭޝިއަން ގޭމްސްގަ އެވެ. ކަތުމަންޑޫގެ ދަސްރަތު ސްޓޭޑިއަމްގައި ކުޅުނު މެޗުގައި ނޭޕާލް މޮޅުވީ 2-1 އިންނެވެ.