އިރުވައި މޫސުން ރަސްމީކޮށް އިއުލާނުކޮށްފި
27 ޑިސެމްބަރު 2021 | ހޯމަ 05:00މިއަހަރުގެ އިރުވައި މޫސުން ފެށުނީ ޑިސެމްބަރު 20 ވަނަ ދުވަހު
ކަނޑު މަޑު ދުވަހެއް
މި އަހަރުގެ އިރުވައި މޫސުން ރަސްމީކޮށް އިއުލާނުކޮށްފިއެވެ.
ރާއްޖެޓީވީއަށް ދެއްވި އިންޓަރވިއުއެއްގައި މޫސުމާ ބެހޭ ގައުމީ އިދާރާގެ ޑެޕިޔުޓީ ޑިރެކްޓަރ އަލީ ޝަރީފް ވިދާޅުވީ ޑިސެމްބަރު 20 ވަނަ ދުވަހުން ފެށިގެން މި އަހަރުގެ އިރުވައި މޫސުން ފެށުނީ ކަމަށް ނިންމާފައިވާކަމަށެވެ. އެހެން އަހަރުތަކާ އަޅާ ބަލާއިރު، މި އަހަރުގެ އިރުވައި މޫސުން ފެށުން ވަނީ ލަސްވެފައެވެ.
މި އަހަރުގެ އިރުވައި މޫސުން ފެށުން ލަސްވުމާ ގުޅިގެން އަލީ ޝަރީފް ވިދާޅުވީ އިރުވައި މޫސުން ކަނޑައެޅުމުގައި ވައިގެ ބާރުމިނާއި އަދިވެސް މިނޫން މިންގަނޑުތަކަކަށް ބަލާ ކަމަށެވެ. އިރު އުތުރުން ވައި ހިފެހެއްޓެން ފެށުމުން އެއީ އިރުވައި މޫސުން ކަމުގައި ކަނޑައަޅާނެ ކަމަށް އޭނާ ވިދާޅުވިއެވެ. އަދި 10 މޭލުގެ ބާރުމިނުގައި ވައިޖެހެން ފެށުމުން އެހިސާބުން އެއީ އިރުވައި މޫސުން ކަމަށް ޝަރީފް ވިދާޅުވިއެވެ.
މި އަހަރުގެ އިރުވައި މޫސުން ކަނޑައެޅުން ލަސްވެފައިވަނީ ހއ. އަތޮޅާއި ބ. އަތޮޅާ ދެމެދު 6 މޭލުގެ ބާރުމިނުގައި ވައި ހުރުމުން ކަމަށް އަލީ ޝަރީފް ވިދާޅުވިއެވެ. މިފަދަ އެކި ސަބަބުތަކާހުރެ ބައެއް އަހަރުތަކުގައި އިރުވައި މޫސުން ފެށުން އަވަސްވެފައި، ބައެއް އަހަރުތަކުގައި އިރުވައި މޫސުން ފެށުން ލަސްވާކަމަށް އަލީ ޝަރީފް ވިދާޅުވިއެވެ.
މި އަހަރުގެ އިރުވައި މޫސުން ފެށޭނެ ކަމަށް މެޓް އޮފީހުން ކަޑައަޅާފައިވަނީ ޑިސެމްބަރު 10 ވަނަ ދުވަހުއެވެ. އެހެންނަމަވެސް އިރުވައި މޫސުން ފެށުން 10 ދުވަހަށް ވަނީ ލަސްވެފައެވެ.
