އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ކުޅުނު މެޗުތަކުން މެންޗެސްޓާ ސިޓީ، ޗެލްސީ އަދި އާސެނަލް މޮޅުވެއްޖެއެވެ.

ލީގު ތާޥަލުގެ އެއްވަނައިގައ އޮތް ސިޓީން އަމިއްލަ ދަނޑުގައި ކުޅުނު މެޗުން ލެސްޓާގެ މައްޗަށް ކުރި ހޯދީ 6-3 ގެ ނަތީޖާއަކުންނެވެ.

މި މެޗުގެ ފުރަތަމަ 25 މިނެޓުގެ ތެރޭގައި ސިޓީން ވަނީ ހަތަރު ގޯލު ޖަހާ ބޮޑު ލީޑެއް ނަގައިފައެވެ. ސިޓީގެ ފުރަތަމަ ލަނޑު މެޗުގެ ފަސްވަނަ މިނެޓުގައި އެޓީމަށް ކާމިޔާބު ކޮށްދިނީ ތަޖުރިބާކާރު މިޑްފިލްޑަރ ކެވިން ޑިބްރާނާ އެވެ. އަދި މެޗުގެ 14 ވަނަ މިނެޓުގައި ލިބުނު ޕެނަލްޓީއަކުން ސިޓީއަށް ލީޑު ފުޅާކޮށްދިނީ ރިޔާދް މާރޭޒްއެވެ. މިއީ ލެސްޓާގެ މިޑްފިލްޑަރ ޔޫރީ ޓީލަމަންސް ކުރި ފައުލަކާ ގުޅިގެން ވީޑިއޯ އެސިސްޓެންޓް ރެފްރީ (ވީއޭއާރް) ބެލުމަށްފަހު ރެފްރީދިން ޕެނަލްޓީއެކެވެ. އަދި މެޗުގެ 21 ވަނަ މިނެޓުގައި ސިޓީގެ އިލްކާއި ގުންޑޮގަން ވަނީ ލަނޑު ޖަހާ ލީޑު ފުޅާކޮށްފައެވެ. އޭގެ ހަތަރު މިނެޓު ފަހުން އިތުރު ޕެނަލްޓީއަކުުން ސިޓީގެ ރަހީމް ސްޓާލިންގ ވަނީ ލަނޑު ޖަހާފައެވެ. މިއީވެސް ލެސްޓާގެ ޓީލަމަންސް އޭރިޔާ ތެރެއިން ކުރި ކުށަކާއި ގުޅިގެން ދިން ޕެނަލްޓީއެކެވެ.

އެކަމަކު މެޗުގެ ދެވަނަ ހާފުގައި ލެސްޓާއިން އެޓީމުގެ ކުޅުން ރަނގަޅުކުރިއިރު، މެޗުގެ 55 ވަނަ މިނެޓުގައި ކެލެޗީ އެހެނާޗޯގެ އެހީތެރިކަމާއެކު ޖޭމްސް މެޑިސަން ވަނީ ލަނޑު ޖަހާ ފަރަގު ކުޑަކޮށްފައެވެ. އަދި އޭގެ ހަތަރު މިނެޓު ފަހުން އަޑެމޯލާ ލުކްމަން ލަނޑު ޖަހާ ސިޓީ ހާސްކޮށްލިއެވެ. އަދި މެޗުގެ 65 ވަނަ މިނެޓުގައި ލެސްޓާގެ އިހެނާޗޯ ލަނޑު ޖަހާ ނަތީޖާ ހަމަހަމަކުރިއެވެ. އެކަމަކު ސްޓާލިންގ އާއި އައިމެރިކް ލަޕޯޓްގެ ލަނޑުތަކުން ސިޓީން އަލުން ލީޑު ނެގިއެވެ.

މީގެ އިތުރުން އާދީއްތަ ދުވަހުގެރޭ އާސެނަލުން ވަނީ ނޯވިޗް ސިޓީ އަތުން ފަސޭހަކަމާއެކު 5-0 ގެ ނަތީޖާއަކުން މޮޅުވެފައެވެ.

މި މެޗުގައި އާސެނަލްގެ ބުކާޔޯ ސަކާ ދެ ލަނޑު ޖަހާފައިވެއެވެ. އާސެނަލަށް ދެން ލަނޑުތައް ޖަހައިދިނީ ކިއެރަން ޓިއެރަނީ، އަލެކްސަންޑަ ލަކަޒޭޓް އަދި އެމީލް ސްމިތު ރޯވްއެވެ. ލަކަޒޭޓް ލަނޑު ޖަހާފައިވަނީ ޕެނަލްޓީއަކުންނެވެ. އަދި ސްމިތް ރޯވް ލަނޑު ޖަހާފައިވަނީ ބަދަލު ކުޅުންތެރިއެއްގެ ގޮތުގައި ކުޅެން އަރައެވެ.

މީގެ އިތުރުން އާދީއްތަ ދުވަހުގެރޭ ޗެލްސީ އާއި އެސްޓަން ވިލާ ބައްދަލުކުރި މެޗު ޗެލްސީން ކާމިޔާބުކުރީ 3-1 ގެ ނަތީޖާއަކުންނެވެ.

ކޮވިޑަށް ޕޮޒިޓިވްވުމާއެކު އެސްޓަން ވިލާއިން މެޗަށް ނުކުތީ ކޯޗު ސްޓީވެން ޖެރާޑް ނުލައެވެ.

މި މެޗުގައި ފުރަތަމަ ލަނޑު ޖަހާ ލީޑު ނެގީ އެސްޓަން ވިލާއިންނެވެ. މިއީ ޗެލްސީގެ ރީސް ޖޭމްސް ބޮލުގައި ޖެހިފައި ބައިކޮޅަށް ވަން ލަނޑެކެވެ. ޗެލްސީން ނަތީޖާ އެއްވަރުކުރީ ކަލުމް ހަޑްސަން އޮޑޯއިއަށް އެސްޓަން ވިިލާގެ މެޓީީ ކޭސް އޭރިޔާ ތެރެއިން ކުރި ފައުލަކުން ދިން ޕެނަލްޓީއަކުންނެވެ. މި ލަނޑު އެޓީމަށް ޖަހާދިނީ އިތުބާރު ކުޅުންތެރިޔާ ޖޯޖީނިއޯއެވެ.

އޭގެ ފަހުން ބަދަލު ކުޅުންތެރިއެއްގެ ގޮތުގައި ކުޅެން އަރައި ތަޖުރިބާކާރު ފޮވާޑް ރޮމޭލޫ ލުކާކޫ ވަނީ ލަނޑު ޖަހާ ޗެލްސީއަށް ލީޑު ނަގައިދީފައެވެ. މިއީ 106 ދުވަސް ތެރޭގައި ލުކާކޫ ޕްރިމިއާ ލީގުގައި ޖެހި ފުރަތަމަ ލަނޑެވެ. އަދި ޗެލްސީން ޖެހި ފަހު ލަނޑަކީ އެސްޓަން ވިލާ ކުޅުންތެރިން ލުކާކޫއަށް އޭރިޔާތެރެއިން ކުރި ފައުލަކާއި ގުޅިގެން ދިން ޕެނަލްޓީއަކުން ޖެހި ލަނޑެކެވެ. މި ލަނޑުވެސް އެޓީމަށް ކާމިޔާބު ކޮށްދިނީ ޖޯޖީނިއޯއެވެ.

މި ނަތީޖާތަކާއެކު ތާވަލުގެ އެއްވަނައިގައި ސިޓީން އޮތީ ކުޅުނު 19 މެޗުން 47 ޕޮއިންޓް ހޯދައިގެންނެވެ. ދެވަނައިގައި ލިވަޕޫލުން އޮތީ އެއް މެޗު މަދުން ކުޅެ 41 ޕޮއިންޓާއެކުގައެވެ. ތިންވަނައިގައި އޮތް ޗެލްސީއަށް 19 މެޗުން 41 ޕޮއިންޓް ވަނީ ލިބިފައެވެ. އަދި ތާވަލުގެ ހަތަރުވަނައިގައި އޮތް އާސެނަލަށް 19 މެޗުން 35 ޕޮއިންޓް ވަނީ ލިބިފައެވެ.