މަރު ކޮމިޝަނުގެ ޚަރަދުގެ 86.97 އިންސައްތައަކީ މުސާރައާއި އެލަވަންސް
27 ޑިސެމްބަރު 2021 | ހޯމަ 02:42މަރު ކޮމިޝަނަށް ޖުމްލަ 2،111،632 ރުފިޔާ ޚަރަދުކޮށްފައިވޭ
މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަން
މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުގެ ޚަރަދުގެ 86.97 އިންސައްތައަކީ މުސާރައާއި އެލަވަންސްކަން ހާމަވެއްޖެއެވެ.
ރައީސް އޮފީހުން ހިއްސާކޮށްފައިވާ ޚަރަދުތަކުގެ ތަފްސީލުގެ ތެރޭގައި މި އަހަރުގެ ނޮވެމްބަރ މަހުގެ ނިޔަލަށް މަރު ކޮމިޝަނުން ވަނީ 1،219،817 ރުފިޔާ މުސާރައާއި އެލަވަންސްގެ ގޮތުގައި ޚަރަދުކޮށްފައެވެ. އަދި ދަތުރުފަތުރު ކުރުމަށް 117،637 ރުފިޔާ ޚަރަދުކޮށްފައި ވާއިރު، އޮފީސް ހިންގުމަށް ބޭނުންވާ ތަކެތި ހޯދުމަށް 2،204 ރުފިޔާ ޚަރަދުކޮށްފައިވެއެވެ. އޮފީސް ހިންގުމަށް ބޭނުންވާ ޚިދުމަތަށް 112،321 ރުފިޔާ ޚަރަދުކޮށްފައި ވާއިރު، މަރާމާތުކުރުމާއި ބެލެހެއްޓުމަށް ހޭދަކޮށްފައި ވަނީ 614 ރުފިޔާއެވެ. މީގެ އިތުރުން ހަރުމުދާ ހޯދުމަށް 132،711 ރުފިޔާ މަރު ކޮމިޝަނުން ޚަރަދުކޮށްފައިވެއެވެ.
މިއާއެކު މި އަހަރުގެ ނޮވެމްބަރ މަހުގެ ނިޔަލަށް ޖުމްލަ 1،585،306 ރުފިޔާ މަރު ކޮމިޝަނުން ވަނީ ޚަރަދުކޮށްފައެވެ.
މުސާރައާއި އެލަވަންސްގެ ގޮތުގައި މިހާތަނަށް އެންމެ ބޮޑު ޚަރަދެއް މަރު ކޮމިޝަނުން ކޮށްފައިވަނީ 2019 ވަނަ އަހަރުއެވެ. އެ އަހަރުގެ ތެރޭގައި މުސާރައާއި އެލަވަންސްގެ ގޮތުގައި 2،111،632 ރުފިޔާ މަރު ކޮމިޝަނުން ވަނީ ޚަރަދުކޮށްފައެވެ.
ރައީސް އިބްރާހިމް މުހައްމަދު ޞާލިޙު ވެރިކަމާ ހަވާލުވުމަށްފަހު 2018 ވަނަ އަހަރު އުފެއްދި މަރު ކޮމިޝަނަށް 5،497،473 ރުފިޔާ ދައުލަތުން ވަނީ މިހާތަނަށް ޚަރަދުކޮށްފައެވެ.
މަރު ކޮމިޝަނުގެ ޚަރަދުތަކާއެކު ރައީސް އޮފީހުން ވަނީ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީއަށް ކޮށްފައިވާ ޚަރަދުތައް ވެސް ހިއްސާކޮށްފައެވެ. މި އަހަރު ތެރޭގައި ނޮވެމްބަރ މަހުގެ ނިޔަލަށް ސަރުކާރުން ވަނީ 2،678،435 ރުފިޔާ މި ކޮމިޝަނަށް ޚަރަދުކޮށްފައެވެ. މި ކޮމިޝަނަށް ވެސް އެންމެ ބޮޑު ޚަރަދެއް ކޮށްފައިވަނީ މުސަރާއާއި އެލަވަންސް ދިނުމަށެވެ. އެގޮތުން މުސާރައާއި އެލަވަންސްގެ ގޮތުގައި 2،661،462 ރުފިޔާ ދައުލަތުން ވަނީ ޚަރަދުކޮށްފައެވެ.
އެސެޓް ރިކަވަރީ ކޮމިޝަން އުފެދިގެން މިހާތަނަށް އައިއިރު، ދައުލަތުން ވަނީ ޖުމްލަ 9،951،748 ރުފިޔާ މި ކޮމިޝަނަށް ޚަރަދުކޮށްފައެވެ.
ސަރުކާރުން، މި ކޮމިޝަންތަކަށް ބޮޑު ޚަރަދުތަކެއް ކުރަމުން އަންނައިރު، މި ކޮމިޝަންތަކުން އެދެވިގެންވާ ވަރުގެ ނަތީޖާއެއް މިހާތަނަށް ނެރެވިފައެއް ނުވެއެވެ. އެހެންކަމުން ގިނަ ބައެއްގެ ފާޑުކިއުން ވަނީ މި ކޮމިޝަންތަކަށް އަމާޒުވެފައެވެ.
