އަނަސްގެ މަރު: ޖުނައިހުގެ ބޭސްފަރުވާ ހަމަޖެއްސުމަށް އަންގައިފި
26 ޑިސެމްބަރު 2021 | އާދީއްތަ 08:31އާދީއްތަ ދުވަހު ކުރިއަށް ގެންދިޔަ އަޑުއެހުމަކީ ޖުނައިހުގެ ފަރާތުން ބަންދު މުރާޖާ ކުރުމަށް އެދުމުން ކުރިއަށް ގެންދިޔަ އަޑުއެހުމެއް
އަނަސްގެ މަރުގެ މައްސަލައިގައި ކުރިއަށްދިޔަ ޝަރީއަތުގެ އަޑުއެހުމެއްގެ ތެރެއިން
މާލޭގައި ހުންނަ ލިޓަސް ސާވިސް ސެންޓަރު ތެރޭގައި ގްރޫޕަކުން ވަޅިން ހަމަލާދީ މުހައްމަދު އަނަސް މަރައިލިކަމުގެ ތުހުމަތުގައި ހައްޔަރުކޮށްފައި ހުރި ލ. ގަން، ޖުނައިހު އަބްދުﷲ އަށް ބޭސްފަރުވާ ކުރުމުގެ ފުރުސަތު ފަހިކޮށްނުދީފި ނަމަ އޭނާ ބަންދުން ދޫކޮށްލާނެކަމުގެ އިންޒާރު ގާޒީ ދެއްވައިފިއެވެ.
އާދީއްތަ ދުވަހު ކުރިއަށް ގެންދިޔަ އަޑުއެހުމަކީ ޖުނައިހުގެ ފަރާތުން ބަންދު މުރާޖަޢާ ކުރުމަށް އެދުމުން ކުރިއަށް ގެންދިޔަ އަޑުއެހުމެކެވެ. މި މައްސަލައިގައި ދައުވާ ރައްދުވާ އެއްވެސް މީހެއްގެ ބަންދު މުރާޖަޢާ ކުރަން ދައުލަތުން އިސްވެ ނޭދެން ވަނީ ނިންމާފައެވެ.
އަޑުއެހުމުގައި ގާޒީ ވިދާޅުވީ ޖުނައިހުގެ ބޭސްފަރުވާއަށް ގޮތެއް ނިންމުމަށް ދައުލަތަށް ދެއްވާނީ ހަފްތާއެއް ކަމަށެެވެ. އެ މުއްދަތުގެ ތެރޭގައި ދައުލަތުން ގޮތެއް ނުނިންމައިފި ނަމަ ޖުނައިހު ބަންދުން ދޫކޮށްލަން އަމުރުކޮށް، އޭނާ ރާއްޖެއިން ބޭރަށް ދިޔުމުގެ ހުއްދަ ވެސް ދެއްވާނެ ކަމަށް ގާޒީ ވިދާޅުވިއެވެ.
ޖުނައިހުގެ ލޮލަށް ދިމާވެފައިވާ މައްސަލައެއްގެ ސަބަބުން އޭނާ ރާއްޖެއިން ބޭރަށް ގޮސް ފަރުވާ ކުރަންޖެހޭ ކަމަށް ޑޮކްޓަރުން ވަނީ ލަފާދީފައެވެ. އެހެންނަމަވެސް މެޑިކަލް ބޯޑުގެ ކޯރަމް ހަމަނުވާތީ އޭނާ ފުރުމުގެ ހުއްދަ އޮތީ ނުލިބިއެވެ.
ދިފާއީ ވަކީލު ވިދާޅުވީ، މެޑިކަލް ބޯޑުގެ ކޯރަމް ހަމަ ނުވެގެން ބޭސްފަރުވާއަށް ނުފުރި އޮތުން ބަލައިނުގަނެވޭނެ ކަމަށެވެ. އަދި ކޮވިޑް-19 ގެ އައު ވޭރިއަންޓް ފެތުރި ގައުމުތަކުގެ ބޯޑަރުތައް އަނެއްކާވެސް ބަންދު ކުރުމުގެ ކުރިން ޖުނައިހު ދޫކޮށްލުމަށް ވަކީލު އެދިވަޑައިގެންނެވިއެވެ.
ޖުނައިހުގެ ފަރާތުން ރާއްޖެއިން ބޭރަށް ފުރުމުގެ ހުއްދައަށް އެދިފައިވަނީ މި މަހުގެ 12 ވަނަ ދުވަހުއެވެ. އެދުވަހުން ޖުނައިހު ބުނެފައިވަނީ އޭނާގެ ލޮލުގެ ހާލަތު ގޯސްވުމުން އިންޑިއާއިން ފަރުވާ ހޯދުމަށް އިރުޝާދު ދީފައިވާ ކަމަށެވެ. އަދި މީގެ ކުރިން ވެސް ބަންދުގައި ހުރެގެން އިންޑިއާއިން ސާރޖަރީ ހަދާފައިވާ ކަމަށާއި، އޭރުވެސް ޖެނުއަރީގައި އަލުން ދެއްކުމަށް ބުނެފައިވާކަމަށެވެ.
2017 ވަނަ އަހަރު ހިނގި މި ހާދިސާއާ ގުޅިގެން ދައުލަތުން ދައުވާ އުފުލާފައިވަނީ ހަތް މީހަކަށާއި، ކުޑަކުއްޖަކަށެވެ.
މި މައްސަލައިގައި އަނަސްއަށް ހަމަލާދިނުމުގައި އަމަލީގޮތުން ބައިވެރިވިކަމުގެ ދައުވާ ކޮށްފައިވާ ތިން މީހުންނަކީ ޅ. ކުރެންދޫ އަސުރުމާގޭ އަހްމަދު ޒަޔާނާއި، މ. ދިމިޝްގުގޭ އުސްމާން ޝަރީފް އަދި މ. ލޮނުމިދިލިގޭ އަފްރާހު އަބްދުއްރައްޒާގެވެ.
ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ދައުވާ އުފުލާފައިވާ ހަތަރު މީހުންނަކީ ޖުނައިހު އާއި، ސ. ފޭދޫ ވެސްޓަންވިލާ ހަސަން މަހްފޫޒާއި، ތ. ކިނބިދޫ ގުލްފާމުގޭ މުހައްމަދު ޝާޒާއި، ދަފްތަރު ނަންބަރު 1746، ސިމާހް މޫސާއެވެ.
މަދަނީ މިންގަނޑުން ކުރިއަށް ގެންދިޔުމަށް ނިންމާފައިވާ މި މައްސަލައިގައި ދެން އޮންނާނީ ދިފާއީ ހެކި ހުށަހެޅުމެވެ.
