ހަނީފް ދޫކޮށްލުމަށް ހައިކޯޓުން އަމުރުކޮށްފި

ހައިކޯޓުގެ ދެކުނު ގޮފީގެ ފަނޑިޔާރު ޝުޖާއު އުސްމާން އަވަހާރަކޮށްލަން އުޅުނު ކަމަށް ބުނާ މައްސަލައާ ގުޅިގެން ހައްޔަރުކޮށްފައިވާ އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރު އިބްރާހިމް ހަނީފް ދޫކޮށްލުމަށް ހައިކޯޓުން އަމުރުކޮށްފި އެވެ.

ހަނީފް ދޫކޮށްލުމަށް ހައިކޯޓުން އަމުރުކުރީ، އޭނާ ގޭބަންދު ކުރުމަށް މިމަހުގެ 16 ވަނަ ދުވަހު ކްރިމިނަލް ކޯޓުން ނެރުނު އަމުރު އެ ކޯޓުގައި އިސްތިއުނާފު ކުރުމުންނެވެ.

ހަނީފްގެ ފަރާތުން އެ މައްސަލަ އިސްތިއުނާފުކޮށްފައިވަނީ، ކްރިމިނަލް ކޯޓުން އަމުރު ނެރުމުގައި "ދިވެހިރާއްޖޭގެ ސުޕްރީމް ކޯޓުގެ ކޯޓް އަމުރު" ގައި ބަޔާންކޮށްފައިވާ އެއްމަރުހަލާއެއްގެ ކޯޓެއްގެ ފަނޑިޔާރަކު ނިންމަވާފައިވާ ނިންމުމަކަށް ހުރަސްއެޅޭ ފަދަ އެއްވެސް ނިންމުމެއް ހަމަ އެ މަރުހަލާގެ އެހެން ފަނޑިޔާރަކު ނިންމުމަކީ އަދުލު އިންސާފު ގާއިމްކުރުމަށް ހުރަސް އެޅިދާނެ ކަމެއް ކަމަށް ބަޔާންކޮށްފައިވާއިރު، އެކަމަށް ރިއާޔަތް ކުރެއްވުމެއް ނެތި ކަމަށް ބުނެ އެވެ.

ހައިކޯޓުން ކުރި ހުކުމުގައި ވަނީ ކްރިމިނަލް ކޯޓުން ހަނީފް ގޭގައި ބަންދުކުރުމަށް މިމަހުގެ 16 ވަނަ ދުވަހު ނެރުނު އަމުރުގެ ކުރިން، މިމަހުގެ 11 ވަނަ ދުވަހު ފުލުހުން ބަންދުގައި ބެހެއްޓުމަށް ކުރި އަމުރުގައި، އެ އަމުރުގެ މުއްދަތު ހަމަވުމުގެ ކުރިން ތަހުގީގު ނިންމައި ދައުވާ ކުރުމާމެދު ގޮތެއް ނިންމުމަށް އަންގާފައިވާ ކަމާއި އަދި އެހެން ނޫންނަމަ ދޫކޮށްލެވޭނެ ކަމަށް އަންގާފައިވާކަން ފާހަގަކޮށްފަ އެވެ. އެހެން ނަމަވެސް، އެ މުއްދަތު ފާއިތުވެ ދިޔަ އިރުވެސް ހަނީފްގެ މައްޗަށް ދައުވާކުރުމާ މެދު ގޮތެއް ނިންމާފައިނުވާކަން ހައިކޯޓުން ފާހަގަކުރި އެވެ.

ހުކުމުގައި ބުނެފައިވާ ގޮތުގައި "ދިވެހިރާއްޖޭގެ ސުޕްރީމް ކޯޓުގެ ކޯޓް އަމުރު" ގެ އުސޫލުގެ ރޫހަށް ބަލާއިރު، އިސްތިއުނާފުކުރުމާއި ކޯޓުން ނިންމާފައިވާ ނިންމުމެއް މުރާޖައާ ކުރުމަށް އެދި ހުށަހެޅުމަކާ ނުލައި، އެއްމަރުހަލާގެ ކޯޓަކުން ނިންމާފައިވާ ނިންމުމަކަށް ހުރަސްއެޅޭ ފަދަ ގޮތަކަށް އެ މަރުހަލާގެ އެހެން ކޯޓަކުން ގޮތެއް ނިންމުމަކީ ރާއްޖޭގެ ޝަރުއީ ނިޒާމް ބިނާވެފައިވާ އަސާސީ އުސޫލުތަކާ އަދި އަދުލު އިންސާފުގެ ހަމަތަކާ ތައާރުޒުވާ ކަމެއްކަން އެނގެން އޮންނަ ކަމަށެވެ.

އަދި ކޯޓަކުން ނިންމާފައިވާ ނިންމުމަކަށް އެ އުސޫލުން ބަދަލު ނުގެންނަހާ ހިނދަކު، އަމަލުކުރަންޖެހޭ ކަމާއި، އެހެން ނޫންނަމަ އެކަން ވެެގެންދާނީ ކޯޓުތަކުގެ ނިންމުންތަކުގެ އިތުބާރާއި ކަށަވަރުކަން ގެއްލި ކޯޓުގެ ނިންމުމާ އެއްގޮތަށް އަމަލުނުކުރުމަށް ފުރުސަތު ހުޅުވިގެންދާނެ ކަމަށް ހައިކޯޓުގެ ފަނޑިޔާރުންނަށް ފެންނަ ކަމަށް ބުނެފައިވެ އެވެ.

ހައިކޯޓުގެ ހުކުމުގައި ބުނެފައިވަނީ މައްސަލަ ބެއްލެވި ފަޑިޔާރުން ނިންމަވާފައިވަނީ، މި ގަޒިއްޔާގައި ކޮށްފައިވާ ޝަރުތުތަކާ އެއްގޮތަށް އަމަލުކުރުމަށް ހަނީފް އެއްބަސްވެފައިވާތީ، އެ ޝަރުތުތަކުގައިވާ ގޮތުގެ މަތިން އަމަލުކުރުމަށް އަންގައި ހަނީފް ދޫކޮށްލުމަށް ކަމަށެވެ. އެގޮތަށް ނިންމައި ހައިކޯޓުން ވަނީ ކްރިމިނަލް ކޯޓުގެ އަމުރު ބާތިލްކޮށްފަ އެވެ.

ހަނީފް ދޫކޮށްލުމަށް އަންގާރަ ދުވަހު ހައިކޯޓުން އަމުރުކުރި އިރު، ހަނީފް ހައްޔަރުކުރި މައްސަލަ ހައިކޯޓުގައި އިސްތިއުނާފް ކުރުމުން އޭނާ ބަންދުގައި ބަހައްޓަން ކްރިމިނަލް ކޯޓުން އަމުރުކުރީ ރަނގަޅަށް ކަމަށް އޭޕްރީލް 20 ވަނަ ދުވަހު އެކޯޓުން ކަނޑައެޅި އެވެ.

ގްރޫޕެއް ފޮނުވައިގެން ފަނޑިޔާރު ޝުޖާއު "އަވަހާރަކޮށްލަން" އުޅުނު ކަމުގެ ތުހުމަތުގައި ހަނީފް ހައްޔަރުކޮށްފައި ވަނީ އޭޕްރީލް މަހުގެ ހަތަރު ވަނަ ދުވަހު ކޯޓު އަމުރެއްގެ ދަށުން އޭނާ ދިރިއުޅޭ ގެއިންނެވެ. ހައްޔަރުކުރުމުގެ ކުރިން ހަމަ އެ ދުވަހު ފުލުހުންގެ އިދާރާއަށް ހަނީފް ހާޒިރުކޮށް، އޭނާގެ ފޯނު ފުލުހުންގެ ބެލުމުގެ ދަށަށް ގެންގޮސްފައި ވެއެވެ.