ލ. އިސްދޫ، ކަލައިދޫ އަދި ދަނބިދޫގެ މަރުކަޒީ އިންޖީނުގޭގެ ބިންގާ އަޅައިފިއެވެ.

މި މަރުކަޒީ އިންޖީނުގޭގެ ބިންގާ އަޅުއްވައިދެއްވީ ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދުއާއި، ގަމު ދާއިރާގެ މެންބަރު މުޙައްމަދު ވިސާމް، ކަލައިދޫ ކައުންސިލް ރައީސް އަޙުމަދު ޝިޔާމް އަދި ދަނބިދޫ ކައުންސިލް ރައީސް އިބްރާހިމް މިމްރާހް އެވެ.

މި މަރުކަޒީ އިންޖީނުގެއިން 3 ރަށަށް ބޭނުންވާވަރަށް 1.2 މެގަވޮޓުގެ ކަރަންޓު އުފެއްދޭނެ ކަމަށް ފެނަކައިން ބުނެފައިވެއެވެ. އަދި ޓެކްނިކަލް އޮފީސް ސްޕޭސް، މީޓިން ރޫމް، ބެޓްރީ ރޫމް، ކޮންޓްރޯލް ރޫމްފަދަ ވަސީލަތްތައް މި އިންޖީނުގޭގައި ގާއިމްކުރެވިގެންދާނެ ކަމަށް ފެނަކައިން ބުނެފައިވެއެވެ.

މި އިންޖީނުގެއަކީ ލ. އަތޮޅުގެ ކަރަންޓު އެއް ވިއުގައަކުން ގުޅާލުމަށް ކުރަމުންދާ މަސައްކަތުގެ ތެރެއިން ގާއިމްކުރެވިގެންދާ އިންޖީނުގެއެކެވެ. މި މަސައްކަތަށް 40 މިލިއަން ރުފިޔާ ޚަރަދުވާނެ ކަމަށް ވަނީ ލަފާކޮށްފައެވެ.