ދުނިޔޭގައި މިހާތަނަށް އުފެއްދި އެންމެ ވަރުގަދަ ސްޕޭސް ޓެލެސްކޯޕް ލޯންޗުކޮށްފިއެވެ.

އެތައްހާސް ބައެއްގެ މަސައްކަތުން އުފައްދާފައިވާ މި ޓެލެސްކޯޕު ލޯނޗުކޮށްފައި ވަނީ 25 ޑިސެމްބަރވީ ހޮނިހިރު ދުވަހު ރާއްޖެ ގަޑިން 17:20ގައެވެ. ޖޭމްސް ވެބް ސްޕޭސް ޓެލެސްކޯޕް (ޖޭޑަބްލިއުއެސްޓީ)ގެ ނަން ދެވިފައިވާ މި ޓެލެސްކޯޕު އުފެއްދުމުގެ މަސައްކަތް ރާވައި، ޑިޒައިންކޮށް އަދި މި އުފެއްދުމަށް ސައިންސްވެރިން ވަނީ 30ށްވުރެ ގިނަ އަހަރު މަސައްކަތް ކޮށްފައެވެ. މި ޓެލެސްކޯޕް އުފެއްދުމުގެ މަސައްކަތް ނާސާއިން ފަށާފައިވަނީ 1983 ވަނަ އަހަރުއެވެ.

ޖޭޑަބްލިއުއެސްޓީ ޖައްވަށް ފޮނުވާލާފައި ވާއިރު، އޭގެ މިސްރާބަށް ދަތުރުކުރުމަށް ގާތްގަނޑަކަށް މަސްދުވަސް ނަގާނެއެވެ. މި ރިސްކު ބޮޑު ދަތުރު ފުރިހަމަކޮށް ދުނިޔެއާ އެއް މިލިއަން މޭލު ދުރުގައި މި ޓެލެސްކޯޕު މަޑުކުރުމަށްފަހު އޭގެ 21 ފޫޓުގެ 'ރަން ލޯ' ހުޅުވާލާނެއެވެ.

މި ޓެލެސްކޯޕުގެ ބޭނުމަކީ ޔުނިވާސްގެ އެކި ކަންތައްތައް ދިރާސާކޮށް ސްޕޭސްގެ ތާރީޚުގެ މައުލޫމާތުތައް ދެނެގަތުމެވެ. ކާމިޔާބުކަމާއެކު މި ޓެލެސްކޯޕުގެ މަސައްކަތް ކުރިއަށް ގެންދެވިއްޖެނަމަ 13.8 ބިލިއަން އަހަރުގެ ކުރީގެ މައުލޫމާތުތައް އެއްކުރެވިގެންދާނެ ކަމަށް ނާސާއިން ބުނެއެވެ.

މި ޓެލެސްކޯޕު އުފެއްދުމަށްޓަކައި 10 ބިލިއަން ޑޮލަރު ވަނީ ޚަރަދުކޮށްފައެވެ.