ދަތުރުފަތުރުކުރުން އިތުރުވެފައިވާތީ، ކޮވިޑް-19ން ރައްކާތެރިވުމަށް ޚާއްސަ ސަމާލުކަމެއް ދިނުމަށް އިލްތިމާސްކޮށްފި
25 ޑިސެމްބަރު 2021 | ހޮނިހިރު 11:20ޚިތާނީ ހަފްލާ ފަދަ މީހުން އެއްވެ އުޅޭ ތަންތަނަށް ދިއުން އިތުރު
ނޯތު ހާބަރ، ޗުއްޓީ ދުވަސްވަރަށް ވުމާއެކު ގިނަ ބަޔަކު ދަނީ ރަށްރަށަށް ދަތުރުކުރަމުން
ދިރާސީ އައު އަހަރުގެ ޗުއްޓީއާއެކު ދަތުރުފަތުރުކުރުން އިތުރުވެފައިވާތީ، ކޮވިޑް-19ން ރައްކާތެރިވުމަށް ޚާއްސަ ސަމާލުކަމެއް ދިނުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އިލްތިމާސްކޮށްފިއެވެ.
އެޗްޕީއޭއިން ބުނީ، މި ދުވަސްވަރު ރާއްޖޭން ބޭރަށާއި އަތޮޅުތެރެއަށް ދަތުރު ފަތުރު ކުރުމާއި ގޭގެއަށް ޒިޔާތަރަތް ކުރުން އިތުރުވުމާއި ޚިތާނީ ހަފްލާ ފަދަ މީހުން އެއްވެ އުޅޭ ތަންތަނަށް ދިއުން އިތުރުވެފައިވާ ކަމަށެވެ. އެހެންކަމުން، ކޮވިޑް 19އާއި މިނޫންވެސް އެހެނިހެން ގައިގައިން އަރާ ބަލިތަކުން ރައްކާތެރިވުމަށް ސަމާލުވާން ޖެހޭ ކަމަށެވެ.
އެޗްޕީއޭއިން ބުނީ ރާއްޖެއިން ބޭރަށް ދަތުރުކުރުމުގައި ސަމާލުކަން ދޭންޖެހޭ ކަމަށާއި، ކޮވިޑް-19ގެ އެއްވެސް އަލާމާތެއް ހުރިނަމަ ޓެސްޓުކޮށް ނުވަތަ ނަތީޖާ ނުލިބެނީސް ދަތުރުނުކޮށް، ނަތީޖާ ލިބެންދެން ގޭގައި އެކަހެރިވާން ޖެހޭ ކަމަށެވެ. ދަތުރުކުރާ ގައުމުގެ ކޮވިޑް ހާލަތާއި ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކަށް އަހުލުވެރިވުމަށް އިލްތިމާސްކޮށްފައިވެއެވެ. އަދި ހަލުވިކަމާއެކު ކޮވިޑް ފެތުރެމުންދާ ގައުމުތަކަށް ދަތުރުކުރުން ފަސްކުރުން މުހިންމު ކަމަށް އެޗްޕީއޭއިން ބުނެއެވެ.
މީގެ އިތުރުން، ވެކްސިން ޖަހާ އުމުރުގެ ފަރާތްތަކުން ވެކްސިން ފުރިހަމަކޮށް، ބޫސްޓަރ ޑޯޒް ޖެހުމަށް ޝަރުތުހަމަވާނަމަ، ދަތުރުކުރުމުގެ ކުރިން ބޫސްޓަރ ޑޯޒް ފުރިހަމަ ކުރަންޖެހޭ ކަމަށެވެ. ގިނަ މީހުން އެއްވާ ތަންތަނަށް ދިއުން މަދު ކުރުމާއި، ސިއްހީ ފަރުވާދޭ މަރުކަޒަކަށް ދާނަމަ ނުވަތަ ގިނަ މީހުން އުޅޭ ތަންތަނުގައާއި ބަންދު ތަންތަނުގައި ރަނގަޅަށް މާސްކު އަޅައިގެން އުޅުމަށް ޚާއްސަ ސަމާލުކަމެއް ދިނުމަށް އެޗްޕީއޭއިން އެދިފައިވެއެވެ. ދަތުރުކުރާ ގައުމުގައި، މާސްކު އެޅުންފަދަ ކަންކަން ލުއިކޮށްފައި ވީނަމަވެސް، ސަލާމަތާއި ރައްކާތެރިކަމަށްޓަކައި، ބޭރަށް ނުކުންނައިރުއާއި އެހެން މީހުންނާ ބައްދަލުވާއިރު މާސްކު އަޅައިގެން އުޅުމާއި، ގައިދުރުކަން ބެހެއްޓުމާއި އަތް ސާފުކުރުމަށް ހަނދާން ކޮށްދީފައިވެއެވެ.
އެޗްޕީއޭއިން ބުނީ ދަތުރުމަތީގައި އުޅޭއިރުވެސް ބަލީގެ އަލާމާތެއް ފެނިއްޖެ ނަމަ އަވަހަށް ޓެސްޓް ކުރުމާއި، ރާއްޖެއަށް އައުމަށްފަހު، ވެކްސިން ފުރިހަމަނުވާ ފަރާތްތަކުން ކަނޑައެޅިފައިވާ ގޮތުގެ މަތިން ކަރަންޓީނުވާން ޖެހޭ ކަމަށެވެ. ވެކްސިން ޖަހާފައިވާ ފަރާތްތަކުން ރާއްޖެ އަންނަތާ 3-5 ދުވަހުގެ ތެރޭގައި ޕީ.ސީ.އާރް ޓެސްޓް ހަދަން ޖެހޭ ކަމަށް އެޗްޕީއޭއިން ބުނެއެވެ.
ރާއްޖޭގައި އެއްތަނުން އަނެއްތަނަށް ދަތުރުކުރާ ފަރާތްތަކުން ސަމާލުވާން ޖެހޭ ކަންތައްތަކަށް އިޝާރާތްކޮށް އެޗްޕީއޭއިން ބުނީ، ދަތުރުކުރުމަށް ފަހުވެސް ޕޮޒިޓިވް ކޭހެއްގެ ކޮންޓެކްޓަކަށް ވެއްޖެނަމަ، އެކަން އެ ހުރި ރަށެއްގެ ސިއްހީ ޚިދުމަތްދޭ މަރުކަޒަކަށް ވީހާވެސް އަވަހަށް އަންގަން ޖެހޭ ކަމަށާއި، މާލޭގައި ނަމަ އެޗްޕީއޭގެ 1676އަށް އަންގަން ޖެހޭ ކަމަށެވެ. އަދި ޚިތާނީ ހަފްލާތަކާއި ބާޒާރުތައް، އަދި ގިނަ މީހުން އެއްވާ ތަންތަނަށް ވީހާ ވެސް މަދުން މީހުން ދިއުމަކީ އެންމެ އެދެވޭ ގޮތް ކަމަށެވެ. އަދި ގައިޑްލައިން ތަކާ އެއްގޮތަށް ހަފްލާތައް ބޭވުމަށް އެޗްޕީއޭއިން އިލްތިމާސްކޮށްފައިވެއެވެ.
އެޗްޕީއޭއިން ބުނީ ކޮވިޑް-19ގެ އާ ވޭރިއަންޓްތައް ވެސް ދުނިޔޭގެ އެކި ހިސާބުތަކުގައި ފެތުރެމުންދާ މިދުވަސްވަރު، މުޖުތަމައު ރައްކާތެރިކުރުމަށް ހުރިހާ ފަރާތްތަކުންވެސް ރައްކާތެރިކަމުގެ ފިޔަވަޅުތަކަށް ސަމާލުވާން ޖެހޭ ކަމަށެވެ.
