އޭޑީކޭ ހޮސްޕިޓަލުގެ 35 ވަނަ އަހަރީ ދުވަހާ ގުޅުވައިގެން ޗެރިޓީ ރަންއެެއް ބޭއްވުމަށް ނިންމައިފިއެވެ.
މި ދުވުން ކުރިއަށް ގެންދިއުމަށް ހަމަޖެހިފައި ވަނީ 2022 ވަނަ އަހަރުގެ ޖެނުއަރީ މަހުގެ ފަސްވަނަ ދުވަހުގެ ހެނދުނު 09:00ން ހަވަނަ ދުވަހުގެ ރޭ 20:00އާ ހަމައަށެވެ. ހުއްޓުމެއް ނެތި 35 ގަޑިއިރު ވަންދެން އެކި ބައިވެރީން ދުވާ މި ދުވުން ފައްޓަވައިދެއްވާނީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ އަނބިކަނަބަލުން ފަޒްނާ އަހްމަދެވެ.
މާލޭގެ ދުވާ ޓްރެކުގައި ކުރިއަށް ގެންދިއުމަށް ހަމަޖެހިފައިވާ މި ދުވުމުގައި ކޮންމެ ފަސް ގަޑިއިރަކުން ލަކީޑްރޯއެއް ނެގޭނެއެވެ. އަދި ގުރުއަތުން ހޮވޭ ހަތް ފަރާތަކަށް އޭޑީކޭގެ ސްޕޯޓްސް ޕެކޭޖެއް މުޅިން ހިލޭ ލިބޭނެއެވެ.
ދުވުމުގެ އިތުރުންވެސް މި ހަރަކާތް ކުރިއަށްދާ ގަޑީގައި އެހެނިހެން ބައެއް ކަންތައްތައް ކުރިއަށް ގެންދިއުމަށް ވަނީ ހަމަޖެހިފައެވެ. އެގޮތުން މި ސަރަހައްދުގައި ބޭސިކް ހެލްތު ޗެކަޕް ހެދެން ހުންނާނެ ކަމަށާ، ވޯޓާ ޕޮއިންޓަކާ އެނާޖީ ސްޓޭޝަނެއް ހުންނާނެކަމަށް އޭޑީކޭގެ މެނޭޖިން ޑިރެކްޓަރ އަހުމަދު އައްފާލް ވިދާޅުވިއެވެ.
މި ދުވުން 35 ގަޑިއިރު ހުއްޓާނުލާ ކުރިއަށް ގެންދިއުމަށް އަޅުގަނޑުމެންގެ މުއައްޒަފުން ބައިވެރިވާނެ. އެގޮތުން ގާތްގަނޑަކަށް 45 މުއައްޒަފުން، އެކި ގަޑިތަކަށް ބަހާލައިގެން މި ހަރަކާތުގައި ދުވާނެ.އޭޑީކޭގެ މެނޭޖިންގ ޑިރެކްޓަރ އަހުމަދު އައްފާލް
އައްފާލް ވިދާޅުވީ މި ދުވުމުގައި އޭޑީކޭގެ މުއައްޒަފުންނާއެކު ބައިވެރިވެ ޖުމްލަ 35 ކިލޯމީޓަރު އައްފާލްވެސް ހަމަކުރާނެ ކަމަށެވެ.
އާންމުކޮށް ހުރިހާ ފަރާތަކަށް ހުޅުވާލައިގެން ކުރިއަށްގެންދާ މި ދުވުމުގައި ކޮންމެ ބައިވެރިއަކު ހަމަކުރާ ކޮންމެ ކިލޯމީޓަރަކަށް އޭޑީކޭއިން 35 ރުފިޔާ ޗެރިޓީއަށް ހަދިޔާ ކުރާނެއެވެ. މި ހަރަކާތުގައި ބައިވެރިވާ ކޮންމެ ބައިވެރިއެއްވެސް މަދުވެގެން އެއް ކިލޯމީޓަރު ހަމަކުރަން ޖެހޭނެއެވެ. މި ދުވުމުން އެއްކުރާ ފައިސާ ހަދިޔާކުރުމަށް ހަމަޖެހިފައިވަނީ ޓައިނީ ހާޓްސް މޯލްޑިވްސްއަށެވެ.
މި ހަރަކާތް ނިންމާލުމަށްފަހު ޖެނުއަރީ ހަވަނަ ދުވަހުގެރޭ 20:30 ގައި ކުޑަ ރަސްމިއްޔާތެއް ބޭއްވުމަށް ވަނީ ހަމަޖެހިފައެވެ. މި ރަސްމިއްޔާތުގައި އޭޑީކޭގެ 35 ވަނަ އަހަރީ ދުވަހުގެ ލޯގޯ އިފްތިތާހުކުރާނެއެވެ. އަދި ދުވުމުން އެއްކުރި ފައިސާ ރަމްޒީ ގޮތުން ޓައިނީ ހާޓްސް މޯލްޑިވްސްއާ ހަވާލުކުރާނެއެވެ.
